اوبترا ولا ماتريكس؟

[Adham]

هاهاهااهههههههه

فعلا الناس كلها قامت على الماتريكس انا كنت خايف تتحاملوا على رأيي لأني اول واحد علق عليها انها عربية سخيفة

عجبني قوي تعليق الأستاذ محمد ممدوح وانا برضة مؤيد لكل كلامة انها عربية اي كلام من كلة منظرها ميكروباص و مش محصلة ميني فان و لا ملاكي و لا دياولو و ان قعدتها زبالة انا فعلا سقتها بس باطلعها من ركنة كنت حاسس اني قاعد في ميكروباص
ودلوقتي كمان الأخ اللي عندة واحدة زود ان عفشتها بتدب و ان الباور بتاعها تقيل وان ثباتها وحش عالطريق و ان شنطتها غير انها ضيقة كمان بتعمل دوشة من رجرجة الحاجات اللي فيها في كابينة السيارة وان سواقتها مش ممتعه

السؤال بقى عربية زبالة زي دي عملت مبيعات خرافية كدة لية؟؟؟؟؟؟؟؟

مش فارسني إلا اللي بيركبوا فيها دفندرات حديد في الوش و الضهر و عتب زي الشيروكي مع انها عربية صاجها تعبان و تثبيت الحاجات دي فيها حايحمي فوانيسها صحيح في حالة اي اصطدام خفيف لكن لو خبطة جامدة الدفندرات دي حاتخللي الخبطة كلها مركزة في شاسية السيارة اللي متثبتة فية و حاتتسبب في قطع علب الشاسية اللي هيه ورق اصلا ماهياش صلب زي العربيات ال 4*4 اللي اصلا الدفندرات معمولة علشان شاسيهاتها

أستاذ ممدوح بس تعليق صغير ان الأتوس أول ما نزلت مكانش اسمها مكوة, كنا مسميينها قفا ايوة "قفا" لأنها فعلا شكلها قفا ههههههه

[Adham]

Air Karam


اللي انا متغرب لو ان حضرتك بتقول ان الأوبترا "دهان المصنع يخدش من اقل لمسة - الصاج الخارجى ضعيف " لأن الكلام دة لو حضرتم بتقارنها بعربية متينة قوي مش بهونجاي ماتريكس اللي بلا شك صاجها اضعف بكتير من الأوبترا
صعب قوي اننا نقول ان عربية شيفرولية صاجها ضعيف و هي بتتقارن بهيونداي

اللي انا سمعتة من ناس راكبة أوبترا ان صاجها ناشف و انها متينة

و حكاية ان الدهان بيتجرح من اقل لمسة دي برضة غريبة شوية لأن دهان الفابرقة الألكتروستاتيك واحد في العربيات الجديدة و مش سهل انة يتشال من عالبودي

[الريس]

مش عارف اشكر االشباب اللي قالو على العربية زبالة مع ان في زمايلهم هنا (و انا منهم ) راكبينها
و لا اشكر اللي بيشتم في ذوق الناس دي كلها اللي راكبة العربية
و لا ما اردش احسن

نصيحة لوجه الله
ما نزع الرفق من شيء الا شانه ... او كما قال رسول الله صلى الله عليه و سلم

انا مع معارض تركيب الدفندرز (اسمهم كده مش دفندرات) لان العربية مش معده لكده
بس انا بمنتهي الادب باقول اني بعد تجربة كل اللي في السوق معجبنيش غيرها
عربية بلا اعطال تقريبا
عالية عن الارض جدا
و ثابتة
و واسعة كصالون اكتر من غيرها

اما عيوبها
ضيق الشنطة (يعوضه ارتفاعها) زائد ان الكنبه الخلفيه (مش ظهرها بس) كلها بتطلع لفدام 22 سم لو حابب تزود المساحة
انا شلت فيها غسالة فول اوتوماتيك بالكرتونة و الله

عيب تاني صوت العفشة ناشف (بصراحة مش فارق معايا اوي)

عيب كمان (صوت الموتور عالي) و برضو مش فارق معايا انا

ابعادها ممتازة بالنسبة ليا ... و سواقتها تجربة ممتعة ... و دي وجهات نظر

عاوزكم بقى تقارنو الغلبانة دي و شكلها بالعربيات المماثلة و شكلها (ماتريا و باندا و رومستر و غيرهم)
انا باشوفها احلاهم .. و ده رايي المتواضع
و راي 20000 واحد زيي (العهدة على مسئول الصيانة في قليوب ... مش فاكر اسمه اوي)

و اسف للاطالة

[dreslam]

مانا شلت فيها مكتب وكام صندوق وسجادتين وواحده من اللي شغالين معايا في العياده
وعزلت بيها كمان ووفرت خمسين جنيه نص نقل
لكن كده احنا بنرد على نفسنا
وانا جايب العربيه عشان كده؟؟؟؟ وعشان كده قلت في نصيحتي "مشاوير ونقل بضاعه وعزال كل يوم واربع انفار ورا ده غير اللي قدام يبقى ماتريكس"
مانا اكتشفت ان العربيه للسواقه مع المتعه ...ولما ركبت الصني "اللي البعض قال ان عفشتها ناشفه " وال ايه كراسيهاا ضيقه ضهري بقه كويس الحمد لله وحسيت اني بسوق بمتعه وحسيت ببعض الفخامه ولفيت الباور بايد واحده من غير عضلات:)
الاوبترا تقريبا نفس استخدام الصني بس دي مسأله اذواق وارتياح نفسي وثقه في المنتج .برضه شوف حضرتك عايز ايه واسأل نفسك ميت مره عايز ايه "ليه"؟

[Ahmed Anwer]

مش عارف اشكر االشباب اللي قالو على العربية زبالة مع ان في زمايلهم هنا (و انا منهم ) راكبينها
و لا اشكر اللي بيشتم في ذوق الناس دي كلها اللي راكبة العربية
و لا ما اردش احسن

حضرتك ليه واخد الموضوع بحساسية زيادة
لولا إختلاف الأذواق لبارت البضائع
يعني لو حد بيقول رأي سلبي في عربية معينة ده رأيه هوه
و أكيد حضرتك إختيارك و حكمك علي الأمور صواب برده ، أدام مريحاك

[الريس]

انقد و كل حاجة
بس مش شايف ان زبالة دي كلمة صعبة
و اللي يزعل منها يبقى واخد الموضوع بحساسية
يمكن
الله اعلم

[Ahmed Anwer]

يا باشا شوف ايه بيكتبوا علي الفيرنا مثلآ
كل العبر اللي في الدنيا
بس دي أرائهم هما حريين فيها
و عربيتي ، اللي يهمني رأيي أنا شخصيا فيها
و في الآخر هما شوية صاج وفيبر هتركبهم كام سنة ، مش مستاهلة تزعل نفسك عشانهم

و عموما حقك عليا أنا شخصيا بالنيابة عن كل الأعضاء ، :D :D :D :D :D

[Air Karam]

و انفجر البركان الخامد منذ سنين!!!
اولا يا جماعة انا بشكركم كلكم على الرد و احترم جميع وجهات النظر.
بس بصراحة انا اول مرة اسمع النقد اللازع ده على الماتريكس و كأن الاخوة مستنين يقولوا الرأى ده من زمان بس مكانش فى فرصة.
انا معاكم ان شكل الماتريكس مش ولابد بس اعتقد ان شنطتها واسعة على عكس ما بيقول الاخوة.
لكن انتوا خلتونى اعيد النظر مرة اخرى فى الماتريكس.
بالنسبة لدهان المصنع بتاع الاوبترا انا لما ببص عليها فى الشارع بلاقى اغلب العربيات متجرحة والدهان متشال منها.
و حكاية الصاج الخفيف بتاعها ديه عن تجربة احد الاصدقاء اللى كان بيقولى لو قطة قعدت على العربية من قدام هتطبقها.
على العموم انا بعد كلامكم ابتديت اميل للاوبترا حبتين.
و ربنا يوفقنى الى ما فيه الخير.
وجزاكم الله خيرا.

[sebai]

انا الحقيقة مستغرب من الهجوم الشنيع على الماتركس مش عارف لية :!: :!: :?: انا ماشفتش الهجوم بالسخونة دى من ايام ظهور اسبرانزا ....
انا هاخذ الراى الاخر اللى هو ( مؤيد )

اولا :
شكل العربية حلو او وحش دى اذواق فى ناس شايفاها حلوة و فى ناس العكس

ثانيا :
طابلوة الماتركس جيد جدا و شكلة ممتاز و يختلف عن باقى طابلوهات العربيات المعتادة
كل طابلوهات العربيات غير الماتريكس ما فيش حاجة بتميز ...كل الطابلوهات واحد ماتعرفش نوع العربية ايية غير لما تشوف العلامة الخاصة بالعربية.

ثالثا :
الصاج مش قوى ... بس من الواضح ان دة ينطبق على معظم العربيات الحديثة ...لتخفيف وزن العربية و زيادة سرعتها مع الجرى و يمكن حجات ثانية بردة .

رابعا :
بالنسبة لثبات العربية انا فعلا مستغرب من تجربة زميلنا بالمنتدى اللى كان بيشد مع ماتريكس و مرة وحدة العربية عومت من السواق و هو داخل على ملف
فوضع رأية السريع ان( كدة العربية مش ثابتة ) :!:
من الواضح ان حضرتك ماركبتش العربية من اصلو :?: :!:
---انا عن تجربة اخذت بها ملف على اكثر من 100 و ماكنتش متوقع مدى ثباتها الاكثر من ممتاز .
و ياريت احد من الاخوة اللى عندهم الماتركس او حتى ركبوها ممكن يفيدونا عن تجربنهم فى ثباتها

خامسا :

ا - الديفندر اللى بيتركب ياحضرات دة موجود لية مكان فى العربية مش بيخرموا فى الشاسية
2- الماتريكس الفول ابشن اللى برة مش اللى عندنا هنا فى مصر تكييف و كاست لا قصدى الماتركس اللى بر ة اللى( بفتحة سقف و اسبويلر و ديفندر و كاسيت و abs) ماحدش شفها قبل كدة فيييييهااااااا ديفندر يعنى نزلة من المصنع فيها ديفندر مش يعنى زاى ما قال الزملاء ان العربية مش مصممة لتركيب الديفندر .
3- الديفندر يا جماعة مش بيحمى العربية من الخبطاط القوية (ماحدش قال كدة ) انا مركبة لحماية العربية من الخبطات الخفيفة و من الاخوة اللى لسة مابيعرفوش يركنوا و من السيسة اللى بيهرو العربيات خبط فى بعضها .

سادسا :
الكراسى هى اوحش حاجة فى العربية ناشفة جدا جدا بس بتخف شوية بعد تركيب الفرش ( بس بردة ناشفة )

سابعا :
الشنطة مش كبيرة ولا صغيرة بس ممكن توسعها من خلال تضيق الصالون و توسيع الشنطة بتحريك الكراسى للامام .
و على فكرة انا جايب ناس من المطار من حوالى شهر و العربية فيها 2 شنطة كبيرة من الاحجام المحترمة + شخصين بالكنبة + كرسى اطفال غيرى طبعا و المدام .

***يا جماعة ياريت الواحد لما يتكلم يتكلم على تجربة دقيقة مش هييييييية هجوووووم و السلام ***
اسف على الاطالة و شكرا

[TAG_Turbo0]

انا برضة بأول الاوبترا
وكفاية ان توكيلها محترم جدا

[AdrianO]

والله يا جماعة بغض النظر عن ان الماتريكس حلوة ولا وحشة .. انا مشوفتش عربية بجمال الاوبترا فى حدود سعرها او يمكن لغاية 100 الف جنيه ..
عزل صوتى رائع و ثبات غير عادى ( من العادى انك تمشى 170 او 180 ) .. عفشة جميلة
ممكن نقول ان الاوتوماتيك مش كويسة بس ده مش عشان الاوبترا لا .. ده عشان اوتوماتيك الكورى ملوش امان ..

اما بخصوص الماتريكس انا سافرت بيها مرة .. انا عن نفسى احب اركب عربية انا اللى اتحكم فيها مش هى اللى تتحكم فيا .. و ده اللى بقوله الماتريكس تحكمك فى السرعة و الطرق .. الا اذا كان اللى هيركبها عنده طولة بال على الطريق .. من الاخر عربية ضعيفة .
أما الشكل طبعا دى اذواق .. لكن انا مبحبش شكلها اطلاقا و كان فى واحد بيتكلم على التابلوه .. طبعا التابلوه مش ظريف خالص و حتة انه فى النص دى حاجة غبية اوى ..

عموما ده راى الشخصى

[Adham]

أستاذ سباعي

انا ماقلتش انهم بيخرموا في الشاسية

لكن كلنا عارفين ان الديفندرات (الديفندرز)بتتركب على الخوص بتاعة الاكصدام, و دي بالتالي متثبتة في علب الشاسية

يعني ان الخبطة مباشرة في علبة الشاسية

و حيث ان شاسية الماتريكس مش قوي للدرجة يبقى مش من الامان انك تركب فيها دفندر يسبب قطع او لوح فردة الشاسية مع اي خبطة(جامدة) يبقى انت بتجازف بشاسية عربيتك علشان تحمي فانوس و شبكة و اكصدام

بالنسبة لموضوع الثبات اللي انا اعرفة ان كل العربية ما تعلى عن الارض بيرتفع مركز ثقل السيارة و تبقى مش ثابتة في الملفات

يعني ماتقنعنيش ان ارتفاع الماتريكس مش مسبب مشكلو في الثبات
يعني انا مثلا عنجي فرونتيرا ماقجرش اخد ملفات بسرعه عالية لأني ساعتها حاجيب العربية على جنبها
بس لما باسوق الهوندا الأكورد اقدر اخد ملف على 160 (لدرجة انك تتحدف على قزاز العربية) ماقدرش اخدة بافرونتيرا على 90
وياويلي بقى لو نسيت انا سايق انهي فيهم و انا في نص الملف

فمع كل احترامي الملف اللي تاخدة بالماتريكس على 100 تاخدة بهوندا مثلا على 170 و بثبات أحسن
و يا عزيزي احنا مش بنهاجم العربية للا شيء و لا لينا مصلحه بس بننقد و دة من حق اي حد
يعني انا مثلا عندنا لانسر 1300 بانقدها دايما و باقول عليها عربية كلبة و موتورها ميت لان الموتور ضعيف قوي عالعربية و بالذات انها اوتوماتيك و مع التكييف بتبقى ولا كأنك بتجمع ب سيات او زستافا

ولو حد سألني عن رأيي في اللانسر باقولة ياتجيب 1300 مانيوال يا تجيب ال 1600 علشان كذا و كذا اللي قلتهملك لكن مش حادفن راسي في الرمل و اقول عربية 100 100 و موتورها شديد و موفرة في البنزين
لأنها بصراحه حوت بنزين و مكتومة مابتسحبش :)

[Adham]

معلش و اقولك حاجة ان انا اللي مضايقني في موضوع تركيب دفندر في ماتريكس ان كدة ان بتأذي غيرك و عربية غيرك

يعني انا شفت كتير واحدة او واحدة غشيمة مثلا تروح لابسة بماتريكس في عربية راكنة و هي بتركن تروح مبهدلاها وكاسرة فانوس او مطبقة اكصدام او صاج وبص على مناظر العربيات الماتريكس اللي سايقاها ستات و الدفندرات متطبقة
ولو لا قدر الله خبط في طفل او حد بيعدي الشارع حايسببلة اضرار جسيمة لان العربية واطية و الدفندر حايكسر عضمة

وملحوظة
ان معظم اللي بيركبوا دفندر في ماتريكس بيبقوا ستات مش بتعرف تسوق و بتركبة علشان عربياتها ماتنضرش في اي خبطان اثناء السير او الركن
تقوم تضر غيرها و هي ماتتضرش حتى لو كان العيب فيها و في سواقتها

لابد من وضع نشريع لحماية المشاة و ممتلكات الغير لكل من يقوم بتركيب تلك الحواجز المعدنية في سيارتة و يكون فية معيار و قواعد

[Adham]

وعلى فكرة انا مش مركب دفندر في الفرونتيرا برغم انة معمول لمثل السيارات في الاساس

[Ahmed Anwer]

أصحاب الماتريكس ماتزعلوش
كفاية إن الماتريكس تصميم Pininfarina مصمم فيراري و معظم الماركات الشهيرة ،
يعني عربية سينيه
شوفوا اللينك ده لقصة تصميمها

http://www.autodesignmagazine.com/articoli/es/129/matrix.htm

و ده لينك الشركة المصممة عشان تعرفوا مكانتها

http://www.pininfarina.com/