انا هتحط فى مقارنه بينى وبين اخويا بسبب الالنترا والسيراتو ؟؟؟؟؟؟؟؟؟؟؟؟؟؟؟؟؟؟؟

[ahmed161075]

انا يا اخوانا والله شكلى هتحط فى مقارنه بينى وبين اخويا بسبب السيراتو والالنترا انا راكب برايد العصفوره وهشترى سيراتو وهو راكب فيرنا وهيشترى النترا وهنتحط احنا الاتنين فى مقارنه من باقى اهلنا واخواتنا وخصوصاااااااااااااااااااااااااااااااا زوجتى وزوجتو وهى دى المشكله وكمان احنا اخوات فوق راس بعض ودايما ناقر ونقير مع بعض

نسيت اقولكم كمان انى اهلاوى وهو زملكاوى ودى هتخلى الموضوع مولع اكتر

ارجوكى قولولى مين فينا هيكسب وباقى الاهل هيكونا منبهرين اكتر بعربتو

على فكره انا لو شوفت السيراتو الجديده ماكنتش عملت الموضوع ده لكن مشكلتى انى من المنيا ومفيش هنا فى المعارض السيراتو الجديده عشان اشوفها ولكن شوفت الالنترا لانها موجوده هنا على قفا من يشيل ولكن لما شوفت الالنترا امبارح عجبتنى جدا من جوا بصراحه وده اللى خلانى اكتب الموضوع ده لان اللى هيفاضل بين العربيتين من اهلنا والجيران هيتكلم على العربيه من برا ومن جوا ومالوش دعوه بالموتور والكلام ده

ارجوكى ساعدونى فى المقارنه بين الاتنين وخاصة من جوه يعنى التابلو والكراسى والحاجات دى

نسيت انى اقولكم انى بقارن بين النترا اللى ب 100 الف وسيراتو اللى ب 103 الف والاتنين اوتوماتيك قولولى ايه الحسن وايه اللى موجود بالظبط فى الفئه دى من السيراتو

[himatros]

اقولك ومتزعلش السيراتوا جامدة

[wookiee]

أنا زيك كده..وشايف السيرااتوا عربية القرن

[medokimo]

السيراتو في المنيا عند ابوحته موتورز في عمارات الجامعة

[Hosam_Optrawy]

انت اللى هتكسب

ودا لينك مقارنه بين العربيتين

http://www.nilemotors.net/Nile/81095-a.html

وبالنسبه لكماليات الفئه دى من السيراتو

تكييف - ايرباج - باور - سنتر لوك - 4 زجاج كهربا - مرايات كهربا - راديو سى دى

والالنترا نفس الكماليات بس بدون ايرباج

[Hosam_Optrawy]

ودى صور للسيراتو من جوا لعربيه زميل لنا فى المنتدى




















بس دى فئة Ex

وانت هاتجيب Lx

الكاسيت هايبقى شكله مختلف والدركسيون مش هاتبقى ملتى فنكشن

[solom_2010]

السيراتووووووووو اكيد
و عشان انت اهلاوى جدع :) الناس حتتجنن على عربيتك ( سيراتوو ان شاء الله)

[fouady]

Akeeed ceratoh

[tarekabosdera]

انا شايف على المدى البعيد ( بعد 3 سنين وانت طالع ) هتكتشف ان الالنترا افضل. وهبقى افكرك...

[ahmed161075]

متشكر قوى يا اخ حسام على مجهودك الكريم ... عاوز اقولك انى قربت اميل للسيراتو عشان هيه مش منتشره قوى ودى ميزه كبيره بالنسبالى

[Samah AbdAllah]

نيو سيراتو اكيد

[ahmed161075]

السيراتو في المنيا عند ابوحته موتورز في عمارات الجامعة

يا ميدو......... انا من بنى مزار وروحت المنيا عشان اشوفها لقيت ابوحته موتورز قافل يا ريت لو تعرف تقولى هم عندهم العربيه هتكون اغلى من التوكيل وللا لا لانهم هيسلمونى علطول اكيد طالما العربيه عندهم وهو اساسا افضل اشترى من عندهم وللا من مصر قصدى توكيل كيا

[Hosam_Optrawy]

متشكر قوى يا اخ حسام على مجهودك الكريم ... عاوز اقولك انى قربت اميل للسيراتو عشان هيه مش منتشره قوى ودى ميزه كبيره بالنسبالى

بس خد بالك

فى خلال سنه بالكتير

السيراتو هاتبقى منتشره اكتر من الالنترا

مع ان الالنترا بقالها 3 سنين بتتباع

[ahmed161075]

ربنا يستر

[M.ABDEEN]

سيراتو بكل تاكيد