محتاج مساعدة كل الاعضاء فى الاختيار ده

[amrsabet]

انا بشكر مقدما كل الاعضاء اللى حتقولى رايها فى الحيرة اللى انا فيها فى الاختيار بين 3 عربيات :
- نيو سيراتو اول فئة مانوال
- هيونداى النترا مانوال
- هيونداى i30

انا فى الحقيقة اقعدت فى 3 عربيات دول وحسيت ان الi30 افضلهم من الداخل ولكن من الخارج دى نقطة الحيرة بالنسبة لى انا حاسس ان السيراتو احسن شكل من الخارج لكن انا خايف من الاتى :

- عفشة السيراتو عمود التوائى زى التيو اكسنت وبالتالى ممكن تتناطط فى المطبات
- عزل الشكمان فى السيراتو مش كويس وبالتالى فى سخونة بتبان فى المنطقة اللى ادام الفتيس
- الخامات المستخدمة فى اول فئة قليلة شوية
- مفيهاش ريموت كونترول بس دى بالنسبة لى مش مشكلة اوى


نيجى للالنترا فانا حاسس ان بعد السيراتو مانزلت مبقاش ليها زهوة زى الاول بالاضافة الى ان خفيفة شوية

ال i30 انا مقتنع بيها جدا فى كل حاجة ماعدا شكلها من ادام حاسس ان فى حاجة غلط



انا برجو كل الاعضاء انهم يشاركونى فى الاختيار لانى محتار مع العلم انا 3 عربيات انا عايز اركبهم مانوال ولونهم يكون اسود .


تم النقل لقسم المقارنات
___________
مشرف قسم الكيا

[أحمد كمال]

نيو سيراتو افضل

توكيل افضل

ضمان 5 سنين او 100 الف كيلومتر

سيارة افضل بكتيييييييييييييييير

[TeMoON]

هى السيراتو فعلا افضل من حيث كل حاجة بس هى بترجع لراحتك النفسية انت شوف مرتاح لاى عربية اكتر وصلى صلاه استخارة والى فية الخير ربنا يسهلك بية بس اهم حاجة الاقتناع التام حتى لا تندم على اختيارك

[amrsabet]

انافى الحقيقة السيراتو فى الشكل الخارجى لاغبار عليها بس عشان الحاجات اللى انا كتبتها انا خايف منها انى اندم بعد مااجبها
اما ال i30 انا مقتنع بيها جدا من جوه بس بره من قدام شكلها غريب شوية

[Amro_Gamal]

عزيزى عمرو
أرجو انك لاتنسى شى مهم جدا فى كل سيارات غبور ان وسائل الأمان فيها فقيرة او لاتكاد تكون موجودة مثلا زي الأير باج. كلنا زمان كنا بنركب العربيات من غير أير باج و لسه لغاية النهارده فى ناس مش بتهمَها موضوع الأير باج من أساسه.
لو هتقارن الألنترا بالسيراتو أكيد السيراتو هتكون أفضل.
انا هأقولك على شى برضه ممكن يساعدك شوية فى حسم الموضوع انت ممكن تأخذ البروشور لكل سيارة أو من على النت وتقارن كل خاصية بمثيلاتها فى الأثنين التانيين و تاخد فى أعتبارك مزايا و عيوب كل وكيل و سعر السيارة و أسعار قطع الغيار بتاعتها و تدى لكل جزء فيها درجة على حسب أهميته بالنسبة ليك. انا بأعمل كده لما حد بيسألنى عن اي سيارة عاوز يشتريها و برضه ياريت زي ما قالولك صلى صلاة أستخارة و لا خاب من أستشار

عمرو جمال

[Hosam_Optrawy]

سيراتو او i30 اللى تستريحلها

[M.ABDEEN]

سيراتو او اي 30 ايهما اريح ليك

[tamerking]

بكل تأكيد وبدون مبالغه سيراتووووووووووووووووووووووووووووووووووووووووووووو ووووووووووووووووووووووووووووووووووووووو

[gasserissa]

بص هي اي30 جميله اوي هي كمان بس جرب تقعد فيها من الخلف و قلي ايه رايك
في حاجه كمان شكل الاي 30 و الالنترا بقاله 4 سنين يعني السنه الجيه لو اتغير الشكل بقيت راكب عربيه اولد شيب
السيراتوه لسا شويه عليها
هرجع و اقولك الفئة اللي انت بتكلم عليها مفيش فرق في كبير بين العربيات فا اختار اللي تستريحله و اوعه تندم علي اي و حده عشان كلهم عربيات ميتندمش عليها خالص كلهم عربيات جمد جدا

لو بتكلم بقه علي الفئات الاعلي فا السيراته بدون منازع

[amrsabet]

انا وصلت للاختيار بين عربيتين السيراتو وال i30 انا بالنسبة للشكل الخارجى مرتاح اكتر للسيراتو اما باقى الحاجات زى الشكل الداخلى للتابلوه والمساحة الداخلية وشكل العدادات والخامات المستخدمة في العربية فانا مرتاح لل i30 يبقى نقطة الحسم فى الاتى :
- هل العربية السيراتو عفشتها تعطى ثبات عالى للعربية
- هل موضوع السخونة فى الكونسول بتاع التابلوه بسبب الشكمات ده موضوع بسيط وغير محسوس بيه تماما وان راى الاعضاء اللى قالوا علية كان مبالغ فية شوية
- هل العربية قعدتها فى السفر هتكون مريحة ولا متعبة
- هل العربية المانوال هيكون الاحساس بالنقل فى الفتيس زى الالنترا مثلا ولاهيكون مختلف ( لانى دى العربية الوحيدة المانوال فيهم اللى سوقتها )


انا فى النهاية محتار فى الحاجات السابقة دى وبطلب من الاعضاء انهم يقوللى رايهم بشكل محايد وموضوعى ويكون ناتح عن تحربة ليهم للعربيتين او على الاقل احد الاصدقاء ليهم عشان اقدر احسم موضوع العفشة والسخونة اللى انا خايف منهم فى السيراتو


وانابشكر كل الاعضاء اللى هتفدنى بالراى والمشورة الصائبة .

[amrsabet]

مفاجاة ماكنتش على البال ولا على الخاطر اتصلت بغبور لقطع الغيار عشان اعرف اسعار قطع غيار i30 وهى كالاتى :
- فانوس امامى 1430
- فانوس خلفى 1045
- اكصدام امامى 1592
- اكصدام خلفى 1620
- الشبكة 800
-تيل الفرامل 520
- الكبوت 2470
- الشنطة 1320

تخيلوا ان مثلا حد خبطلى فاتوس امامى وشبكة شوفوا بقى هتدفع كام بالمصنعية تبقى مفاجاة لو قطع غيار الكيا سيراتو برده كده انا مش عارف اعمل ايه

المفاجاة التانية اللى حصلت انى اتصلت بتوكيل كيا عشان اعرف اسعار قطع غيار السيراتو وكانت مفاجاة جميلة بصراحة لانى لقيت ان قطع غيرها رخيصة جدا مقارنتا بالالنترا و i30 وهى كالتالى :
- فاونس امامى 990
- فانوس خلفى قطعتين 394+425
- شبكة 450
- اقصدام امامى 1200
- اقصدام خلفى 1220
- الكبوت والشنطة ( ارخص بكتير من العربيات i30 و الالنترا ) بس انا مش قادر افتكر الرقم بالضبط لانى كنت باتصل من الموبايل


وكانت المفاجاة ان اسعار قطع الغيار دى للعربيات اللى بضمان الوكيل فقط انما سعر الفانوس الامامى لما بيباع لعربية خليجى بيوصل ل 1450 جم

انطباعى من المكلمة ان الشخص اللى رد عليا محترم جدا وكان اسلوبه راقى بعكس الشخص اللى رد عليا فى توكيل هيونداى وقالى يافندم طالما ادارة الشركة بتدينى كل حاجة انا عايزها يبقى دى اقل حاجة ممكن تلاقيها من موظفى شركة كيا وهى المعاملة الحسنة