عايز عربيه في حدود 65000

[محمد المطري]

دي اول مشاركه ليا في الجروب عايز عربيه في حدود 65000 من حيث الاعتماديه والثبات وقطع الغيار وموفره عشان انا محتار اوي ودي اول ركوبه ليا وعايزها مستعمل واختياراتي كانت
فيات بونتو كلاسيك
ياريس
سيريون ولو في افضل بره اللي قلته ياريت بردو







تم تعديل العنوان والنقل لقسم المقارنات
م.ع 7

[lancer06]

اهلا وسهلا بيك
هاتركب مانيوال ولا اتوماتيك
لانها تفرق فى الاختيارات بالنسبه للسعر

[محمد المطري]

دمياط

شكرا لردك مانيوال عشان دي اول ركوبه فياريت تقولي الاختيارات المتاحه مانيوال او حتي في الاوتو كمان

[lancer06]

شكرا لردك مانيوال عشان دي اول ركوبه فياريت تقولي الاختيارات المتاحه مانيوال او حتي في الاوتو كمان

بص بالمبلغ ده يجيب
سيريون ٢٠٠٧ مانيوال
اليارس انهارده بتتكلم فوق المبلغ دا
الفيات بونتو موديل ٢٠١٠ و ٢٠١١ مانيوال لكن فى قطع غيار مش بتكون متوفره فى دمياط فبتجيبها من المنصوره

ممكن تدخل فى المقارنه
بروتون جين تو اتوماتيك موديل ٢٠٠٧
تويوتا كورولا ١٩٩٩ اتوماتيك
سبيرانزا m11 مانيوال هتكون اقل من السعر ده شويه
سبيرانزا m12 مانيوال
هيونداى فيرنا موديل ٢٠١٠

بس راعى ان اى عربيه هتجيبها هتصرفلها من ألف جنيه الى ٥ الاف جنيه
عقد مسجل
ترخيص
تغيير زيوت وفلاتر وسيور
طقم سيرفس
فحاول تعمل حساب المصاريف اللى جايه
وربنا يوفقك

[محمد المطري]

دمياط

طب حضرتك تنصحني بايه من دول عشان انا خبرتي قليله مع اني ميال قوي للبونتو كلاسيك وانا عايز عربيه متزعلنيش في حاجه ومش كل شويه اوديها لحد وانا اسرتي 3 افراد وشكراا لحضرتك

[lancer06]

من وجهه نظرى انا شايف ان افضل اختيار بروتون جين تو لانها بتجمع ما بين وسع الصالون وقوه محرك مع فتيس اتوماتيكى وشكل شبابى وموديل حديث

ولو بتحب المانيوال ممكن تجيب شيفروليه لانوس او هيونداى فيرنا
الاتنين قطع غيارهم متوفره عندك ومش محتاجين حد معين يشتغل فيهم
بس لم تشترى تشترى عربيه حالتها ممتازه علشان متكرهش العربيات

[محمد المطري]

شكرا لحضرتك طب ممكن اعرف من حضرتك مميزات وعيوب جين 2 وايه اخبار البنزين وتوافر قطع الغيار هنا في دمياط وهل العربيه اعطالها كتير فعلا والمبلغ لو وصل 70 يجيب حاله كويسه؟

[lancer06]

مرحبا اخى الكريم
لو هتجيب هات موديل من ٢٠٠٨ فيما بعد
انا ركبت العربيه وبصراحه العربيه تحفه وحماله قسيه
اللى لفت نظرى ممكن العفشه ناشفه شويه وخامات الطابلوه مش فى جوده الالمانى واليابانى أردء شويه والعربيه صناعه ماليزى وتصميم الموتور والعفشه عملته شركه لوتس العالميه وتقدر تروح الشارع اللى فيه المطافى اللى قبل الكيلانى وتسأل عن توافر قطع الغيار واسعارها من عفشه لموتور لإكسسًوارات ودى مميزات وعيوب الجين تو من احد ملاكها ( منقول )لكن معظم المشاكل دى كانت فى ٢٠٠٦ وبعد كده اتعالجت
---------------------------------
Guest
3 سنة
عيوب الجين (وجة عام)
1 خامات التابلوة مش قد كدة
2 عيوب التقفيل
(سنتر - زجاج - مفتاح المرايات الكهرباء - انذار - لمبة الصالون )
4 لمبة الengine بتنور لو حطيت بنزين 90 او 92 من بنزينة وحشة (حساسة زيادة عن اللزوم )
5 صوت خفبف ومشهور عند لف الدريكسون (في الاول بيظهر الصوت دة )
6 في بعض الناس اشتكت من المساعدين بس قليل اووي
7 صوت الموتور علي نوعا ما بس صوت عالي تحب تسمعة يحسسك بقوة الموتور مش عالي يضايقك
علي رأي سبعاوي (زئير الاسد)
8 سسمعت بعض شكاوي من مواتير المساحات
9 كنت بقول علي استهلاك البنزين عالي بس طلع معظم المواتير ال 1600 التوماتيك زيها
يعني هيا زي اللانسر كدة
10 العربية تحت ال RPM 3 بتكون بطيئة نوعا ما
وبعد ال 3 بتكون طلقة
11 فيها بعض المشاكل في الكهرباء (مرة من غير ما احس وانا بعمل صيانة قالي في عندك ماس في ضفيرة
الكهرباء لما بتشغل المساحات علي اقصي سرعة )
مع اني كنت بشغلها ولو حسيت بحاجة وعملوهالي لوحدهم
12عربية ضيقة من ورا
13عر اعادة البيع مش حلو وان كان احسن من الواجا

(دي يا جماعة عيوب الجين 2 بوجة عام مش خاص يعني صعب اووي تتجمع كلها في عربية واحدة
او مع شخص واحد ومنها عيوب انا شفتها بعيني وعيوب سمعتها بس اللة اعلم بصحتها وعيوب
حصلتلي كدة يعني )

وكل العيوب دي ياجماعة مفيش ولا عيب منها يوقف العربية ولا اي حاجة
كلة بيتعمل مع الصيانة الدورية ومعظمهم مش بياخد وقت خالص
يعني مثلا لمبة ال ENGINE دي بتتعمل بالجهاز في دقيقة بالظبط مش اكتر
ومعظم العيوب بتكون عبيطة كدة

يعني انا كل العيوب اللي حصلت معايا عيوب ال FINISH (لمبة الصالون - السنتر - لمبة ال ENGINE )
مفيش كل الباقي دة

بس انا حبيت اقول كل حاجة الصح واللي سمعنة عشان اكون خلصت ضميري

مميزات الجين
1 شكل تحفة من برة ومن جوة
2 قيمتها السعرية تحفة
في الدول العربية بتتباع بنفس تمن الكرولا والمازدا 3
3 كماليات كتير اووي
(مثبت سرعة - كاوتش عريض 195 علي 60 - باكينج سنسور - MULTI FUNCTION في الدريكسيون
- كاسيت نضيف اووي وسماعات تحفة بلو بانكت - عازل حراري علي الكبوت من جوة - شداد ماسك فردتين الشاسية - الموتور مقفل بنضافة اوي - جنط 15 وحاجات كتيرررررررررر

4 ثبات خرافي خرافي بمعني الكلمة علي اي سرعة واي ملف (الايرو ديناميكس بتاعها هايل)
5 صاج ممتاز بالمقرنة بالعربيات الجديدة مش ورق
6 كراسيها تحفة
7 شنطتها مش صغيرة
8 موتور قووي اووي بعض ال 3 RPM بيكون عايز يطير
9 التسارع بتاعها ممتاز لحد 170 -180
بعد كدة بيبدء يقل
10 الكاوتش SILVER STONE كويس اووي
11 الخلوص بتاع العربية ممتاز
بالرغم الثبات ركب 3 كبار مش حتحك في اي مطب
12 العربية بتسحمل البهدلة ومش بتقول لا
13 سوقتها تحفة (كنترول جامد اووي علي الطريق بتحسة وانت سايقها )
14 قطر دورانها قليل بسبب انها سبورت (بيكون ممتاز بالغرز )
15 لون التابلوة تحفة وشكلة يخطف الانظار
16 العربية شغلها مش معقد اووي زي الفرنساوي ولا الكلام دة بالرغم من التكنولوجيا العلية
17 قطع غيارها بدأت في الانتشار برة التوكيل واسعارها معقولة
18 الماليزين كل شوية في التوكيل وبيتابعوا جامد
واي شكوي بيهتموا اووي

من الاخر العربية دي بالرغم من عيوبها التافهة الكتير الا ان معظم اللي معاهم العربية دي بيعشقوها
وغير العيوب دي بقي كل العربية مميزات مش عادية مميزات جميلة

انا عن نفسي قسيت اووي علي العربية ودلوقتي عرفت فيمتها الحمد للة
انا عامل بالعربية 45000 كم
في سنة ونصف تقريبا
5 حوادث
دة غير الخبطات
وفي ايام بعمل بيها اكتر من 300 كيلو بالتكييف وفي الحر
وجري وبهدلة ومش بتقول لا
بحسها حمالة قسية
كنت مرة بجري علي 180 في طريق الاسماعيلية مع جولف 5
طلع غشيم وخد غرزة مقفولة من امامي علي 180
راح خبطني من قادم وحكين انا في الرصيف وفضلت احك فية لحد لما عديتة
انا اليوم دة مش عارف ازاي متقلبتش اصلا
واللة كل اللي كانوا راكبين معايا استغربوا
بس طبعا دة بستر ربنا مش بسبب اي حاجة تانية

واتسرقت مني فترة والحمد للة رجعتلي
انا بهدلت العربية بهدلة معتقدش انها ممكن تحصل مع حد تاني

من الاخر اللي حيركب العربية دي حيحبها اوووي اوووي
فعلا جميلة

ملحوظة من مهندس معروف قال ان عربية اخوة موديل 2007
ومفيهاش العيوب دي خالص
وكل الكلام دة كان في 2006

يعني بعد موديل 2006 تبقي العربية فعلاً مثالية بمعني الكلمة
----------------------------
وممكن تدخل منتدى السيارات الماليزيه ومنها لبروتون وتشوف المواضيع وتعرف معلومات اكتر
تحياتى

[محمد المطري]

متشكر علي ردك اوي يا كبير انتا قلت كل حاجه عن العربيه اللي مقلقني منها قطع الغيار غاليه لو في امثله ياريت وكمان انتا بتحط بنزين في الاسبوع بالتقريب كده اد ايه وشكراااااا جدااا

[S O P H O S]

الياريس طبعا