شيروكي 1998 ولا تيجو 2010 !!

[Ahmed Metwally]

شباب انا كنت ناوي اجيب تيجو مستعملة
وانا بدور لاقيت عربية شيروكي موديل 1998 بنفس سعر التيجو تقريبا
الشيروكي اوتوماتيك و 4100 cc
التيجو مانيول و 1600 cc
وفرق العمر بين الأتنين 12 سنة
وبما انى مش خبير فى العربيات
قلت اسأل اهل الخبرة
ماذا تفعل لو كنت مكاني؟

[abokoko]

الشيروكى الانسب
لو
لو محتاج عربية 4*4
لو محتاج عربية تتحمل اوزان اشخاص او شنط واحمال
لو مش فارق معاك الاستهلاك العالى للبنزين

غير كده التيجو احسن لانها احدث ولما سبق

[Mohamed Desoky]

غير استهلاك البنزين العالى جدا واللى هيديقك مع الوقت مصاريف تشغيل وقطع غيار غالية جدا وميكانيكى متخصص فى الامريكانى وفوق ده كله ضريبة 4100 cc فى السنه الواحده مش افل من 2000 ج فكر فى كل ده لان الامريكى قوى جدا لكن ملهوش حظ فى بلدنا انا متاكد ان الشروكى اقوى من التيجو بس مش هخبط فى عربيات الناس فكر كويس وربنا يوفقك

[Ahmed Metwally]

وجهات نظر تحترم
بس هل استهلاك البنزين عالى للدرجة دي؟
يعنى تقريباً الشيروكي بتستهلك كام فى الـ 100 كيلو؟

[dr_haitham79]

لو مكانك: اللى يحكم هو الغرض من العربية
والزملاء الافاضل قالوا مميزات الشيروكى اللى لو حضرتك محتاج المميزات دى يبقى الكفة هتميل ليها
اضافتى هى ان حضرتك لو اخترتها:
فكر جديا فى تحويل العربية لغاز طبيعى عشان تتغلب على مشكلة الاستهلاك العالى للبنزين
وتركب اسطوانتين مش اسطوانة واحدة كمان.

[Mohamed Desoky]

لو مكانك: اللى يحكم هو الغرض من العربية
والزملاء الافاضل قالوا مميزات الشيروكى اللى لو حضرتك محتاج المميزات دى يبقى الكفة هتميل ليها
اضافتى هى ان حضرتك لو اخترتها:
فكر جديا فى تحويل العربية لغاز طبيعى عشان تتغلب على مشكلة الاستهلاك العالى للبنزين
وتركب اسطوانتين مش اسطوانة واحدة كمان.

فى المكتب الاستشارى الهندسى عندنا جيب شيروكى منول بنستخدمها للجبل والطرق الصعبة علشان شغل المساحة وانا الوحيد اللى بصلح فيها واشيل الهم وعارف مصاريفها كتير اداية بس احنا شركة قطاع خاص والادارة مديقين من فواتير بنزين وقطع غيار دة حتى ميكانيكى الامريكانى كبر الورشة وبقى مركز خدمة ورفع سعرة وعمل ملف ضريبى قال يعنى بيدفع ضريبة للدولة ومن فترة بسيطة غيرة 2 كاوتش امامى مش فاكر المقاس سعرالفرده الواحده 1450 بلضريبة هيا عربية للجبل كويسة لكن للطرق والجرى عادية 140 او 160 ده اخرها هيا عايزة حد غنى وبيحب القوى اما لواتحولت لغاز طبيعى كدة الشنطة اتلغت اسف طولت بس حبيت انفل التجربة للافادة وشكرا

[Ahmed Metwally]

والله يا رجالة اللى خلاني استشيركم فى الشيروكي انى عارف انها عربية قوية وتسد فى حاجة
وعارف انها مش بتاعة جري .. ولو ان 160 ده بالنسبة لى طيران مش جرى :d
بس اللى معرفوش هو مصاريف التشغيل
وكما تفضلتم واشرتم ان مصاريفها غالية
لكن هل تفضلتم وتعرفوني عينة من المصاريف يمكن تطلع مقدور عليها
اهمها مصروف البنزين الله يباركلكم
لان الصراحة فكرة الغاز مش مطروحة :)

[hugan]

شيروكي طبعا مدرعه
لكن اظن مصاريف تشغيلها تخليك تفكر الف مره
للعلم التيجو معايا
وشغال في المقاولات
عربيه مش ضعيفه ولا واقعه
بتاءدي المطلوب منها بكفاءه
مع مصاريف تشغيل عاديه

[Mohamed Desoky]

والله يا رجالة اللى خلاني استشيركم فى الشيروكي انى عارف انها عربية قوية وتسد فى حاجة
وعارف انها مش بتاعة جري .. ولو ان 160 ده بالنسبة لى طيران مش جرى :d
بس اللى معرفوش هو مصاريف التشغيل
وكما تفضلتم واشرتم ان مصاريفها غالية
لكن هل تفضلتم وتعرفوني عينة من المصاريف يمكن تطلع مقدور عليها
اهمها مصروف البنزين الله يباركلكم
لان الصراحة فكرة الغاز مش مطروحة :)

واضح من كلام حضرتك انك ميال للشروكى فاى كلام هبتقال ليك ملهوش لزمه المهم انتى حرفى اختيارك بس على حاجه بسيطة البوجيهات الواحد سعره 70 ج احسب فى 6 فلترالزيت 160 ج لان الامريكى مفهوش مضروب كلة اصلى سير المجموعة دينمو تكيف باور طلمبة مياة السير 700 ج ومره المروحه طارت كسرت الريداتير كلفت الشركة 4000 ج وقيس على كدة الخلاصة الامريكانى زى الالمانى مرسيدس بى ام واودى عربيات للاثرياء فقط وشكرا

[Ahmed Metwally]

واضح من كلام حضرتك انك ميال للشروكى فاى كلام هبتقال ليك ملهوش لزمه المهم انتى حرفى اختيارك بس على حاجه بسيطة البوجيهات الواحد سعره 70 ج احسب فى 6 فلترالزيت 160 ج لان الامريكى مفهوش مضروب كلة اصلى سير المجموعة دينمو تكيف باور طلمبة مياة السير 700 ج ومره المروحه طارت كسرت الريداتير كلفت الشركة 4000 ج وقيس على كدة الخلاصة الامريكانى زى الالمانى مرسيدس بى ام واودى عربيات للاثرياء فقط وشكرا

يا بوب أضحك عليك لو قلت انى مش ميال للشيروكي
اكيد طبعاً ميال ليها.
بس المصاريف اللى انت ذكرتها دى تخليني اقولها الف الف شكر ومانجلكيش فى حاجة وحشة
انت جبت من الأخر

شيروكي طبعا مدرعه
لكن اظن مصاريف تشغيلها تخليك تفكر الف مره
للعلم التيجو معايا
وشغال في المقاولات
عربيه مش ضعيفه ولا واقعه
بتاءدي المطلوب منها بكفاءه
مع مصاريف تشغيل عاديه

إذاً فهى التيجو (Y)


انا بشكركم يا رجالة على التفاعل المفيد

والف شكر يا "Mohamed Desoky" على التفاصيل اللى جابت من الأخر :D

[Kaizer]

سيبك من كل الكلام ده، اللي يتكلم عن الشيروكي يكون جربها مش سمع عنها بس.
الضريبة 1050 جنية و التأمين 200 جنية
فلتر الزيت 50 -60 جنية
موتور كامل استيراد 5000 - 7000 جنية
علماً بأن قطع الغيار معمرة فوق ما تتحيل.

من الاخر مصاريفها في المتناول زي اي عربية سيدان ان لم تكن اقل.
الفرق بس استهلاك البنزين حوالي 140 كيلومتر في الصفيحة في السفر اما جوه البلد 100 - 120 كيلومتر حسب الاشارات و الطريق.

عموماً الفرق بين العربيتين كبير و في الاصل كل واحدة فئة مختلفة و لا يمكن ان نقارن بينهم

[samyyousef]

لو ناوي على الشروكي، فكر في اختها لكن احسن منها و انعم بكتير و صيانتها اسهل
البليزر s10 اللي بتستخدمها القوات الجوية...و ياسلام لو موديل 1994