سوبارو xv أم هوينداي كريتا

[alaafmah]

السلام عليكم
أريدكم جزاكم الله خيرا أن تقترحوا على من واقع التجربة الشخصية أو الخبرة أو من خلال قراءاتكم واراكم السديدة - علما باني أقيم في احدى مدن الصعيد البعيدة عن القاهرة -أن تساعدوني على الاختيار بين:
سوبارو xv وبين هيونداي كريتا بغض النظر عن فارق السعر

ف سوبارو xv يابانية 100% دفع رباعي، يعيبها قلة انتشارها وضعف سعر إعادة البيع ونقص أو قلة قطع الغيار
بينما كريتا اكثر انتشارا وكيلها معقول وإعادة بيعها اعتقد ممتاز ة– بناء على انتشارها ووكيلها - جر أمامي فقط، قطع غيارها متوفرة

أي أن المقارنة بين الجودة (سوبارو xv )وبين مجاراة السوق (كريتا )
ماذا تفعل لو كنت مكاني

[bluemail]

عليكم السلام
مبدئيا سوبارو عربيه جميله لكن قطع غيار وصيانه في التوكيل فقط
هل في محافظتك فرع للتوكيل او مركز معتمد ؟
ده اللي يحدد اختبارك
بالتوفيق

[alaafmah]

شكرا استاذ bluemail للافادة

للاسف مفيش توكيل في المنيا، بس حسب معلوماتي وتجربتي مع الياباني قطع غيارة معمرة

يا ريت الاخرين يفودونا

[AHMEDJUDDY]

سوبارو xv طبعا ،، وعلي فكره الكريتا مش منتشره زي ما انت متخيل و توقعاتي انها هتفشل في مصر وممكن تقارن الانتشار مثلا بأختها الاكبر التوسان هتلاقي في الشارع التوسان مغرقه الدنيا علي الطريق و الكريتا كل فين و فين لما تشوفها ،، وبالتالي هتقع لما تحب تبيعها ،، ولو الموضوع كدا يبقي تركب xv انظف 100 مره من الهيونداي ،، وبعدين يا سيدي ممكن تشوف مركز خدمه معتمد لابو غالي و تروح كل 10000كم او تنورنا في القاهره .
وعلي فكره والله العظيم انا بقيت اشوف الXVاكتر من الكريتا في شوارع القاهره .

[alaafmah]

السلام عليكم
شكرا سعادة المحترم ahmedjuddy
والله ان مقتنع ب السوبارو بس السوق عندنا غير منطقية الى حد كبير

ادعو من له خبرة في تجارة السيارات ان يفيدتا

[د.هشام]

كقيمة مقابل السعر ، ال سوبارو طبعا بدون تفكير.
والله اعلم

[megaarts]

نصيحه ابعد عن الكريتا لانها اولا غير منتشره بالمره ومتقارنهاش بالتوسان خالص من حيث الخامات والتقفيل
ثانيا تقفيل هندي وليست كوري
نصيحه خليك في ال xv عربيه محترمه جدا وانتشارها كويس جدا علي عكس الامبريزا
نصيحه لوجه الله سيبك من الكريتا ولو في نفس الوقت انت قلقان من السوبارو يبقي خليك في التوسان او الاسبورتاج طالما مش فارق معاك فرق السعر

[AHMEDJUDDY]

نصيحه ابعد عن الكريتا لانها اولا غير منتشره بالمره ومتقارنهاش بالتوسان خالص من حيث الخامات والتقفيل
ثانيا تقفيل هندي وليست كوري
نصيحه خليك في ال xv عربيه محترمه جدا وانتشارها كويس جدا علي عكس الامبريزا
نصيحه لوجه الله سيبك من الكريتا ولو في نفس الوقت انت قلقان من السوبارو يبقي خليك في التوسان او الاسبورتاج طالما مش فارق معاك فرق السعر

الكلام ده مظبوط ،،، زي ما انا قلت بالضبط .

[svneleven]

ال xv علي عكس كل السوبارو. منتشرة و اعادة بيعها مش صعبة و بتمسك سعر كويس.

[alaafmah]

السلام عليكم

شكرا للسادة الافاضل: د. هشام ، megaarts، AHMEDJUDDY، svneleven،
على اضافاتهم القيمة

ومشكورين لانهم رجحوا كفة السوبارو

على فكرة الاعضاء لما ينشروا استفسار حتى لو بسيط بالنسبة للبعض، فانه ممكن ان يكون حيوى جدا بالنسبة لهم، وعند الاختيار يكون الانسان في حيرة شديدة

[AHMEDJUDDY]

السلام عليكم

شكرا للسادة الافاضل: د. هشام ، megaarts، ahmedjuddy، svneleven،
على اضافاتهم القيمة

ومشكورين لانهم رجحوا كفة السوبارو

على فكرة الاعضاء لما ينشروا استفسار حتى لو بسيط بالنسبة للبعض، فانه ممكن ان يكون حيوى جدا بالنسبة لهم، وعند الاختيار يكون الانسان في حيرة شديدة

لا شكر علي واجب ،،، وربنا يوفقك للصالح و الخير ، و مبروك مقدما لاي عربيه هتشتريها ..

[scientist9508]

بسم الله الرحمن الرحيم

الزميل المحترم

بلا أى شك أو تردد أو تفكير . . السوبارو تكتسح و تتفوق بجداره و إستحقاق

أما عن الصيانه و قطع الغيار فهذا يتوقف على ظروفك و نمط حياتك و طبيعة شخصيتك . . الأمر كالآتى:

1 - أعرف الكثير من الشباب لهم نفس ظروفك و هم لا يحرمون أنفسهم من سيارة فوق الممتازه بسبب عدم توافر مركز خدمه فى محل إقامتهم

2 - هؤلاء الشباب يسافرون لأقرب مركز خدمه لسيارته (بالنسبه لأهل الصعيد . . أقرب مركز خدمه هو القاهره) مع الأخذ فى الإعتبار المسافه بين المدينه المقيم فيها الشاب و مركز الخدمه فى كيلومترات التشغيل

3 - مثل هؤلاء الشباب . . عادة ما يكون إستهلاك الكيلومترات الشهر عندهم قليل حتى تتباعد الصيانات الدوريه و حتى لا تصبح الصيانات الدوريه مرتين فى الشهر مثلآ

4 - أما إن كان عدد الكيلومترات المقطوع كبير . . فــ أيضآ لن توجد أى مشكله إذا كانت طبيعة ظروف أو عمل الشاب تجعله يسافر كثيرآ . . فــ فى هذه الحاله سيسافر للقاهره على أى حال و ليس لإجراء صيانه للسياره بشكل خاص

5 - إن كان لا هذا و لا ذاك . . فــ أيضآ لا توجد مشكله إذا كانت شخصية الشاب تعشق الكمال و الإتقان و لا مانع لديه من السفر لإجراء الصيانات الدوريه فى مقابل أن يمتلك سياره بروعة السوبارو

6 - ربما تتعجب من كلامى . . و لكن بعض مراكز الخدمه خارج القاهره و الإسكندريه هى مجرد مراكز صوريه و ليست حقيقيه . . أى أن لديهم قطع غيار الصيانه الدوريه من سيور و زيوت و فلاتر و ربما بوجيهات ليس أكثر . . أقصد أن لو حدث عطل حقيقى فسينصحك بالسفر للقاهره أو سيطلب منك ترك سيارتك عنده حتى يرسل فى طلب قطع الغيار من القاهره . . و ربما تكون العماله لديهم غير مدربه بما يكفى.

7 - إننى من ملاك السوزوكى . . و أذكر أننى قابلت يومآ فى التوكيل بالهايكستب شاب قادم من دمياط بسياره سوزوكى سياز للقاهره لإجراء الصيانه الدوريه و ليس لعطل خطير . . و عندما سألته . . أجاب :إننى قادم من سفر يقدر بــ 4 ساعات لإجراء الصيانه و مسافه تقترب من 400 كم و سأعود فى سفر يقدر بنفس الوقت و المسافه . . أى إننى أتحمل سفر 8 ساعات و مسافه 800 كم لإجراء الصيانه الدوريه . . و لكننى أمتلك سيارة رائعه تسعدنى فى كل مره أستخدمها . . أعجبنى طريقة تفكيره

إختار الأنسب لك و لظروفك و لشخصيتك

هداك الله لأرشد أمرك و أقومه

السلام عليكم ورحمة الله و بركاته

[أحمد عثمان]

الxv طبعا@ بدون نقاش.
ربنا يوفقك

[alaafmah]

شكرا جزيلا لاضافات السادة الافاضل
scientist9508 و أحمد عثمان