الكورولا و البرافو ؟؟

[kareemhisham]

عامة ياريت نخلى الموضوع شغال عشان يبقى افادة للجميع !!

[Sharky]

انا فعلا ما جربتش البرافو يا شاركى بس ده ما يمنعش ان البرافو مستحيل تكون انعم من الكورولا
لان العربيات الايطالى عموما معروفه بنشوفيه العفشه لصالح الثبات والاداء الرياضى

يعنى معنى ذلك يا أحمد ان البرافو اكثر رياضية و ثباتا عن الكرولا ؟

[أبو عبدالله]

والله ثم والله
لو قعدنا نأذن من هنا للصبح
السوق هيفضل هو السوق
الكورولا هيا الكورولا
مش تمجيد ولا كلام قديم ولا كلام مش عارف ايه
الحمد لله انا لا اغلق عيني واذني للواقع واتكلم
وانما الواقع الحالي بيقول ان الكورولا برضه هيا الكورولا
واللي بيقول الجديده مش زي القديمه احب افكره ان الكوررولا القديمه سنة 2001 لما نزلت مكنش حد راضي يشتريها وكان الناس متخوفه ومستعجبه التغيير في الشكل وحاجات كتير
شوف دلوقتي بيتطلب فيها كام
حتى العيون اللي مالهاش سوق بيتطلب في اسعار اكتر من عربيات يقال عليها اوروبي موديل 2000 وانت طالع
ومع ذلك الكرولا العيون اللي مالهاش سوق اساسا بيدفع فيها اكتر مع فارق الموديل
وايضا الكورولا الجديده بقالها دلوقتي سنتين ومتهيألي مش معقوله بعد سنتين هنكتشف عيب فيها جديد لم يظهر خلال السنتين خصوصا ان اجوائنا جميله جدا من حيث شوارع وتراب ومطبات وكوارث طبيعيه وغير طبيعيه
يعني من الاخر مش معقوله نلاقي العربيه دلوقتي بدأ يتقال عليه كلام في مشكلة معينه
مفيش عربيه طلع عليها كلام بعد ما عدى عليها سنتين في السوق
ده احنا احلى شعب ينقل الكلام ويتكلم

يا أخواني والله بجد انا بستغرب على الكلام اللي بيتقال
لو اختلفنا في الف نقطه لصالح البرافو مثلا صدقني هيبقى امامها الفين نقطه للكورولا
المهم في النهاية صاحب الموضوع ميال لأيه
الناس عرضت وجهة نظرها
واي واحد بيشوف ايه المناسب له
ما انا ممكن اشتري عربيه سعر اعادة البيع بتاعتها صفر بس علشان عجباني
غيري ميقدرشي يعمل كده ولازم يشتري عربيه لها سوق جامد
وفي واحد لا يفكر في قطع الغيار وفي واحد لازم تكون قطع الغيار في كل حته

في النهاية مين اللي هيقول اه يانيييييييييي

اللي اختار

والى صاحب الموضوع
ربنا يوفقك في اختيارك اين كان
وانصحك بكثرة الأستخارة لكي ترزق الخير
فالخير لا يعلمه الا الله فاطلبه من الله لكي ترزق به ان شاء الله

[sha2e]

معلش يا جماعه انا كان ليا استفسار ..!!
اللى عمل المقارنة دى عملها على اى اساس ؟؟ وعلى اى افترض ؟؟
الكرولا فئة والبرافو فئه تانيه خااالص

1- دي سيدان ودي هاتش باك
2- دي 1600 ودي 1400 سى سي
3- دي لفئه عمريه أكبر سنا والتانيه عربيه شبابيه
4- دي يابانية الصنع ودي ايطالية او اوروبية الصنع
يبقى ازاى نقارن دي بدي ؟؟

البرافو تتقارن بجولف او استرا مثلا
والكرولا تتقارن بسيفيك او لانسر
لكن مينفعش نقارن برافو بي كرولا

[Sharky]

والله ثم والله
لو قعدنا نأذن من هنا للصبح
السوق هيفضل هو السوق
الكورولا هيا الكورولا
مش تمجيد ولا كلام قديم ولا كلام مش عارف ايه
الحمد لله انا لا اغلق عيني واذني للواقع واتكلم

فعلا الكورلا هى الكورلا امال يعنى الكرولا حتطلع لانسر مثلا :10d5c8~1107:
بجد نفسى يا ابو عبدالله تنزل السوق و تسمع الأسعار اللى بتتباع بيعها كام
أقولك على حاجة ما تيجى ننزل انا وانت السوق الجمعة الجاية و نحكى للناس سمعنا إيه

وانما الواقع الحالي بيقول ان الكورولا برضه هيا الكورولا

إزاى بس دا نت لسه قابل ان الكورلا العيون مالهاش سوق
مش دا كلامك :)

حتى العيون اللي مالهاش سوق

ومع ذلك الكرولا العيون اللي مالهاش سوق اساسا

يا راجل دا الشكل إللى قبلها بيتباع أغلى منها
يعنى الكرولا فيها موديلات بتتباع بسعر عالى و موديلات أخرى لأ
يعنى مش كل موديلات الكرولا أعجب بيها الشعب المصرى

واللي بيقول الجديده مش زي القديمه احب افكره ان الكوررولا القديمه سنة 2001 لما نزلت مكنش حد راضي يشتريها وكان الناس متخوفه ومستعجبه التغيير في الشكل وحاجات كتير
شوف دلوقتي بيتطلب فيها كام

فيه فرق كبير ان الشكل غير محبوب و ان فتيس سيارة غير محبوب

[abo samra]

يعنى معنى ذلك يا أحمد ان البرافو اكثر رياضية و ثباتا عن الكرولا ؟

انا اتوقع فعلا ان ثباتها افضل من الكورولا وليس عن تجربه ولكن مجرد تخيل من التصميم والجنوط ال 17 والعفشه
بس برده مش شرط ان عربيه عفشتها ناشفه تبقى اثبت من عربيه عفشتها مريحه
يعنى اللانسر البومه مش اثبت من الكورولا الجديده رغم ان اللانسر عفشتها بتحس باى زلطه فى الطريق ولكن ده بيرجع لتوزيع الوزن وارتفاع السياره عن الارض والايرودينامكس بتاع العربيه والكاوتش والجنوط
وعلى فكره الكورولا الجديده مش عاليه قوى زى ما الناس متصوره
يعنى فيه مطبات اللانسر البومه بتعدى من عليها والكورولا حكت عليها
تحياتى

[abo samra]

فعلا الكورلا هى الكورلا امال يعنى الكرولا حتطلع لانسر مثلا :10d5c8~1107:
فيه فرق كبير ان الشكل غير محبوب و ان فتيس سيارة غير محبوب

سيبك من الكلام ده يا شاركى لان دى وجهات نظر
انا مثلا عامل تعديلات خفيفه وبسيطه فى العربيه خلت شكلها تحفه جدا
الفتيس وجهات نظر برده بس طالما فيه اوتو يبقى خلاص سيبك من ال mmt
وعلى فكره العربيه دلوقتى بتبيع كويس قوى قوى
بالنسبه لسعر اعادة البيع دلوقتى 2008 mmt فى السوق هتلاقيها من 115 الف الى 120 الف والعربيه مفيهاش اى مشاكل تكنولوجيه او مشاكل فى الجيربوكس علشان سعرها ينزل زى ما انت متصور

[أبو عبدالله]

سيبك من الكلام ده يا شاركى لان دى وجهات نظر
انا مثلا عامل تعديلات خفيفه وبسيطه فى العربيه خلت شكلها تحفه جدا
الفتيس وجهات نظر برده بس طالما فيه اوتو يبقى خلاص سيبك من ال mmt
وعلى فكره العربيه دلوقتى بتبيع كويس قوى قوى
بالنسبه لسعر اعادة البيع دلوقتى 2008 mmt فى السوق هتلاقيها من 115 الف الى 120 الف والعربيه مفيهاش اى مشاكل تكنولوجيه او مشاكل فى الجيربوكس علشان سعرها ينزل زى ما انت متصور

لا لا يا احمد
انزل السوق وشوف
يار اجل متتكلمش انزل السوق وشوف
سوق ايه يا حاج احمد اللي انت بتتكلم عليه
يا راجل ده انت بتمسك في حالة فرديه وتعمل عليها قصص سنين
واحد كان خايف من العربيه وعاوز يبيعها من سنه ولا اكتر كمان عملت عليه قصه ولسه هتتكلم عليه
ولما نيجي نقول الميجان تقولي دي سنة 2005 و 2006 وخلاص
طيب خلاص هناك ولسه هنا

سيبك انت من القصص اونزل السوق وقول انك عاوز تشتري ولف وانت تسمع الأسعار
وسيبك انت من موضوع سوق الجمعه ده
سوق الجمعه ده بتاع العربيات المضروبة
عاوز تعرف سعرها دور على النت او لف المعارض وانت تسمع احلى كلام
يا راجل انت بتهزر والله في كلامك ده
سوق الجمعه ده لعربيات تانيه بتبقى مش عاوزه تتباع من اللي فيها
مش الكورولات

[M.almaghraby]

بصراحة من الاخر كسيارة رياضية و جودة عالية و تكنولوجيا عالية و كلو

البرافو احسن من الكورولا بكتير

[kareemhisham]

معلش يا جماعه انا كان ليا استفسار ..!!
اللى عمل المقارنة دى عملها على اى اساس ؟؟ وعلى اى افترض ؟؟
الكرولا فئة والبرافو فئه تانيه خااالص

1- دي سيدان ودي هاتش باك
2- دي 1600 ودي 1400 سى سي
3- دي لفئه عمريه أكبر سنا والتانيه عربيه شبابيه
4- دي يابانية الصنع ودي ايطالية او اوروبية الصنع
يبقى ازاى نقارن دي بدي ؟؟

البرافو تتقارن بجولف او استرا مثلا
والكرولا تتقارن بسيفيك او لانسر
لكن مينفعش نقارن برافو بي كرولا

مش لازم اختار فى الحالة دى انهم يكونوا نفس الفئة لان انا قلت فى الموضوع قبل كدة ان دى العربية التانية ,,

فالمساحة و عائلية و كدة متفرقش كتير

[abo samra]

بصراحة من الاخر كسيارة رياضية و جودة عالية و تكنولوجيا عالية و كلو

البرافو احسن من الكورولا بكتير

جوده وتكنولوجيا وكماليات الكورولا تكسب
انما البرافو تكسب كشكل من الخلف وممكن كمان ثبات (ليس عن تجربه)
تحياتى

[Sharky]

بالنسبه لسعر اعادة البيع دلوقتى 2008 mmt فى السوق هتلاقيها من 115 الف الى 120 الف والعربيه مفيهاش اى مشاكل تكنولوجيه او مشاكل فى الجيربوكس علشان سعرها ينزل زى ما انت متصور

للأسف سعرها يترواح حاليا من 100 إلى 110 بالكتير قوى
و انا مقلتش ان فيها مشاكل علشان سعرها ينزل ما الكرولا العيون مافيهاش مشاكل لكن غير محبوبة و سعر إعادة بيعها مش عالى
لكن كل ما فى الموضوع الكرولا MMT أصبحت غير محبوبة فى السوق المصرى ليس أكتر زيها زى الكرولا العيون

لا لا يا احمد
انزل السوق وشوف
يار اجل متتكلمش انزل السوق وشوف
سوق ايه يا حاج احمد اللي انت بتتكلم عليه
يا راجل ده انت بتمسك في حالة فرديه وتعمل عليها قصص سنين
واحد كان خايف من العربيه وعاوز يبيعها من سنه ولا اكتر كمان عملت عليه قصه ولسه هتتكلم عليه

دى مش حالة فردية زى ما انت متخيل و الموضوع مش عافية لإنى حكيت قبل ما الموضوع دا صاحبه يكتبه بفتره ان لى صديق أخوه باعها برضه بعد كام شهر بخسارة 30 الف و لم تهمل أكتر من 20 الف كم !!!
دا واقع و انت مش عايز تصدقه دى مش مشكلتى انا
و بعدين انا قلتلك الميه تكدب الغطاس تعالى معايا الجمعة الجاية السوق و المعارض و انت تسمع بنفسك الأسعار من بق اللى عايز يبيع و لا انا كده غلطان

ولما نيجي نقول الميجان تقولي دي سنة 2005 و 2006 وخلاص
طيب خلاص هناك ولسه هنا

إيه اللى دخل الميجان فى الموضوع دا
هو كل حوار معاك فى أى حتة لازم تدخل فيه الميجان :10D5C8~1107:

سيبك انت من القصص اونزل السوق وقول انك عاوز تشتري ولف وانت تسمع الأسعار
وسيبك انت من موضوع سوق الجمعه ده
سوق الجمعه ده بتاع العربيات المضروبة
عاوز تعرف سعرها دور على النت او لف المعارض وانت تسمع احلى كلام
يا راجل انت بتهزر والله في كلامك ده
سوق الجمعه ده لعربيات تانيه بتبقى مش عاوزه تتباع من اللي فيها
مش الكورولات

انا ماقلتش بس سوق الجمعة انا قصدى السوق عامة معارض و وسوق الجمعة
بلاش سوق العاشر لو مزعلك قوى كده و اسعاره مش عاجباك رغم ان غالبية البيع تتم فيه و تجار الأقاليم نفسهم بينزله يشترى من عنده تعالى ننزل المعارض اللى فى القاهرة و شوف حتسمع منهم كام و تعالى قولوا هنا فى المنتدى
و بلاش موضوع النت دا لإنه ببلاش و كل واحد بيحط السعر اللى عايزه بدون معرفة سعر السوق الحقيقى

[OilMan]

احب ااقول حاجه بس صغيره اى توكيل فى مصر وقطع الغيار اساسا زفت لانه مفيش حمايه لينا واى عربيه ممكن تكون حلوه لو انت بتصونها اول باول عمرها ما تعيش معاك لو انت اهملتها انما لو عاملتها زى ابنك او بنتك حاتعيش معاك يعنى من الاخر عمر اى عربيه اللى بيتحكم فيه استعمالك انت وبس مش اى حد تانى
بجد شوف اللى يغطى احتياجاتك واختاره

[delpo]

مع احترامي يا استاذ شاركي انا امبارح روحت 3 معارض انا وصاحبي عشان هو عايز يجيب واحد مستعملة نضيفة والحقيقة اصلا مالقناش كورولا مستعمل جديدة غير في معرض واحد منهم بس وطلب فيها نهائي 137.5 ألف بعد ما روانا العقد مع صاحبها الي باعهالو ب130 الف والعربية عاملة 96 الف كيلو وشكل صاحبها كان مقضيها سفر عالسريع.

عموما النهاردة انشاء الله هننزل تاني انا وصاحبي ولو قدرت اخلي الي بيبيع يوافق يتصور فيديو هنزله عاليوتيوب واحط اللينك عشان تشوف بنفسك

[delpo]

مع كامل احترامي لصاحب الموضوع الي ناوي يشتري انا عايز اقول حاجة مهمة:

- كل الي اتكلموا هنا ورشحوا الكورولا اتكلموا عن أسباب وأرقام وحقائق ووقائع, وكل الي اتكلم عن البرافو قال طبعا البرافو .. طب ليه يا عم الحج ؟ يقولك كده مره عشان شكلها رياضي ومره عشان دي اوروبي وماحدش منهم قارن العربيتين مع بعض كمواصفات.

انا بنصحك لوجه الله فقط والله العظيم مش اكتر ومش عشان انا عندي كورولا بس عشان متكررش غلطة الناس الي بيقولولي دلوقتي ياريتنا سمعنا كلامك, اتوكل على الله وهات كورولا ولو لقيت فيها اي حاجة مش عاجباك لا قدر الله او حتى عايز تغير اديك تقدر تبيعها وهي بتمسك سعرها انما لو جبت برافو ولقيت فيها اي حاجة مش هتعرف تبيعها عشان سعرها مستعمل واقع جدا وبكرر جداً وهتتحسر وانت بتبيعها او مش هترضى تبيعها وهتفضل متضرر وهيا معاك.

اللهم قد بلغت .. زاستخير ربنا وشوف الي يناسبك وبرضو اعمل تيست درايف بنفسك وقارن بين النعومة والباور والتسارع والثبات وهتتأكد
بنفسك.

الأستاذ شاركي انا قولت لحضرتك قبل كده اني ركبت البرافو صحيح مش على طريق سفر عشان اقدر احكم بنسبة 100% على الثبات بس الملفات الي جوه البلد برضو مؤشر وبتديك احساس ولا هو انت مش هتسوق جوه البلد خالص ؟!