محتار بين اربع عربيات

[محمد مجدي 22]

السلام عليكم و رحمة الله و بركاتة
انا معروض عليا 4 عربيات و محتار اشتري انهي واحدة
ارجو منكم المساعدة لاني عمري ما طلبت حاجة في المنتدي و الناس جاوبت عليا
1.النترا 2012 الفئة الاولي لونها اسود ماشية 60 الف راشة بعض الاجزاء مطلوب 125 الف
2.النترا 2012 كاملة ماعادة البصمة لونها اسود ماشية 60 الف كيلو فبريكا بالكامل ب 125 الف
3.مرسيدس b150 هاي لاين لونها فضي ماشية 120 الف كيلو ب 125 الف
4.باسات 2008 اول فئة لونها سماوي ماشية 135 الف كيلو ب 135 الف جنية
فاية رايكو اشتري اية من دول
بس ارج الرد سريعا

[Hosam_Optrawy]

ليه بس كدا دا الناس كلها بتساعد بعض :) اللى يعرف حاجه بيقول

مبدأيا العربيتين الإلنترا ماشيين نفس الكيلو ، واحده أول فئه وراشه والتانيه هاى لاين ومش راشه ، والاتنين بنفس السعر طب ازاى ؟

الإلنترا مشكلتها انها بدون ايموبليزر وسرقتها منتشره فلو جبتها لازم تأمنها كويس والحارس ربنا

المرسيدس معنديش فكره عنها اوى ولا عن سعرها

الباسات طبعا حلوه بس اللى أعرفه انها لازم بنزين 95 عشان الموتور بتاعها حقن مباشر fsi والله أعلم اللى هاتشتريها منه كان بيحطلها كام ودا ممكن يأثر عليك بما ان العربيه مشيت 135 الف

بشكل عام حاول تشوف عربيه ماشيه أقل من 100 الف كم وصيانتها في التوكيل قدر الإمكان ، والأهم من دا ياريت لو تشوف عربيه بيتى من حد معرفه يكون أفضل

بالتوفيق

[م أحمد]

العربيات اللى انت ذاكرهم مش شايف انهم فرص خالص

[M.Elwan]

سيبك من الانترا خالص
يفضل المرسيدس والباسات
لو مش بتفكر تبيع تاني هات المرسيدس لان بيعها تقيل شويه
لكن لو بتغير كتير هات الباسات

[محمد مجدي 22]

هما مش فرص ولا حاجة بس دة الي انا اعرفهم
و قد السعر الي معايا
انا هستقر علي النترا او باسات

[محمد مجدي 22]

بس عايز اعرف المفروض كبس الموتور
يكون كام و كبس الفتيس برضو

[م أحمد]

هما مش فرص ولا حاجة بس دة الي انا اعرفهم
و قد السعر الي معايا
انا هستقر علي النترا او باسات

يعنى ايه اللى انت تعرفهم ؟ هل مكلم تاجر او ميكانيكى و جايبلك دول بس ؟

النت مليان اعلانات لمختلف العربيات....و ليه مش حاطط الزيرو فى دماغك

فى نقطة انا شايفك مش عامل حسابها خالص.....مصاريف التشغيل و الصيانة....الألمانى غير الكورى

كبس الموتور (كبس البساتم) لو زيرو من المصنع بيبقى فى حدود ال 90 %

مفيش حاجة اسمها كبس فتيس...فى فتيس فيه مشكلة او فتيس سليم بينقل بسلاسة

[amr011111]

هات اى عربيه زيرو ب 125 الف ويبقى راكب عربيه من الزيرو بدل النترا مستعمله داخله فى رابع سنه هتلاقى الكاوتش على تغيير وهتصرف مصاريف تسجيل وتغير سيور وفلاتر وزيوت هتلاقى على الاقل صرفت 8 الاف جنيه يعنى العربيه وقفت عليك بـ 133 الف جنيه
يبقى هات سنترا زيرو او سوزوكى سياز

[hanyyacot]

اؤيد الرأى انك تشترى زيرو احسن بكتير من المستعمل و القلق وعدم الضمير اللى عند كل الناس , كمان عشان توفر مصاريف لان اى مستعمل هايكون ليه مصاريف الله اعلم ب مداها

[4fun14]

أولا حضرتك مقولتش اولوياتك ايه في العربيه,يعنى الأهم عندك مصاريف تشغل قليله (قطع غيار رخيصه) ولا حاجاتها معمره ولا اعاده بيع ولا الجرى والسحب ولا الوسع ولا الرفاهية.
ثانيا انا كنت ف نفس حالك ده واستقريت انى ازود الميزانية شويه واشتريت زيرو فبنصحك تجيب زيرو حتى لو مزودتش الميزانية ومن رايي شوف اللوجان هتعجبك اوى
ثالثا اول عربيتين نفس العداد والموديل والسعر بس واحده كامله والتانية فاضيه وراشه يباه ليه مدخل الفاضية وراشه في المقارنة؟
رابعا لو مضطر اختار من الأربع عربيات دول انا شخصيا هختار الالنترا بس زي ما قال الزميل هيا بتتسرق كتير لازم تأمنها كويس جدا