هل الالماني افضل من الياباني الجديد فعلا ؟؟؟؟؟

[zinc]

دايما بنسمع و نردد كفايه انها الماني ,,,, فهل فعلا هوه افضل من الياباني الجديد
(اقصد بالالماني فئه الجيتا والاوكتافيا و الاوبل فيكترا و استرا سيدان)
(و الياباني : السيفيك و الكورولا الجنوب افريقي)
انا فكرت و قارنت :k47: واليكم التالي :
بالنسبه للثبات اللي كان بيميز الالماني دلوقتي الياباني اصبح ثباته ممتاز جدا علي السرعات العاليه(حتي الكورولا اللي كانت دايما بتتقلب بقت ثابته جدا) ___ يبقي الاتنين متساويين .
اما عن قطع الغيار المعمره فالكل عارف ان الهوندا قطع غيارها معمره جدا و التويوتا قد تكون اقل بشئ بسيط____ الاتنين متساويين
بالنسبه للتسارع ___فالياباني افضل :k4:
بالنسبه للتكييف____ معروف ان الياباني افضل بكتير
بالنسبه لنظام التعليق ___ اعتقد ان الالماني افضل(مبحسش بالحفر و المطبات زي الياباني)
الامان ____ بيقولو كولو زي بعضوا في اختبارات الامان
فانا نفسي اعرف الالماني افضل في ايه بعد ما الياباني قلب كل المقاييس ,,, و هل لو قدامي كورولا 2009 او هوندا اسيبهوم و اخد استرا سيدان (نفس السعر تقريبا) علشان مجرد انها الماني
يا ريت لو انا كاتب حاجه غلط تصححهالي - ولو في حاجه ناقصه قولولنا علشان الكل يستفيد---
و نفسي بجد اعرف هوه احسن في ايه ؟؟؟؟؟

[PoweRPassioN]

و نفسي بجد اعرف هوه احسن في ايه ؟؟؟؟؟

مفيش قاعده ثابته كدا على طول الخط "التعميم خطأ شائع"
قارن عربيه بعربيه و موديل بموديل و تكنولوجي بتكنولوجي
لكن الموضوع كدا مطاطي جدا

لو هتتكلم عن الاسترا والسيفيك و الكورولا
انا اختار السيفيك حتى لو العالم قال لي اركب استرا
عشان هي صفقه جيده مقابل السعر ف نظري.

لكن الكلام بتاعك ممكن يكون محير لو واحد بيقارن
سيفيك و بي ام 316 او 318 موديل اقدم بتلات اربع سينين
ساعتها تفكر انت عايز ايه من العربيه بالزبط عشان اختيارك يكون صح وماتندمش وهكذا

[zinc]

ما انا علشان اتفادي ادخال البي ام والمرسيدس في الموضوع حددت الانواع في الاول - ثاني حاجه انا عملت الموضوع ده لان اكتر من واحد بيسال جيتا ولا هوندا ,,, اوبل ولا تويوتا ,,, الكل يقول جيتا اوبل اوكتافيا , كفايه انها الماني , حتي الاتنين الميكانيكيه الي بتعامل معاهم بيقولولي كدا - ولسه امبارح الراجل اللي بينفخلي العجل قالي كده برده (و بالتالي همه معممين الالماني ) ,,, فياتري ايه الزياده فيهم ....

[zinc]

علي فكره انا لا اهاجم الالماني اطلاقا _ انا بس عاوز اعرف هوه فيه ايه زياده ؟

[Ahmed Anwer]

فيه احساس بالعراقة

فيه عربيات مبتفقدشي رونقها بسرعة

فيه هندسة و تصميم بيخاطب عميل معين عايز يستمتع بالقيادة

مثلا يعني شوف الباسات موديل 99 و الباسات موديل 2009

تحس انهم نفس العربية مع رتوش بسيطة

لكن شوف كورولا موديل 99 و كورولا موديل 2009

عربيات مالهاشي اي علاقة ببعض

يعني فعلا تحس ان العربية مووديل قديم مش حكاية اعتمادية ،، حكاية طابع مميز محافظ بيخلي العربية متفقدشي رونقها

[zinc]

فعلا وجهه نظر سليمه _ بس دي ممكن تكون ميزه في الياباني و خاصه الهوندا - خلو شكلها متطور جدا

[sha2e]

او انت مش من هواة التغير وبتحب تحتفظ بالعربيه ومتفترش فييها وهتخلى العربيه معاك 10 سنين او أكتر يبقى الالمانى هيبقى معاك تمام (الالمانى : طول عمر العربيه الافتراضي )

لو انت من هواة التحديث والتغيير باستمرار خليك فى اليابانى (اليابانى : اعادة البيع )

[abo samra]

والله ياباشا الموضوع جميل جدا واشكرك عليه واحب اضيف رايىء
العربيات الالمانى فى داخل المصريين ليها علاقه مباشره بالاجيال السابقه
يعنى مثلا جيب اوكتافيا 99 وكورولا 99 اكيد هنلاقى تفوق واضح جدا للاوكتافيا
الكورولا 2005 والاوكتافياA5 اكيد الاوكتافيا تتفوق بشده وفرق واضح جدا فى الثبات والابعاد
الكورولا 2008 والاوكتافيا A5 الكورولا سحب اعلى راحه اكثر ثبات وامان على السرعات لا يقل ابدا عن الاوكتافيا الاتنين ليهم نفس قاعدة العجلات ونفس الحجم ونفس السعه
عاوز اعرف منين بقا الاوكتافيا فئه اعلى
على فكره لسه فيه ناس مسره على التشكيك فى قدرة الكورولا الجديده على الثبات والمناوره على السراعات العاليه
بصوا على اللينك ده فيه مقارنه بين اربع عربيات

http://www.motortrend.com/roadtests/sedans/112_0805_civic_mazda3_impreza_corolla_comparison/specifications.html

بين السيفيك والكورولا والامبيريزا والماذدا 3
طبعا واضح من اللينك فى Lateral acceleration وهو له دلاله على الجاذبيه الارضيه وله علاقة مباشره بالثبات
فنجد تساوى الماذدا 3 والسيفيك والكورولا (تقريبا فى الثبات) والاميريزا هى المتفوقه عنهم جميعا فى الثبات وده شىء منطقى لانها دفع رباعى وده يوضح ان الكورولا ثابته مش زى ما ناس مسره على ان الكورولا حتى لو تحسن ثباتها برضه هيكون مش قوى
انا اتحدى اى عربيه المانى سواء الجيتا او الاوكتافيا او الاسترا بالامبيريزا فى الثبات
اهل ضعف سحب العربيات الالمانى امام اليابانى له حجه ؟
الكورولا واخده 5 نجوم فى اختبارات التصادم الاوربيه ايرونساب علشان الناس اللى بتقول صاج الالمانى اقوى انا نفسى اعرف ايه اهميه اصلا قوة الصاج فى التصادم
انا تعليقى الوحيد على الفيكترا هى الوحيده اللى فئه اعلى من الجيتا والاوكتافيا والكورولا لاناه بالخارج فعلا موجوده فى فئه اعلى ومواتير اقوى وعلى فكره الكورولا فى منها 2400 سى سى نفس الحجم والشكل الحالى لكورولا
حاجه اخيره احب اضيفها اهل عزل ونعومه وراحه الالمانى زى اليابانى
تحياتى

[casper1500]

في حاجة مهمة نسيت تقولها و هى جودة الخامات و العمر الافتراضي للعربية الاوربي عموما احسن من اليابانى , و الياباني افضل من الكوري ..
حاجة تانية عايز اقولها لما يبقى في عربية اوربي و عربية اسيوي بنفس السعر يبقى الاسيوي فيها اوبشنز اعلى و فئة اعلى من حيث الامكانيات ... فاهم قصدي
لان الاوربي الماركة و العراقة بيدفع فيها فلوس في حد ذاتها
يعني مثلا لو جيت تقارن السوناتا (هيونداي) بالفئة التالتة , هما الاتنين 2000 سي سي لكن الفئة التالتة اغلى بفرق كبير (لان البي ام خامات و عمر اكبر و الزمن مش بيبهدل فيها بسرعة)
و مش عايز اقولك ان ممكن السوناتا سحبها يكون افضل و متستغربش لان الفكرة انها اخف و موتورها قول نفس القوة او حتى اقل بس الوزن بيلعب دور
مثل تانى
الجراند بونتو 1400 اوتوماتيك (عربية اوروبي) سعرها 100 الف
اللانسر 1600 ممكن تعدي الـ 100 بس مش بكتير لكن اللانسر المفروض انها فئة اكبر في الموتور و الحجم , تقدر تقولى ليه سعرهم متقارب
مثل كمان
لية الالنترا (كوري) بنفس تمن اليارس (يابانى) مع ان دي 1600 و دي 1300 و انا اجزم ان الالنترا افضل كركوبة و كسعر و كمساحة .. بس اكيد اليارس افضل في العراقة و العمر و ...

[casper1500]

فانت تحدد لو انت من النوع اللي بيحب عربيته و ممكن يسيبها معاه 15 سنة مثلا يبقى المانى مفيش كلام , لو بتقلب بسرعة ممكن تجيب عربية يباني افضل (كركوب فقط) بنفس السعر

[horas3000]

بص حضرتك الموضوع ليه ابعاد كتيرة
اولا: تاريخيا معروف عن العربيات الياباني انها عملية و اقتصادية بينما الالماني معروف عنة الهندسة العالية و التكنولوجيا و الفخامة وده فعلا كان هدفهم حتي وقت قريب و طبعا الفكرة اترسخت عند الناس و بقي معروف ان الالماني احسن و الدليل علي كدة ان المصنعين اليابانين لما حبو يدخلوا فئة العربيات الفخمة عملوا ماركات جديدة زي اللكزس و الانفينتي و الايكورا عشان السمعة دي متلزقش و تاثر عليهم

ثانيا: عن تجربة دايما العربيات الالماني تديك شعور انها اقيم و افخم من العربيات الياباني حتي لو في نفس الفئة و علي الطريق دايما الواحد يحس ان الالماني تقيل و ماسك نفسه و ده مش صدفة ده شيئ مقصود عشان يبرروا فرق السعر عشان كدة بيختاروا المكونات بعناية فائقة و بيميزوا نفسهم حتي في ابسط الحاجات. روح شوف البلاستك المستخدم في الالماني و اللي في الياباني هتلاقي فيه فرق و طبعا في حاجات تانية كتير بتساهم في انها تديك الشعور ده عندك مثلا المرسيدس ال C الجديدة تعرف انهم عاملين ان كل الزراير اللي في العربية تتحرك لمسافة 20 ملي بس مش اكتر و لا اقل .... شوفت بيفكروا ازاي و طبعا لك ان تتخيل شعورك و انت بتستخدم الزراير دي اكيد هتحس انها احسن و خد علي المثال ده كتير و دي اللي يبخلي الناس تفضل الالماني و يقولوا ان تقفيلها احسن

ثالثا: احنا نفسنا. معظمنا اذا مكنش كلنا عندنا اعتقاد ان طالما الحاجة اغلي بتقي احسن. و بما ان البني ادم ميملاش عينة الا التراب فتلاقي الكل بيتبتر علي العربية اللي معاة و عايز يركب مرسيدس و لا بي ام و ده عامل عقدة لناس كتير مخلياهم يحسو ان العربيات ده من الفضاء و ده برضه مساهم في رفع اسهم الالماني ادام الياباني

في الاخر اتمني وجهة نظري تكون وصلت