الجين 2 ولا الجراند بونتو

[crazylambada]

انا في رايي سكودا فابيا ميني الجديدة

[Ramy-Ahmed]

طبعا

جراند بونتو

[kaboo4]

معلومة بسيطة الشاسيه بتاع الجراند بونتوا هوهو بظبط الشاسيه بتاع الاوبل الاسترا الهتش باك

[i_Am_Legend]

لو مش بتفكر فى شد وجرى وتسارع وموتور جبار= جراند بونتو
والعكس يبقا جين 2
طبعا بالنسبة للعمر الطويل دى حاجة بتاعة ربنا
بس طبعا لو بنتكلم عن جودة معمرة اكيد طبعا الايطالى يكسب وبشدة
بالنسبة لاسعار الصيانة وقطع الغيار مش هاقدر افيدك اوى فيها بس ممكن تسال او تتصل بتوكيل السيارتين وتعرف التفاصيل الخاصة بهم
وبالنسبة للتوكيل= فيات= اوماترا
ام بالبنسبة =جين 2= عز العرب
الفرق مش كبير بينهم من حيث الاهتمام بالعميل فى خدمة مابعد البيع
اعتقد ان التوكيلين ممكن ياخدوا من درجة مقبول : جيد

مين اللى قال ان الجراند بونتو مش بتاعت جرى وشد دى عربية جبارة والموتور ال1400 ممتاز عليها واقل مقارنة تبقى بينها وبين الجين2 هاى لاين بس بردة الجراند احلى ربنا يكرمنى ومش هاركب غيرها هى او ال لينيا فيات ياجماعة فياتتتتتتتتت ايطاليا والمصمم giogaro

[MohabSaeed]

جراند بونتو

لو الاختيار ليا و الفلوس فلوسى ححطها فى الجراند بونتو و انا واثق 100 % انها تستحق كل جنيه بيدفع فيها
1- معمره جدا جدا " موديلات البونتو السابقه تثبت كده "
2- اقتصاديه جدا فى استهلاك البنزين
3- الخامات المستخدمه فى الصالون و التابلوه اكثر من ممتازه و توازى اعلى الماركات الاوروبيه من حيث الجوده .
4- شكل انيق جدا و استايل ايطالى مستحيل تلاقيه فى اى عربيه تانيه فى نفس الفئه .
5- سعر مناسب جدا فى مقابل " الجوده " و الكماليات و عوامل الامان و اسم فيات .
6- تصنيع ايطالى بالكامل . يعنى تطبيق اقصى المعاير فى التصنيع و مراقبة الجوده .

* قطع الغيار بدأت تتوافر خارج التوكيل انا شوفتلها قطع غيار عند الكيلانى و فى شارع دمشق .


الجين2 عربيه جميله جدا على فكره و انا بحبها جدا جدا و الفيس ليفت الجديد حسنها عن الموديل القديم اكتر من ناحيه الخامات الداخليه و الواجهة و تحسين منحنى عزم الدوران + ان موتورها قوى جدا من الاساس .
مميزاتها
1- موتور قوى
2- ثبات عالى جدا
3- كماليات مش متوافره فى اى سياره فى نفس سعرها
4- سعر فى مقابل " القيمه " ممتاز
5- تصميم رياضى جدا و بيليق فيها جدا اى تعديلات
6- صاج قوى جدا ماشاء الله مستحيل تلاقيه فى اى عربيه حديثه

* عيوبها
- للاسف الجين 2 مش من نوعيه السيارات الى تشتريها زيرو و تمشى و تنسى . لا
لازم تشتريها زيرو و يكون فيها عيوب تصنيع و تروح التوكيل يصلحها " اغلبها بتكون عيوب بسيطه " بس بتضيع فرحه العربيه و هى جديده .

- فى عيب فى فرامل الجين 2 ... انا مسوقتهاش ولا جربتها لكن ناس كتير جدا اشتكت من الفرامل و اعتقد مالكيها هما اقدر منى فى تحديد اذا كان فعلا فى مشكله فى الفرامل ولا لا .

- جوده التقفيل و الخامات المستخدمه تعتبر " عاديه " مش سيئه لكن مش ممتازه ولا جيدة جدا .

- قطع الغيار و الصيانات فى التوكيل مكلفه جدا , لكن كل قطع غيارها متوافره بره و تعتبر رخيصه . لان العربيه نفسها انتشرت انتشار كبير جدا .

زى ماقولت لو الاختيار ليا حيكون جراند بونتو ... احتمال لانى مقتنع بيها جدا من اول مانزلت ... و احتمال لان عليها بادج فيات و ايطالى 100 % . مش عارف .
بس انا بحب العربيه ديه جدا .

طبعا الاهم من كل الكلام ده ان حضرتك بنفسك تكون مقتنع بأنهى عربيه تشتريها لانها حتكون عربيتك و بالتأكيد لازم تكون مقتنع 100 % حتحط فلوسك فى انهى عربيه منهم .

* حضرتك انزل و خد معاك صديق مقرب او حد من اقرب الاقرباء و روحو اتفرجو على الجراند بونتو فى التوكيل , و اتفرجو على الجين 2 فى التوكيل . و شوف انتا مستريح اكتر لانهى واحده فيهم .

و ربنا يوفقك للخير ان شاء الله

[creative]

اعتقد ان الاختيار محسوم الى جانب الجراند بونتو وهذا لايقلل من شان وامكانيات الجين 2
وعلى فكرة حضرتك لو سالت اكبر الشخصيات هنا فى المنتدى بالنسبة لقسم بروتون والجين 2 تحديدا ( توت-مزاجنجى- ابو صيام )
انا متاكد ان الرد بتاعهم هايكون كالاتى :
لو مش فارق معاك فرق الفلوس بينهم = جراند بونتو ومن غير تفكير
السعر فارق وعاوز رفاهية وثبات الكبار = صفقة=اقل سعر=جين 2