يارس ولا جين 2

[kojyad]

بجد يا جماعة انا خلاص هتجنن نفسي ارسى على حل ومش عارف اعمل ايه
بعد ماكنت خلاص اقتنعت باليارس 100 100 , اتلعب في دماغي تاني بخصوص الجين2
مبأتش عارف اعمل ايه ,ياريت بجد تسعدوني مين افضل ولو انت مكاني تعمل ايه ؟
انا نفسي اقارن من حيث :
- العربية بوجه عام " وده متروكة ليك من حيث رأيك فيهما"
- الاعتمادية بالاسواق
- الموتور والعفشة
- الصلاحية في بلدنا " الشوارع بمطباتها والملفات واليوترنات الي ماتنفعش غير للعجلات
- الكماليات والتقفيل
- سعر البيع بعد الشراء
- الضمان والتوكيل " مين محترم اكتر ؟


وبجد اشكر كل واحد هيساعدني في المقارنة ده .

[ahmad--ezzat]

اليارس تكسب فى كل الحجات اللى قلتها...ولكنها...اقل ثبات من الجين ..اقل كماليات...

وخلى بالك اليارس موتور 1300 جبار

[kojyad]

ياباشا والله انت اختصرت اوي عليا وانا نفسي اشبع بكلامك الجميل ياريت
لو تتكرم علينا وتقولنا بعض الملاحظات عن الاتنين , ولا انت بتتكلم عشان ده ياباني وده ماليزي؟
انا عارف ان اليارس تحفة مافيش كلام بس عندك مثلا " صغر حجم الحوض " مش ده ممكن يضر العربية والموتور اوي
في اي خبطة لاقدر الله ؟ ويضر السائق كمان
معلش انا مفهمش اوي في العربيات بس هل فرق العشرة الاف ده تستحق اني اضحي بالجين2 وكل الكماليات في سبيل اني احصل على اليارس؟
يعني انا ممكن ادفع عشرة زيادة واجيب اليارس بس تكون تستحق اكتر من الجين2

[M.ABDEEN]

جين 2 موتور 1600 سي سي و 110 حصان وثابتة وواسعة وشكل رياضي بصرف النظر عن عيوب التقفيل اللي بقت تتعالج وكمان كراسي وعدادات شيك ورياضية

[Ahmed.Ali]

انا عن نفسي شايف ان اليارس سعرها اكبر من قيمتها و حجزت الجين 2

[kojyad]

طب ياجماعة وبعدين واحد يقول يارس يجي التاني يقول جين2
وبعدين ايه اخبار الصيانة في الاتنين انا سمعت ان عز العرب مسميينه زل العرب هل ده صحيح؟
يعني الخدمة فيه اخبارها ايه؟
طبعا مع العلم اني مقدرش اتكلم على توكيل اوصيانة تويوتا ايجيبت , لأني بصراحة اعرف مدى احترامهم الشديد لعملائهم .

[SAMEH_FOUAD]

بعيدا عن سوء معاملة توكيل الجين 2 ,بس الجين 2 افضل ,اتزان وقوة ماتور افضل واوسع مع ان بردة الجين 2 ضيقة من ورا ,والخامات تقريبا واحدة بس اليارس تتفوق فى التقفيل ,
الاستهلاك اليارس افضل 1300
تحمل اليارس افضل نسبيا ودة بردة هايعتمد على نوعية وطريقة سواقتك

[kojyad]

الف شكر يا سمسم باشا انا عن نفسي عشان تكون في الصورة مليش في الجري اوي بس بحب اكون راكب عربية مضمووووووونة
يعني مستعد ادفع بس يبقى في راحة بال بعد كدة ومصاريف متكونش كتيرة خصوصا في الصيانات .
ها ايه رأيكم يا جماعة لو ده طلباتي يبقى اليارس ولا الجين 2 ؟

[tutankhamoun]

- العربية بوجه عام " وده متروكة ليك من حيث رأيك فيهما" ...... دي حسب كل فرد ... شوف أنت عايز أيه من العربية ؟؟؟
- الاعتمادية بالاسواق ....... يعني أعتمادية بالأسواق ؟؟؟؟؟؟؟؟؟؟ لو قصدك قلة أعطال ........ الأثنين مفيهومش مشاكل بتوقف العربية
- الموتور والعفشة ........ الجين 2 موتور أقوى ........... عفشة أنشف علشان الثبات و العكس مع الياريس
موتور الجين 2 قوته 110 حصان و الياريس 84 حصان ............. العفشة في الياريس أنعم ... و بالتالي أريح في المطبات الرزلة أو الأماكن المكسرة .
- الصلاحية في بلدنا " الشوارع بمطباتها والملفات واليوترنات الي ماتنفعش غير للعجلات ........... برضه حسب السواق و طريقة سواقته
- الكماليات والتقفيل ........ الياريس في نقطة الكماليات دي تخرج برة المنافسة ....... و التقفيل فيها أفضل قليلا .
- سعر البيع بعد الشراء ...... تقصد سعر اعادة البيع ؟؟؟ ........ أعتقد الفرق بسيط لصالح الياريس ......بس سعر اعاة البيع للجين 2 كويس جدا و بيرتفع من سنة للتانية و العربية مطلوبة دلوقتي أكتر من زمان .
- الضمان والتوكيل " مين محترم اكتر ؟ ...... توكيل تويوتا ممتاز في خدمات ما بعد البيع و توكيل عز العرب كويس ..... مش وحش ... هو زحمة شوية ...... بس في توسعات بتحصل فيه و بيتم اضافة مركز جديد بجانب القرية الذكية هايكون اضافة للمركز اللي موجود حاليا

بُص .....
لو عايز عربية مُدن ....... و توفير بنزين ......... الياريس ممتازة في النقطة دي

لو عايز عربية ثابتة و أحسن في السفر و أقوى و كماليات كتيرة و ثمنها فيها ...... الجين 2 هاتكون أحسن .

أنا بصراحة مستغلي ثمن الياريس جدا جدا جدا جدا ....... حرام العربية تبدأ بثمانيات و تنتهي ب 105 ألف ....... و كمان كماليتها أقل .
لو بتحب موضوع ياباني و الكلام ده ....... عندك الدايهاتسو سيريون ....... 1300 برضه و لكن ثمنها معقول عن الياريس و الأثنين نفس الشركة ...... و تويوتا و دايهاتسو ....... شركة واحدة .... تويوتا بتملك دايهاتسو .

بالمناسبة موتور الياريس مش جبار و لا حاجة ......... هو الموتور بيجر هيكل خفيف ....... و بالتالي باين أدائه بالاضافة طبعا ان الموتور ناعم .... و دي ميزة من مميزات تويوتا ..... إنما الموتور 84 حصان ...

[merosss]

الف شكر يا سمسم باشا انا عن نفسي عشان تكون في الصورة مليش في الجري اوي بس بحب اكون راكب عربية مضمووووووونة 2 ؟

كدة يبقى حضرتك الياريس انسب يعنى فى ناس ممكن يكرة العربية واليوم الى اشتراها فية لو زرار علق او كوتش بتاع باب مش ملزوق كويس او اى عيب بسيط والعيوب دى احتمال تواجدها فى الجين 2 اكتر من الياريس . مع ان الجين 2 ليها مميزات بردة شكل احسن كماليات اكتر ثبات احسن وبالنسبة لفرق الموتور 1300 فى الياريس خطير جدا . وبردة حضرتك الوحيد الى عارف احتيجاتك اية من العربية ولازم تضحى بحاجة على حساب حاجة .

[kojyad]

والله يارجاله انا مشعارف اشكركم اذاي بجد الف شكر على الردود الجميلة الي كلها حكمة
انا فعلا لازم اقرر الي انا محتجله بالضبط وهستخير ربنا ويقدم الي فيه الخير
عموما انا برده مستني باقي الردود من ملاك اليارس والبروتون هما برده هيفيدونا اكتر.

[M.Abdelshafi]

اليارس مميزاتها عن الجين2 توفير البنزين و مفيش عيوب تقفيل تقريبا
غير كده الجين 2 أحسن فى كل حاجه
شكل و سعر و كماليات غيركده عيوب التقفيل مش زى ما الناس فاكره
كلها حجات بسيطه لو كانت موجوده و بتتحل علطول فى أى مركز خدمه

[elshaba7ana]

الموتور جين 2 وبفرق ضعيف مش كبير ولاحاجة
الثبات جين 2 بس الياريس برضو ثابتة بس اقل من الجين2
استهلاك البنزين الياريس استهلاكها فوق الممتاز بالاضافة الا انو طبعا احسن من الجين 2
التقفيل الياريس طبعا بس ده مش عيب في الجين2 يعني (حاجة لاتذكر)
اعاده البيع بنتكلم في تويوتا فالموضوع محسوم
الشكل ازواق طبعا
الاعتمادية طبعا تويوتا
بعيد عن السامعين انا واحد قريبي عمل حادثة بالياريس بتاعته خبط في عربية لادا من الجنب على سرعة 90 بعد مفرمل من 140 تقريبا ومحصلوش غير كدمات بسيطة جدا جدا بفضل ربنا ثم الاير باج والعربية محصلهاش هلاك خطير رغم كل ده
الفوانيس سليمة تماما بس الاكصدام والكبوت اطبقو ومش اوي والموتور سليم والرادياتير نفسو سليم بس وقع من مكانو يعني مفهوش غير لحم صغير (السيفتي بتاع الياريس ممتاز)
رايي النهائي
لو نتا شاب وعايز جلري وغرز الياريس كويسة وتقضي كل ده بس تجيب الجين2 طبعا
لو حضرتك عايز عربية مريحة واستعمال معقول وفيه برضو شيء من القوة هات ياريس منغير اي تفكير

[elshaba7ana]

بالنسبة بقة لموضوع الموتور
اه الجين2 110 حصان
والياريس 84 حصان
بس الفرق صغير جدا عشان هيا مبتتقاسش كده بس
لان في حاجة اسمها العزم او التورك بتاع التجميع او التسارع والمواتير الياباني عموما متفوقة جدا جدا في موضوع التورك ده وبالذات التويوتا
يعني فرق الموتور بينهم مش هيبان غير بعد ال120 ومش اوي كمان
وهيبان اوي بعد ال170
غير كده الياريس بتدي تورك عالي جدا على 1300 (يعني هتاخد تورك 1600 لغاية 120 تقريبا) ومش اي 1600 كمان
يعني فرق توفير البنزين بالنسبة للقوة لصالح الياريس جدا جدا (فرق الاستهلاك للبنزين المفروض يدي فرق اكبر من كده في القوة لصالح الجين 2 وده مش موجود)

[M.ABDEEN]

[/color][/color]



أنا بصراحة مستغلي ثمن الياريس جدا جدا جدا جدا ....... حرام العربية تبدأ بثمانيات و تنتهي ب 105 ألف ....... و كمان كماليتها أقل .
لو بتحب موضوع ياباني و الكلام ده ....... عندك الدايهاتسو سيريون ....... 1300 برضه و لكن ثمنها معقول عن الياريس و الأثنين نفس الشركة ...... و تويوتا و دايهاتسو ....... شركة واحدة .... تويوتا بتملك دايهاتسو .

بالمناسبة موتور الياريس مش جبار و لا حاجة ......... هو الموتور بيجر هيكل خفيف ....... و بالتالي باين أدائه بالاضافة طبعا ان الموتور ناعم .... و دي ميزة من مميزات تويوتا ..... إنما الموتور 84 حصان ...

انا مع حضرتك سعرها غالي جدا جدا وكل ده علشان تويوتا بس مش للدرجة دي وبعدين موتورها 84 حصان ولا 92 حصان زي ما بيكتبوا !!!!!!!!!!!!!!!!!!!!!