ماروتي 800 و ألتو 800

[ggggggggg]

أريد أن أعرف الفرق ما بين السيارة ماروتي 800 سي سي وسعرها حوالي 35,000 ألف جنيه
و السيارة ألتو 800 سي سي بدون كماليات والتي يصل سعرها 43,500 ألف جنيه.

السيارتان بلا أي كماليات والمساحة تقريبا متقاربة والموتور واحد من حيث السي السي.

أريد أن أعرف الفرق بين هاتين السيارتين الذي يسبب فارق السعر الذي يصل إلى 8,000 آلاف جنيه؟؟؟!!

هل نوع الموتور مختلف رغم تشابهه السي سي؟ أم ان هناك كماليات أساسية (Standard) في السيارة ألتو 800 سببت ارتفاع سعرها أم ماذا؟؟!!!

ولكم الشكر.

[Eslam.Elrefaey]

لا أعرف صراحة وأضم صوتى لك لأعرف أنا كمان

[ggggggggg]

يا أعضاء المنتدى الكرام أرجو من لديه معلومة أو رد عن هذا التساؤل افادتنا لو تكرمتم

[fatafet21]

يا أعضاء المنتدى الكرام أرجو من لديه معلومة أو رد عن هذا التساؤل افادتنا لو تكرمتم

الفروق الواضحة واللي انا شوفتها بعيني

1- الشكل الخارجى (كاوتش -صاج-فوانيس.......)
2-الشكل الداخلي طبعا فرق كبيير التابلوه وخامتها من الداخل والتقفيل فرق واضح و الدواسات والفرش وفرق القعدة علي الدريكسيون

تقدر تقول ان الالتو كشكل احسن بكتتير من الماروتي

و انا سألت في التوكيل عن فرق الموتور قال لي انهم الاثنين 800 سي سي بس الالتو تفرق بس مقالش في اية غير انها 4 سلندرو انها انجيكشن وده بيخليها عربية تانية خالص غير الماروتي

و قال لي ان دي عربية ودي عربية مفيش بينهم مقارنة

لكن في سمير ريان قال لي ان الفرق الوحيد هو الشكل والحاجات اللي انا قولتها فوق

بس في الاخر هل الفرق ده يستاهل الفلوس دي ؟؟؟؟؟؟؟؟؟

يا ريت اللي يعرف حاجة يفيدنا بيها لان الموضوع ده كان شاغلني جدا ومحتارة فيه

[fatafet21]

معلش نسيت اقولكم حاجة كمان في فرق كبيير بين قطع غيار العربيتين يعني عل سبيل امثال فانوس الماروتي 90و الالتو 570 و ده سعر توكيل والمراية مثلا 50 و الالتو متين وشوية بس مش فاكرة بالظبط وكمان قطع غيار الالتو مش عند كل الناس مش متوفرة اوي زي الماروتي
متهيألي الحاجات دي بتبقي مفيدة في المقارنة . و الله اعلم

[ggggggggg]

شكراً اخت فتافيت على الاهتمام والرد ....
ولكن هل الموتور انجيكشن ده أكيد لأنه لو أكيد يبقى فعلاً فرق يستاهل ده غير أن الألتو ناقل الحركة بتاعها 5 سرعات + الريفيرس أما الماروتي 4 سرعات +الريفيرس.
أهم حاجة هل موتور الألتو ال 800 سي سي انجيكشن؟؟؟؟؟؟

[tahayt]

ايوة يا باشا متور الالتو انجيكشن و على فكرة هوة 3 سلندر بردة لكن الباور بتاعتة اعلى من الماروتى بحوالى 5 حصان (مش متاكد من الرقم) و هذا الفرق ناتج من انة 12 صمام فى حين ان الماروتى 6 صمام

[ggggggggg]

شكراً أخي tahayt على الاهتمام والرد ولكن اخت فتافيت ذكر أن التوكيل قالها ان موتور الألتو 800 سي سي 4 سليندر مش 3 سليندر
أنا مش عارف هل موضوع عدد السيلندرات ده يفرق جامد ولو يفرق بيفرق في ايه بالظبط من ناحية اداء الموتور والعربية؟؟؟

[micromoud]

السلندر بيفرق مع التكييف وسحب العربيه واستهلاك البنزين

[M.FOUAD]

بيفرق طبعا في عمر الموتور و العزم بتاعة كانك موزع القوة على 3 سليندر بس بدل من 4
لكنة اوفر في البنزين بكثير
العربيات 3 سليندر غير مؤهلة للسفر الطويل الموتور بيفوت بسرعة

[tahayt]

عدد السلندرات فى حد ذاتة لا يؤثر فى قوة العربية و مدى استحمالها للتكييف و عمر الموتور لكن الفيصل هو الهورس باور يعنى مثلا السريون وان 3 سلندر و 70 حصان فى حين ان السبارك 4 سلندر و 60 حصان يبقى السريون اقوى ....و حتى لو عربيتين نفس ال cc والباور و عدد السلندرز ممكن ادائهم يختلف حسب وزن كل عربية و التكنولوجيا بتاعتها و كفائة اجزائها....
من الاخر لو عايزين نعرف اداء عربية معينة و عمرها الافتراضى و كفائتها احسن حاجة نشوف رأى اللى راكبها
و بالنسبة للماروتى و الالتو 800 الفاضية انا عن نفسى اخترت الماروتى اولا لانى ناوى ان شاء اللة اغيرها قريبا و ثانيا انا مش فارق معايا الفروقات بينها و بين الالتو ,لكن لو ناوى تقعد بيها فترة فرأيى يا اما تشترى ماروتى يا اما تجيب التو 800 بالتكييف لان هوة دة الفرق اللى يستاهل ,لكن لو ماقدرتش تجيب الا الماروتى فهى ان شاء اللة عربية ممتازة و مشاكلها قليلة
ملحوظة: انا لسة ما جبتش الماروتى و لكن قريبا ان شاء اللة ولكن الرأى اللى قلتة نتيجة معرفة اراء مالكيها فى المنتدى و معرفة اراء بعض المعارف عندهم العربية دى و تتجربة سواقتها عدة مرات بنفسى
نسيت اقولك بخصوص الماتور ال3 سلندر هوة بس بيفرق عن ال4 سلندر فى تواجد صوت عالى نسبيا و بعض ال vibration و لكن مش لدرجة متعبة.............. اسف للاطالة و ربنا يوفقك للاحسن

[tahayt]

نسيت اقولك ان متور الالتو ال800 3 سلندر و دة اكيد

[zalpany2000]

السلام عليكم ورحمة الله

مبدأيا باحييكم علي فتح الموضوع ده في قسم المقارنات علي الرغم من ام المقارنة دي قتلت بحثا في قسم الماروتي

انا بفضل الله معايا التو 800 full

علشان كده انا هاتكلم من واقع تجربة مش تخمين


اولا بالنسبة للموتور
اللألتو : العربية 3 سلندر ... و موتورها انجيكشن مش كربيداتير الهورس باور بتاعها 47 حصان
الماروتي: العربية 3 سلندر ... كربيداتير مش انجيكشن 37 حصان

يبقي فرق الموتور في القوة و الحداثة لصالح الالتو
في استهلاك البنزين برضو لصالح الالتو
في الصيانة و حالات الاعطال لصالح الماروتي لانها اسهل في الصيانة بسبب الكربيداتير

بالنسبة للشكل و الابعاد

الالتو : خامات افضل ... تقفيل افضل اوسع "نسبيا " من الماروتي
الماروتي: اضيق قليلا.. الشكل اقدم نسبيا

بالنسبة للاكسسوارات و الملحقات والاوبشنز

الالتو: باور ستيرينج - فيه منها ازاز كهربا ... فيها تكييف.
الماروتي : المتاح حاليا ليس به اي موصفات

-------طيب هانخرج البند ده مؤقتا علشان اخنا بنقارن الماروتي بالالتو الفاضية

قطع الغيار
الالتو ... قطع الغيار التوكيل مبالغ شوية في اسعارها
الماروتي ... باختصار زي ال 128 ورخيصة جدا جدا

السعر مقابل القيمة الفعلية

الالتو 800 فاضية VS الماروتي 800

رأي شخصي : في حالة المقارنة بين الالتو الفاضية والماروتي الفاضية يبقي فرق السعر ده مش اقتصادي بالمرة
و في الحالة دي الماروتي ال 800 تكسب.. و هي ناجهة و بتبيع لحد النهاردة علشان هي اقتصدية جدا جدا... وموجهة لفئة مش عايزة حاجه من العربية غير دريكسيون و عجل و رحمة من الميكروباصات في مصر و القرف

الالتو 800 نصف اوبشنز او كاملة
رأيي شخصي برضو: في الحالة دي تكسب الالتو خصوصا بسبب التكييف اللي فيها ... ده ميزة خطيرة جدا جدا .. وفي الحالة دي يبقي السعر مقابل الميزة دي بالاضافة الي الموتور الانجيكشن و الشكل الافضل من الماروتي صفقة ناجحة جدا جد

الالتو 1100 CC
و دي مش هانقارنها بالماروتي بس في الحالة دي احنا هاندفع مبلغ اكبر يعني اعتقد بتوصل لسعر دلوقتي يدخلنا في كاتجوري تاني من السيارات و يخلينا نقارن مع حاجات تانية في السوق ممكن تكون احسن


باختصار
لو صاحب الموضوع محتاج عربية فاضية 800 ... يبقي افضل اخيار يبقي الماروتي
لو محتاج تكييف او اوبشنز اعلي ... يبقي الالتو 800 هاف اوبشنز او فول

أأسف للاطالة
تقبلوا تحياتي

[ggggggggg]

والله يا دكتور حسام الزلباني حضرتك جبت من الآخر لأن فعلاً الموضوع ده كان محيرني وقالقني جدا ومش عارف اختار مين وهل الفرق في السعر يستحق ام لأ بس حضرتك كده نورت طريقي مع اني كان نفسي في موتور انجيكشن... هموت عليه ...... بس مافيش نصيب بقى عل قد فلوسي الحمد لله.

[zalpany2000]

استاذ gggggggggggg
بجد الماروتي عربية هايلة جدا جدا جدا
انا باحترمها للغاية.. وبعدين ان شاء الله ما تبقاش اخر عربية ... بس عالله لما تحب تجيب حاجه تانية ما تقولش مش هابيع الماروتي :)
تقبل تحياتي