الماروتى و لا QQ cheryو لا 128 حد يساعدنى ؟؟؟

[robien_hood]

بسأل اللى جرب الماروتى علشان عاوز اجيبها لمراتى بس محتار بينها و بين 128 و بين QQ chery

[sab3aawy]

طالما انت بتتكلم على QQ يبقى انت بتدور فى المستعمل لأن اعتقد ان معادش منها جديد

عموما خرج ال QQ من حساباتك لأنها غير منتشرة وقطع غيارها قليلة واختياراتك تدل انك بتدور على عربية عملية

انا امتلكت ال 128 وامتلكت الماروتى واقدر اقول لك ان فيها مميزات لكل منهما على حساب الأخرى وفين عيوب لكل منهما على حساب الأخرى وفيه مميزات مشتركة وفيه عيوب مشتركة

مميزات تنفرد بها ال128: صالون واسع يتسع لخمسة افراد، شنطة كبيرة ، اثبت على الأرض من الماروتى، محرك لا يتأثر كثيرا بوزن ركاب السيارة، سهولة تركيب التكييف والكاسيت

مميزات تنفرد بها الماروتى: استهلاك بنزين لا يذكر مقارنة بال 128، تسارع افضل من ال128 وغيارات طويلة المدى، المحرك افضل استجابة فى الRPM المنخفضة،قدرة غير عادية على المناورة و سهولة التحكم والقيادة لصغر حجم السيارة ، عجلة قيادة ودواسات خفيفة جدا، زاوية دوران ضيقة جدا ، امكانية طى الكنبة الخلفية لتوسيع الشنطة

عيوب تنفرد بها ال 128: زواية دوران واسعة للغاية ، حساسية غير عادية لحالة المساعدين ،صعوبة العثور على قطع غيار اصلية(قطع الغيار موجودة بكثرة غير عادية لكن الأصلى منها نادر جدا)، المحرك غير مرن فى الrpm المنخفضة، عمر آلات الجر اقصر من مثيلتها فى الماروتى

عيوب تنفرد بها الماروتى: صالون 4 افراد فقط، الشنطة صغيرة جدا، صعوبة تركيب الكاسيت، وعدم امكانية تركيب تكييف سوى النوع الخاص بها، صوت محركها اعلى من صوت محرك ال 128 كما ان له الرنة المميزة لصوت محركات ال 3 سلندر ، خطورة الفرملة المفاجئة من سرعات مرتفعة

مميزات مشتركة: رخص قطع الغيار وسهولة الصيانة، عدم وجود انظمة الكترونية تعقد مسالة الصيانة ، سيارات سمعتها طبية فى مجال الخدمة المتواصلة وتحمل العمل الشاق، السياراتان تصلان الى سرعة 130 كم/س بسهولة جدا ، السيارتين صاجهم متين

عيوب مشتركة: تكنولوجيا قديمة لا تعطى رفاهية الأداء المميزة للسيارت الأحدث،الصالون فقير، عزل الصوت فى السيارتين ليس مثل السيارات الأكثر فخامة، باختصار السيارتين سيارات اقتصادية مش مصروف فيهم قرش واحد على الرفاهية ، لكن كل الفلوس المصروفة عليهم مصروفة لخدمة فكرة ان السيارة هى وسيلة نقل فقط بدون اى اضافة اخرى

[m000dy]

باختصار كده وبالاضافه الى اللى قاله الاستاذ سبعاوى
لو العربيه للمدام يبقى خليك فى الماروتى عشان ما تتبهدلش
الماروتى تستحمل سواقة الستات وبما انها زيرو مش هاتقف وركوبها هايبقى نضيف
ومادام للمدام يبقى مش هاتحتاج تركب 5 انفار زى ال 128
وكمان بما انها عربيه تانيه يعنى فى غيرها فى البيت يبقى خليك فى الماروتى عشان تكلفة البنزين ( ولا انتو ناويين تصرفوا القرشين بتوع كل شهر على البنزين وتاكلوا طوب )
صح كده ؟