كورولا ولا سيراتو من الآخر

[tutankhamoun]

عمرى ما شفت حضرتك بتتكلم عن الكورولا الا وبتقول ان سعرها مبالغ فيه!!!!!!!!!!!
الكورولا فى السوق بتتقارن مع السيفيك والشارك والماذدا والسوبارو واحيانا الاوكتافيا والجيتا الباسيك مش مع السيراتو ودلوقتى الكورولا هى الصفقه الرابحه فى العربيات اللى قولتها كسياره مقابل نقود ولو حضرتك ركبت السيراتو والكورولا هتعرف ان فرق فى الركوبه والراحه والعزل والثبات والاداء لصالح الكورولا عن تجربه
بالنسبه للشكل اتفرج على كورولا فيها فوانيس ليدات خلفيه وعتب وخليها تقف جنب السيراتو وساعتها هتعرف ان الكورولا احلى بكتيييييير
تحياتى

يا باشا أولا ربنا يباركلك في الكورولا بتاعتك ....... و هي سيارة ممتازة من ناحية الجودة و لا غبار عليها أطلاقا .
و رأيي في موضوع الشكل ( ذوق شخصي ) و لكني أرى جميع سيارات تويوتا ....... عادية من ناحية الشكل أو قبيحة أما من ناحية الجودة و كعربية و خامات ...... ممتازة .

من ناحية السعر و الأسعار الخاصة بالسيارات دي
أولا كل الماركات اللي حضرتك ذكرتها كلها غالية و أنا شايف أنها ما تستاهلش ثمنها خصوصا الشارك .

لو قارنت شكل السيراتو بشكل الكورولا ......... في رأيي الشخصي المتواضع ........ السيراتو تكسب
و فيه كمان الشيفروليه كروز ......... شكلها أحلى من الكورولا .....

عربيات تويوتا ممتازة ........ و لكن الشكل عادي ...... و الأسعار مبالغ فيها ..

و في رأيي المتواضع ( رأي شخصي برضه ) ....... أني لوطلعت ل 150 ألف ........ مش هاركب تويوتا

يا أما هوندا ................... أو بي أم دبليو مستعمل نظيف ........

[Eng.Geo]

انا شايف ان لو عايز اعتمادية عالية و امان يبقي كورولا
لو عايز توفر شوية و هتركب عربية جميلة بس هتحس بان في شوية حاجات مضايقاك و ممكن تتغاضي عنها يبقي سيراتو
انا من رايي ان السيراتو من احسن العربيات اللي نزلت في شكلها هي والكروز ومابيعجبنيش اي شكل من تويوتا غير كامري
بس في نقطة مهمة جدا
تويوتا تهتم جدا بالايرو دينامكس للعربيه وده هيفرق في حاجات كتير
والسيراتو صاجها مش هيعجبك
لازم تجرب الاتنين و تحكم انت و ماتمشيش ورا قلبك فكر باسلوب علمي عملي

[medo_2060]

من الاخر طالما ممكن تدفع 150 يبقى لاكورولا ولا سيراتو

سيفيك وبس

[super3_11]

انا راي السيراتو شكلا احلى بكتير (زوق ) ولو الشكل مش فارق يبقى كرولا يابانى لان الجنوب افريقى جير بوكس اتوماتيك تعبان وعن تجربة وقلتها قبل كدة فى موضيع كتير ده راى بس المتسوبيشى الجديدة حرام تتفارن باى عربية من الى انت كاتبهم دى بلاستيك ولو ادونى عليها فلوس مركبهاش

[mohd_rafat]

شكرآ جزيلا لكل الأعضاء المحترمين إللي ردوا على الموضوع مهما إختلفت الآراء ...
وعلى فكرة يا tutankhamoun حضرتك تقريبا زيي في التفكير لأني بفكر في المضمون وبصراحه أنا سوقت الكورولا بتاعت والدي وخليجي على فكره لقيتها بعد 140 بدأت تعوم وأنا حاسس إنها خفيفة برضوه قالوا إنهم تقلوها وعالجوا العيوب في الشكل الجديد بس بصراحه لسه برضوه ومش هنكر إن فيها مميزات برضوه بس حاسس إنها مش دي السياره إللي أدفع فيها المبلغ ده وأنا مش مقتنع بيها بصراحه .
لكن كل إللي ركبوا السيراتو بيشكروا فيها جدا من ناحيه الماكينه والأبشن عيوبها في ناس بتقول إن الخامات مش قد كده والعفشه تحس إنها نشفه وده بسبب إنه العجل بييجي من كوريا متظبط على 50 وناس قالت عشان الجنط 17 وسبور يبقى لازم يبقى الثبات على حساب النعومه بس هل فعلا العفشه ناشفه بشكل عام ؟؟؟
وبالنسبه للكنبه إللي ورا الناس بيقولوا قاعدتها ضيقه نوعآ ما ورا طيب ماهو برضوه الكورولا تقريبآ نفس الوضع !!
بصراحه دي ماتعتبرشي عيوب تعيب السيراتو وتمنها مش مبالغ فيه زي الكورولا .
وGeo بيقول إن صاج السيراتو مش هيعجبني لأنوه ضعيف ماشاء الله على الكورولا مش عاوز أتكلم واحد صاحبي سند برجلوه على الإكصدام طبقهولي .
ياجماعه كل الحاجات دي هتكون في كل السيارات ولو قعدنا نقارن يبقى مش هنركب حاجه خالص بس أنا بتكلم في المعقول والمقبول وبصراحه شكل الكورولا مش شبابي خالص .
وهقولها أخيرآ أنا والدي عندوه كورولا يعني أنا مش بنتقض الكورولا من فراغ دي عن تجربتي الشخصيه .

[M.ABDEEN]

الكورولا او تويوتا مافيش غبار عليها لكن السعر مبالغ فيه قوي سواء كورولا او ياريس ......وده طبعا من السيد الوكيل وفعلا خد بكلا مستر حسام اوبتراوي

[kareemhisham]

شكرآ جزيلا لكل الأعضاء المحترمين إللي ردوا على الموضوع مهما إختلفت الآراء ...
وعلى فكرة يا tutankhamoun حضرتك تقريبا زيي في التفكير لأني بفكر في المضمون وبصراحه أنا سوقت الكورولا بتاعت والدي وخليجي على فكره لقيتها بعد 140 بدأت تعوم وأنا حاسس إنها خفيفة برضوه قالوا إنهم تقلوها وعالجوا العيوب في الشكل الجديد بس بصراحه لسه برضوه ومش هنكر إن فيها مميزات برضوه بس حاسس إنها مش دي السياره إللي أدفع فيها المبلغ ده وأنا مش مقتنع بيها بصراحه .
لكن كل إللي ركبوا السيراتو بيشكروا فيها جدا من ناحيه الماكينه والأبشن عيوبها في ناس بتقول إن الخامات مش قد كده والعفشه تحس إنها نشفه وده بسبب إنه العجل بييجي من كوريا متظبط على 50 وناس قالت عشان الجنط 17 وسبور يبقى لازم يبقى الثبات على حساب النعومه بس هل فعلا العفشه ناشفه بشكل عام ؟؟؟
وبالنسبه للكنبه إللي ورا الناس بيقولوا قاعدتها ضيقه نوعآ ما ورا طيب ماهو برضوه الكورولا تقريبآ نفس الوضع !!
بصراحه دي ماتعتبرشي عيوب تعيب السيراتو وتمنها مش مبالغ فيه زي الكورولا .
وgeo بيقول إن صاج السيراتو مش هيعجبني لأنوه ضعيف ماشاء الله على الكورولا مش عاوز أتكلم واحد صاحبي سند برجلوه على الإكصدام طبقهولي .
ياجماعه كل الحاجات دي هتكون في كل السيارات ولو قعدنا نقارن يبقى مش هنركب حاجه خالص بس أنا بتكلم في المعقول والمقبول وبصراحه شكل الكورولا مش شبابي خالص .
وهقولها أخيرآ أنا والدي عندوه كورولا يعني أنا مش بنتقض الكورولا من فراغ دي عن تجربتي الشخصيه .

حاجتين بس عايز اقوله:
1- الكورولا القديمة لا تقارن باى شكل من الاشكال بالكورولا الجديدة و عن تجربة ..

2- الكورولا الجديدة تستاهل كل مليم بيدفع فيها و نفس الكلام للسيراتو ..

و فى الحالتين انت الكسبان

[mohd_rafat]

محمد سمير أشكرك على رأيك وإن شاء الله ربنا يهديني للأحسن والأفضل ليا .
وكريم شكرآ ليك بس أنا مقرنتش بينهم أنا بقول في نقطة الثبات لسه برضوه الكورولا مش السيارة إللي تطمنك على سرعات عالية وأنا من رأيي لو عاوز تركب تويوتا يبقى تركب فئات عاليه وطبعا مش موجود منها في مصر أساسا وإللي موجود الكامري بس طبعا مفيش حد عاقل يجيب سيارة ب500 ألف عشان تويوتا طيب مأجيبلي bmw أحسن !!
عشان كده لجأت للماركات التانيه ولقيت إن الكيا من الشركات إللي في صعود مستمر مش من ناحية التصنيع والجوده من ناحية المبيعات والشعبية وبصراحه بعتبرها أفضل الكوري ومفضلشي غيرها في الكوري .
المهم إختياري للسيراتو كان بتفكير وحساب وزي ماحضرتك قلت أنا الكسبان في الآخر إن شاء الله .

[abo samra]

أنا بقول في نقطة الثبات لسه برضوه الكورولا مش السيارة إللي تطمنك على سرعات عالية .

الكورولا مش السياره اللى تطمنك على سرعات عاليه!!!!!!!!!!!!
طب حضرتك عرفت ازاى بدون تجربه؟؟
ما تقوليش على كورولا الشيب القديم علشان الموضوع ده بقا مضحك جدا لما بنكون احنا بنتكلم عن عربيه وناس بتحكى عن عربيه تانيه مش معنى ان الاتنين اسمهم كورولا يبقى الاتنين زى بعض
وكمان عاوز تركب الكيا علشان تتطمن على السرعات العاليه
بصراحه انا مش عارف ايه الغرض من الموضوع ده لما عملته معظم الناس قالتلك لو معاك من 110 الى 120 هات سيراتو ولو معاك 150 الى 160 هات الكورولا كمقارنه بين السيارتين الكورولا تكسب فى معظم النقاط وبعدين حضرتك دخلت تقول ان الكورولا بتاعة والدك الشيب القديمه مش ثابته وشكلها مش شبابى تجيب كيا احسن طب طالما استقريت على قرارك ليه بقا عملت الموضوع ده

[mohd_rafat]

ياسيدي الفاضل أنا بقول الكلام ده عن تجربه وقولت الكلام ده من الأول وبالنسبه لسيارة والدي دي 2008 يعني الشيب الجديد
وأنا مش متحامل على الكورولا من فراغ أنا بقول إن سعرها مغالى فيه جدا بالنسبه ليها
وعلى فكره مش كلامي لوحدي بس عن ثباتها ده كلام كتير من الناس
أما السيراتو في المعقول يعني لو مش هاخد الثبات بال150 ألف يبقى أحسنلي أوفر فلوسي وأركب السيراتو في المعقول في كل حاجه وأنا سامع عليها كلام طيب

[abo samra]

ياسيدي الفاضل أنا بقول الكلام ده عن تجربه وقولت الكلام ده من الأول وبالنسبه لسيارة والدي دي 2008 يعني الشيب الجديد
وأنا مش متحامل على الكورولا من فراغ أنا بقول إن سعرها مغالى فيه جدا بالنسبه ليها
وعلى فكره مش كلامي لوحدي بس عن ثباتها ده كلام كتير من الناس
أما السيراتو في المعقول يعني لو مش هاخد الثبات بال150 ألف يبقى أحسنلي أوفر فلوسي وأركب السيراتو في المعقول في كل حاجه وأنا سامع عليها كلام طيب

صباح التحويــــــــــــــــــــــــــــــــــــــــــــ ـــــــــر
اللى اتكلموا عن الثبات اتكلموا عن ثبات الشكل القديم ومحدش اتكلم عن ثباتها غيرك
وقولت مره طالما عاوز تشترى السيراتو اشتريها وشيل من دماغك الكورولا خالص طالما مش عجباك
انما مش تدخل تعمل موضوع علشان تقول مش ثابته وغاليه ومش عارف ايه !!!!!!!!!
دلوقتى والدك معاه الشيب الجديد
مش انت لسه قايل انه معاه الشيب القديم فى مشاركه فاتت

[abo samra]

وبصراحه أنا سوقت الكورولا بتاعت والدي وخليجي على فكره لقيتها بعد 140 بدأت تعوم وأنا حاسس إنها خفيفة برضوه قالوا إنهم تقلوها وعالجوا العيوب في الشكل الجديد .

ده كلامك صح
انا مش عارف المواضيع اللى زى دى لازمتها ايه

[hon]

لا وجة للمقارنة

مع أحترامى لموضوع المقارنة من غير كلام كتيير رغم انى معايا كورى وبحب الصناعة الكورية بس التويوتا الجديدة بالأبشن الجديد من الفتيس وخلافة بجد صفقة ناجحة وربنا يبارك لملاكها طبعا الكورولا تكسب بأكتساح
نعومة -أمان -أعتمادية-أقتصادية-برستيج-علو عن الأرض-تسارع -صالون واسع وشنطة
أنا لو خيرونى بينها وبين الأكتافيا أو الفكترا حختار التويوتا لأسباب كتيرة وعلى فكرة تويوتا تتميز بنظافة محركاتها وتأثيرها المحدود على البيئة وشكرا

[dodino2006]

ده كلامك صح
انا مش عارف المواضيع اللى زى دى لازمتها ايه

+111111111111111