تعالوا نعرف ايه هي (البارات او الشدادات او التقويات و الدعامات) وكيفية عملها

[Amr Axel]

بسم الله الرحمن الرحيم
هابي نييو ييير يا شباب

انهاردة انا هتكلم عن حاجة معرفش حد اتكلم عنها بشكل مفصل و عن طريقة عمل القطع ديه قبل كده هنا ولا لأ
و هي
(البارات او الشدادات او التقويات و الدعامات)
في ناس كتيير تسمعها و متعرفش ايه هي اساسا
و طبعا في ناس عارفينها
الأول لازم نعرف ايه هي الـــ (البارات او الشدادات او التقويات أو الدعامات)
بداية العربية فيها 4 عجلات و 4 ممتص للصدمات (المساعدين )
لما العربية تمشي ع طريق واعر (مكسر و مليان مطبات و حفر و الحاجات الحلوة اللي متعودين عليها)
فمهمة ممتص الصدمات (المساعدين) انها تمتص الصدمة ديه
و هيكل العربية مش بيبقي قوي لدرجة انه يساعد ممتص الصدمات ع امتصاص الصدمة بشكل كامل
فلما تحصل الصدمة بيتم امتصاصها عن طريق الهيكل
طبعا اللي بيؤدي ان الهيكل بيثني و مع مرور الوقت الهيكل بيتبهدل
و الحل للموضوع ده الـــ(البارات او الشدادات او التقويات أو الدعامات)
و هي عبارة عن اجزء بتتركب علي بعض الاجزاء في العربية
( زي ع الشاسيه - - جوانب العربية - الشنطة ...الخ ..الخ )
بحيث انه بيخلي ممتص الصدمات (المساعدين ) يؤدي مهمته بشكل ممتاز و في نفس الوقت بدون التأثير ع هيكل العربية و بيقويه
فبيحافظ ع الشاسيه
بالاضافة لأنه بيزود ثبات العربية في المنحنيات و الغرز
نبتدي الشرح لبعض القطع ديه بالصور
اولا : الـــFront Strut Bar و الـــ FrontLower Arm Bar
أ- بالنسبة للصدمات
قبل تركيب الــ Strut Bar و الـــ Lower Arm Bar


واخدين بالكم لما تحصل الصدمة ايه اللي بيحصل ازاي ان الهيكل بيستقبل الصدمة.

بعد تركيب الــ Strut Bar و الـــ Lower Arm Bar

بعد تركيب القطعتين دول ملاحظين لما بتحصل الصدمة ايه اللي بيحصل

ممتص الصدمات (ذ )

بيؤدي مهمته بشكل صحيح

بدون ما يأثر ع الشاسيه و هيكل العربية.

ب-بالنسبة للدوران يمين او شمال

قبل تركيب الــ Strut Bar و الـــ Lower Arm Bar

لاحظوا لما نيجي نلف يمين مثلا ايه اللي بيحصل للجزء الشمال القوة و الوزن كله بتتركز فيه و بيؤدي ان اللفة تكون يمين اكتر من الازم فبيأثر ع التوازن و الثبات.

بعد تركيب الــ Strut Bar و الـــ Lower Arm Bar

بعد التركيب هنلاحظ ان

القوة و الوزن بيتوزع و اللي بيؤدي لزيادة الثبات و التوازن.

-------------------------------------------

ثانيا : الــ Fender Bar

قبل تركيب الــ Fender Bar

هنلاحظ انه قبل التركيب ان الصدمة اللي هيستقبلها الهيكل الامامي هتكون مؤثرة

و اللي بعد كده هيؤدي لضرر الهيكل الامامي.

بعد تركيب الــ Fender Bar

بعد تركيب القطعة هنلاحظ ان الصدمة هيمتصها ممتص الصدمات (المساعد ) بدون ما يأثر ع الهيكل الامامي .

-------------------------------------------

ثالثا : Side Lower Bar

قبل تركيب الــ Side Lower Bar

هنلاحظ اننا لما العربية بتمشي ع طريق غير مستوي بالشكل ده

بيحصل نقل وزن بين مقدمة و مؤخرة العربية

و بالتالي هيتأثر الجزء اللي في الوسط.

بعد تركيب الــ Side Lower Bar

بعد التركيب هنلاحظ ان القطعة ديه بتعمل توازن و ثبات في نقل الوزن بين مقدمة العربية و المؤخرة

و بالتالي هيقلل الصدمة للجزء اللي في الوسط و يحافظ عليه.

-------------------------------------------

رابعا:Sway Bar Anti-Roll Bar

قبل تركيب الــSway Bar \ Anti-Roll Bar

هنلاحظ قبل تركيب القطعة ان لما نيجي مثلا نلف يمين العربية كل وزنها هيتركز للشمال و بالتالي لما نيجي نعيد مستوي العربية تاني هيبقي الي حدا ما صعب و اللي في بعض الاوقات بيؤدي لا قدر الله لانقلاب العربية.

بعد تركيب الـــ Sway Bar \ Anti-Roll Bar

بعد تركيب القطعة هنلاحظ ان حصل توازن

لأنها بتمنع العربية من الانقلاب ع جنبها

و بيقلل الدوران مع زيادة الثبات.

خامس : الـــRear Strut Bar و الـــ Rear Lower Bar








نفس الوظيفة اللي قدام لكن ورا بتمسك الجزء الخلفي للعربية في الدورنات و المناورات و تخيل مناورة مع ارض مش مظبوطة هتساعد


و اخيرا و ليس اخرا فيه قطع تانية بتتركب زي ع التانك لكن انا شايف من وجهة نظري انها للحماية اكتر بس قد يكون لها مهمة تانية معرفهاش

بس كده يا شباب هي ديه الــ (البارات او الشدادات او التقويات و الدعامات)

انا شرحت ع اد ما قدرت

يا رب يكون واضح

عرفنا بقي ايه هي الــ (البارات او الشدادات او التقويات و الدعامات)

حد يسمعهالي بقي

بالتوفيق للجميع ان شاء الله

[x_gomgom]

موضوع ممتاز جزاك الله كل خير

[Mohamed Fathy]

جميل اوى بس ده سعره كام كده؟ومين اللى يركبه

[Mzeid]

جزاك الله خيرا على الشرح

بس سؤال
ليه حضرتك كاتب في العنوان و الموضوع عن ماركة بعينها
مع أن التقويات دي في منها انواع تانية يرضه ؟

[shouk_1987]

موضوع رائع طبعا بس متهيألى أسهلهم لينا هو ال strutbar عشان مافهوش لعب كتير

[Amr Axel]

جزاك الله خيرا على الشرح

بس سؤال
ليه حضرتك كاتب في العنوان و الموضوع عن ماركة بعينها
مع أن التقويات دي في منها انواع تانية يرضه ؟

انا مش بعمل اعلان او قاصد اكتبها بس انا كتبت بحسن نيه يعني النوع المعروف للجميع و اللي كتيير بيستخدموه و اللي اعرفه :)
زي مثلا لما حد بيجي يتكلم عن العفشة الاسبور تلاقيه تلقائيا بيتكلم عن العفشة الكوني كأن كوني يعني عفشة سبور
و بالنسبة للعنوان انا كنت عايز اكتب Ultra Racing parts
لكن نسيت كلمة القطع
لو هيبقي فيه مشكلة بالنسبة لقوانين الموقع ممكن الادارة تغير الاسم و تخليه الدعامات او التقويات
انا مفيش مشاكل المهم عندي شرح القطع و كيفية عملها يوصل للأعضاء
و شكرا لمرورك الكريم :)

[Mzeid]

انا مش بعمل اعلان او قاصد اكتبها بس انا كتبت بحسن نيه يعني النوع المعروف للجميع و اللي كتيير بيستخدموه و اللي اعرفه :)
زي مثلا لما حد بيجي يتكلم عن العفشة الاسبور تلاقيه تلقائيا بيتكلم عن العفشة الكوني
و بالنسبة للعنوان انا كنت عايز اكتب ultra racing parts
لكن نسيت كلمة القطع
لو هيبقي فيه مشكلة بالنسبة لقوانين الموقع ممكن الادارة تغير الاسم و تخليه الدعامات او التقويات
انا مفيش مشاكل المهم عندي شرح القطع و كيفية عملها يوصل للأعضاء
و شكرا لمرورك الكريم :)

لا انا مش أقصد أي حاجة

انا عايز أعرف بس يعني دة احسن نوع و لا لا ؟

[Amr Axel]

موضوع ممتاز جزاك الله كل خير

شكرا ليك يا باشا نورت الموضوع

[Amr Axel]

جميل اوى بس ده سعره كام كده؟ومين اللى يركبه

و الله معرفش هنا يعمله كام تقريبا ع حسب نوع العربية
و اللي يركبه سمكري بس لازم يكون واحد فاهم عشان ميبوظش الدنيا

[bedo13]

مجهود رااااائع..
بصراحة اول مرة اشوف الشرح الجميل ده في موضوع التقويات...
شوية اسئلة بقى...
1-الFender bar والside lower bar بيركبو فين في العربية؟؟ يعني مكان التثبيت بين ايه وايه؟؟
2-الanti sway bar فيه للعجل الخلفي.. ياريت شرح ليها بردو وهل ممكن تركب في عربية اصلا مش مجهزة لكده...؟؟

[ahmedbasto]

جامد جدا

[msafa]

والله العلم نوووووووووووور

بجد الف شكر على الشرح الكافي الوافي
طب دول موجودين فين و بكام؟ و مين ممكن يركبهم

[msafa]

انا آسف سألت من غير ما اقرا الردود

[Amr Axel]

موضوع رائع طبعا بس متهيألى أسهلهم لينا هو ال strutbar عشان مافهوش لعب كتير

فعلا الــ Strut Bar مش محتاج لعب و الــ Lower Arm Bar و Side Lower Bar و Anti Roll bar و Rear Lower Bar كل ده سهل انه يركب
لكن المشكلة بقي في الــ Fender Bar اللي لازم يقطع و يرجع يركب تاني

نورت يا باشا الموضوع

[bedo13]

مجهود رااااائع..
بصراحة اول مرة اشوف الشرح الجميل ده في موضوع التقويات...
شوية اسئلة بقى...
1-الfender bar والside lower bar بيركبو فين في العربية؟؟ يعني مكان التثبيت بين ايه وايه؟؟
2-الanti sway bar فيه للعجل الخلفي.. ياريت شرح ليها بردو وهل ممكن تركب في عربية اصلا مش مجهزة لكده...؟؟

مارديتش عليا ياباشا...