ما هى أفضل سيارة فى حدود 100 الف

[احمد عزت]

انا نويت اشترى عربية من 3 شهور ولحد دلوقتى مش عارف اشترى ومكتفى بالفرجة على السوق المصرى العجيب قبل كدة قبل ما يبقى معايا فلوس كانت العربيات كتير ....دلوقتى الحمد لله ربنا كارمنى ومعايا تحويشة كويسة على جمعية عاملها على مساعدة من ابويا على قرض من بنك مراتى......وعلى فكرة انا سنى مش كبير انا عندى 34 سنة المهم علشان انا مطولش عليكم...انا بدور على عربية
شكلها حلو
توكيلها محترم حتى ولو غالى شوية
تكفى 5 اشخاص كويس
هاتش باك او سيدان مش هتفرق
وتكون عملية وتعيش لانى الصراحة ناوى اهلكها انا ساكن فى الشيخ زايد وشغلى فى العباسية وغالبا كل يوم العربية هتمشى المشوار دة كل يوم....وطبعا المدام هتستعملها كمان باليل
وانا الصراحة مش من هواة التغير
ومعايا الحمد لله لحد 100
انا عارف ان المبلغ مش بطال ومحترم بس والله لما تفكر فية وتفكر فى اسعار السوق بتاعتنا تلاقيك مش عارف تجيب اة.......ارجوكم ساعدونى يا اهل الخبرة....
المبلغ طبعا ممكن يتزق كمان 10 الف لو العربية تستاهل

[fahd_628]

بص حضرتك من راى انك تشوف يا اما ميتسوبيشى لانسر 1600 يا اما الانترا أو لو عاوز حاجة توكيلها محترم و واسعة و تستحمل و فيها 2Airbag و فرامل ABS و تكفى 5 اشخاص و عالية فى المطبات و عفشتها ناعمة و موتورها جميل و ناعم و موفرة فى البنزين و يابانى بس فى المقابل ثبات مش زى الانسر بس معقول و اكيد السحب اقل شوية من الانسر و اقل من الانترا بس ممتاز بالنسبة ل 1300 و الشكل اختلف فية الناس و دية مسألة ازواق

حضرتك ممكن تجيبها فل اوبشن اوتوماتيك ب حوالى 97 الف

طبعا الألنترا ممتازة و فيها كل الى طالبة بس توكيلها غبور :D :D

و الانسر ممتازة برضة و قطع غيار متوفرة برة التوكيل و كل الناس بتفهم فيها بس مش بحسها ناعمة و مريحة زى الياريس

انا حضرتك اتكلمت على الياريس عن تجربة

الانسر برضة و لكن كانت 1300 سى سى مش 1600

الألنترا عمرى ما ركبتها بس كل ملاكها بيشكرو فيها بس بيشتكو من غبور

حضرتك كل دول فى حدود ال 100 الف ما عدا الانسر ب حوالى 105 الف اوتوماتيك ولاكن المانيوال بحوالى 100 الف و كلهم اوتوماتيك و حينزلو حوالى 5-7 الاف لو مانيوال و مش حتضطر تزق ال 10 الاف الا ازا كنت عاوز الألنترا بتكييف الكترونى و حاجات تانية مش فاكر اية زيداة أو الانسر سبور لكن الياريس اعلى حاجة فيها 97 الف

[Anti_virus_abdo]

كورولا 1300
دي عربيه تناسب كل متتلباطك من
عربيه واسعه
تتحمل طبعا كل الظرووف و البهدله (تويوتاااااا )
بس انصحك تستني شويه عشان الشكل الجديد بتاع 2008 صحيح هو مش تقفيل ياباني بس بأشراف تيوتا طبعا
و ممكن تشوف برضه النترا 2007 عربيه جميله برضه و فيها كل الامكانيات الي فاتت بس المشكله في توكيلها
و عندك يرضه الهوندا سيتي 1600 عربيه ممتازه بس معرفش بينزل منها 2008 و لا لأ

[fahd_628]

كورولا 1300
دي عربيه تناسب كل متتلباطك من
عربيه واسعه
تتحمل طبعا كل الظرووف و البهدله (تويوتاااااا )

انا معاك بس اسعارها غليت مرة واحدة علشان اخر انتاج يابانى و مش عارف سمعت فين ان كلها محجوزة ( مش متأكد من المعلومة دية ) و حسب اسعار النت تكييف و باور ب 105 اما الفل اوبشن مانيوال ب حوالى 112 الف و الأوتوماتيك ب 120 الف

علشان كدة قولتلك ياريس

[Sharky]

رأى الشخصى تويوتا ياريس
فيها كل اللى إنت طالبه عربية محترمة من توكيل محترم جدا
واسعة و تكفى 5 أشخاص وسيارة سيدان
فيها كل الكماليات اللى إنت محتاجة من تكيف و باور و سنترلوك و زجاج كهرباء + عوامل الامان فيها حلوة يعنى فيها ABS+EBD+2 Airbags و إتوماتيك و مفتاح ريموت إيمبوليزر
عربية تستحمل معاك و سعرها فى الرينج بتاعك

[Heshaam]

على حسب خبرتي المحدودة ممكن أنصح حضرتك بالبروتون واجا (أتوماتيك فول أوبشن كاسرة الميت ألف بشوية) أو الدايهاتسو ماتيريا (أعتقد في نفس الحدود بس مش متأكد أوي)

في رأيي العربيتين محترمين جدا من حيث الامكانيات والسعر والتوكيل (البعض أحيانا بيشتكي من عز العرب بس مشاكله مقدور عليها - بناءا على تجربتي - وهو قريب منك عالصحراوي) وابتدوا يعملولهم سوق.

وربنا يوقفك للي فيه الخير

[أبو عبدالله]

في السيدان حاليا يبقى الياريس
في الهاتشباك السويفت الجديده تحفه والله وواسعه جدا او الماتيريا وبعد كده السيريون لو هيفرق معاك استهلاك البنزين علشان مشوارك هيا هتفرق معاك في الأستهلاك يعني بتعمل 350 ك في الصفيحة وهيا اتوماتيك
وقطع الغيار كلهم تعتبر سعر واحد تقريبا واسعارهم كويسه والتوكيلات محترمة برضه الا انا معرفشي بتاع سوزوكي عامل ازاي

[kareem_Ashmawy]

و النيسان صنى super saloon

[Adham]

أصبر لغاية اول السنة

فية كلام ان الجمارك حاتنزل عالسيارات شوية

و بالتالي اسعار المستعمل برضة حاتنزل

لو تقدر تصبر الثلاث شهور دول يبقى افضل

[Adham]

لو مش عاوز تصبر

فكر في البروتون جين-2 للهاتش الشبابي

و حاتوفر شوية فلوس لان سعرها في حدود 83 الف

و لو عاوز سيدان خد اللانسر 1300 مانيوال, و لو عاوز اوتوماتيك يبقى هاتها 1600 و أوعى تجيب ال1300 الاوتوماتيك, بتاتاً

وربنا يوفقك

[hazem_khidr]

كورولا و بس

[modux]

لانسر 1600 و بس