بطلب منكم مساعدتى لشراء سيارة مستعملة جزاكم الله خيرا :)

[abobkr2006]

السلام عليكم
انا ابوبكر شاب من حلوان و ده اول موضوع ليا اكتبه معاكم فى المنتدى و داخل على مصلحة هههه .. شغلى فى العاشر من رمضان :( و بستخدم كتير اوى للشغل مواصلات خربت بيتي بمعنى الكلمة
عايز اجيب عربية تكون عملية جدااا مش ببص على الرفاهيات و الكلام ده بس كل اللى يهمني زي اى شاب فى بدايته قلة الصيانات و المشاكل و استهلاك البنزين الاقتصادى
معلومة : المشوار من بيتي للشغل رايح جاى 190 كيلو متر و هروح حوالى خمس ايام فى الاسبوع و ده بالاضافة ان اهل بيتي هيستخدموها بس استخدام بسيط يعني
انا كل اللى اقدر احطه فى العربية 50.000 جنيه .. افيدونى و جزاكم الله خيراً :)

[S O P H O S]

اهلا بيك
طيب حضرتك تفضل موديل قريب يبقي كوري او صيني زي الفيرنا وغيرها
ولا موديل قديم وياباني زي الكورولا او الكريستالة ؟

[dr.mero90]

ربنا يوفق حضرتك ف الشراء
طبعا انا مش هافتي و هاستني مع حضرتك نسمع راي الخبراء يا رب حد يفيدنا

[amr011111]

190 كيلو يوميا ده إهلاك عالى للعربيه ومصاريف كتير ومش هينفع معاك غير الزيرو. ادفع اللى معاك مقدمه وقسط الباقى وهات اى عربيه ولتكن التو اهم حاجه عربيه زيرو وبالتوفيق

[abobkr2006]

اهلا بيك
طيب حضرتك تفضل موديل قريب يبقي كوري او صيني زي الفيرنا وغيرها
ولا موديل قديم وياباني زي الكورولا او الكريستالة ؟

هو حضرتك لو موديل قريب يا ريت طبعا عشان هستهكلها جامد بس هو فى فيرنا ب 50؟ انا اعرف ان اقل حاجة و تكون كويسة حوالى 60 ناس قالولى على رينو لوجان و ناس قالو دايو لانوس بس مشكالها كتير !!

[abobkr2006]

ربنا يوفق حضرتك ف الشراء
طبعا انا مش هافتي و هاستني مع حضرتك نسمع راي الخبراء يا رب حد يفيدنا

و انا مستنى مع حضرتك يا دكتور المنتدى هنا عارف انه اغلبه خبراء و هيفدونا ان شاء الله :)

[abobkr2006]

190 كيلو يوميا ده إهلاك عالى للعربيه ومصاريف كتير ومش هينفع معاك غير الزيرو. ادفع اللى معاك مقدمه وقسط الباقى وهات اى عربيه ولتكن التو اهم حاجه عربيه زيرو وبالتوفيق

انا طبعا فكرت يا أ.عمرو فى موضوع انى احط الفلوس دى مقدم عربية جديدة بس اما حسبتها مع نفسي لقيت هيكون صعب عليا تحمل مصاريف العربية نفسها و صيانتها مع القسط الشهري

[amr011111]

الالتو اعتقد هتكون قريبه من الخمسين الف جنيه وميزتها انها زيرو ومش هتصرف معاك الا بنزين وزيت بخلاف المستعمل اللى ممكن يعطل معاك كتير وخاصة مشوارك طويل جدا

[abobkr2006]

الالتو اعتقد هتكون قريبه من الخمسين الف جنيه وميزتها انها زيرو ومش هتصرف معاك الا بنزين وزيت بخلاف المستعمل اللى ممكن يعطل معاك كتير وخاصة مشوارك طويل جدا

هو انا حضرتك انا دورت على مواصفتها على النت لقيتها 800 cc دى تستحمل المشوار بتاعى ؟؟190 كيلو خمس ايام اسبوعيا ؟؟ سعرها فعلا حلو كعربية زيرو

[theman]

انا رايي حضرتك تشوف مرسيدس 200 القديمة موديلات اخر السبعينات واول الثمانينات عربية دكر زي ما بيقولوا احسن من العربيات الورق اللي طالعة دلوقتي وتتحمل المسافات الطويلة بتستهلك بنزين بس كل العربيات دلوقتي بتستهلك زي بعض وقطع غيارها رخيصة علي فكرة

[bluemail]

دايو لانوس ، حالة نضيفه وعداد قليل، هتستحمل المشوار وتصرف بنزين وزيت وكاوتش فقط
التو عربية زيرو كويسه لكن جوه المدينة ، خفيفه اوي في السفر

[abobkr2006]

دايو لانوس ، حالة نضيفه وعداد قليل، هتستحمل المشوار وتصرف بنزين وزيت وكاوتش فقط
التو عربية زيرو كويسه لكن جوه المدينة ، خفيفه اوي في السفر

تمام كمان ناس صحابي كمان قالولى هات دايو لانوس او نوبيرا و سعرهم فى الخمسينات ع قد اللى معاك و بيستحملوا بس ساعات بتحتاج صيانات كتير و ساعات تبقى يا دوب بنزين و زيت و كاوتش زي ما حضرتك بتقول .. يعني يبقى انا و حظى

[SHERBINII]

هات لادا نيفا موديل عالي

[Honda4ever]

الصراحة انا شايف ان بلاش ألتو . 800 سي سي هيتهلك . ولانوس الصراحة شايفها حاجة كويسة ممكن تجيبها و قطع غيار منتشرة . ربنا معاك