افكر فى تعديل سيارتى ... الى ما حدش فى مصر جرب يعدلها قبل كدة .. صورها جوا

[mizo_1]

بسم الله الرحمن الرحيم
السلام عليكم و رحمة الله و بركاتة
------------------------------

اخوكم معتز ...جديد فى المنتدى .. و سعيد بالانضمام ليكم ..

انا معايا عربية ستروين Ax موديل 98 اعلى فئه نزلت
الى هى 1400 سى سى بجميع الكماليات بتاعة بلادها
سنتر و كهرباء و هاف باور و كده .. لو حد عنده علم بالستروين
و احنا جايبنها زيرو الحمد لله يعنى ما حدش لعب فيها
العربية فيها كل حاجتها الموتور بتاعها و عفشتها الاصلية و كل حاجة
بس طبعا العمر ما بيسيبش حد فى حاله

المهم انا من سنتين كده
كان معايا قرشين و شديت العربية من بره حلو اوى
بودى كت و جنوط سبورت 3 خرم اعتقد الوحيدين في مصر
و فرش جلد و كراسى سبورت و ساوند سيستم و الهلس كله الى انتوا عارفينه

و ما اهتمتش لا بالموتور ولا بالعفشة و لا الكلام ده
و بقيت اصلح بس لو حاجة باظت

طبعا انا ندمان بشدة .. و بقول يا ريتنى كنت رميت فيها مكنة محترمة و عفشة بنت ناس
بدل ما الاقى عيل معاه 127 يشوف الشغل الى فى عربيتى يسخن و يجرى بس هو معاه موتور
يخلى شكلى مش لذيذ .... المهم

انا كنت بفكر ابيعها ... بس تراجعت
لسببين .. انى صرفت عليها كتير
و كمان انا ركبت عربيات كتير .. ما لقتش راحة ولا ثبات فى حاجة قديمة زيها
و مريحة جداااااااااااا لابعد الحدود

خلاصة القول ... انا بدأت اجمع مبلغ من 5000 لحد 100000 جنيه بأذن الله
و نويت اعمل الى كان المفروض يتعمل من الاول
بس انا خبرتى فى المواتير و الكلام ده على قدى خالص خالص

اتمنى تتبنوا الحالة بتاعتى
و انا فعلا من فترتى البسيطة هنا فى المنتدى
عرفت ان الناس هنا اهل الكرم
و انا الحمد لله بحاول اساعد اى حد بأى معلومة اعرفها عشان الاقى المقابل

هحط كام صورة كده لعربيتى فى الرد الجاى
و اسف جداا للاطالة

[mizo_1]

محجوز

[Dr_ElSioufy]

طب الحق نزل الصور في الرد المحجوز لان معاك بس 10 دقايق تعدل فيه بعدها بخ هههههههه
وفي انتظار الصور يا زعيم

[mizo_1]

صور سيارتى

المبلغ الى ان شاء الله هنوى تجميعه هيكون من 5000 لحد 10 الاف جنية عشان بس فيه غلطة فوق و مش راضى يعدل
شوية صور لعربيتى
----------------------------------

[mizo_1]

طب الحق نزل الصور في الرد المحجوز لان معاك بس 10 دقايق تعدل فيه بعدها بخ هههههههه
وفي انتظار الصور يا زعيم

ههههههههههههههههههههههههههههههههههههه
بتقول فيها .. ما كنتش اعرف قانون الــ 10 دقائق ده
اهو الرد اتحفظ على كده :d :d
حصل خير حصل خير .. معلش جديد بقا

[aboomar22]

الجنوط مشتريها بكام ومنين وهى مقاس 14 ولا 13 برجاء الرد للاهمية بس ماشاء الله عربية تحفة

[mstool]

هاتلها عفشة سبور بريمبو اسال فى محلات الكماليات النضيفة هتلاقى هتلعب فى ال 1500 ممكن اعلى شوية كمان و شوف اكبر موتور لل اية اكس فى الحرفيين عند بتوع الاستيراد كام كامل و تجيب انضف حالة كامل بفتيسة و تكييفة و كل حاجة دة لو كنت عايز تغير او تسقط لو كان ليها اصلا يا باشا 1600 او اى حاجة اكبر من ال 1400 بس كدة انتا هتصرف اللى معاك لو عملت التعديلين دول صح و تدور على فرامل نضيفة برضة تحاول تعدلها و فية ناس بتوع تعديل ممكن يعملك العربية من الالف للياء و هياخد نسبة و يسرقك فى الاسعار شوية و هيقولك على كل حاجة قبل ما يعمل
و لو ناوى برضة تعمل شغل نسيت اقولك كاوتش عريض اعرض حاجة سواء فى ال جنط ال 13 او الجنط ال 14

[mizo_1]

الجنوط ديه جايبها من واحد مستورد اسمه شعبان الجميل فى عابدين ... بس بالطلب اخدوا اسبوعين على بال ما وصلواا

[mizo_1]

و هما 14 يا باشا ان شاء الله
و الطقم كله كان عامل 1400 جنيه .. اندونيسى
بس هو سعره رافع شويه عشان 3 خرم

[mizo_1]

موضوع العفشه في كام حاجة قدامى و ناس قالتلى على البريبمو و الكونى
بس الموتور يا باشا اعلى حاجة في الاى اكس الى معايا ده الى هو 1460
العربية الى معايا ديه كانت اعلى فئه نزلت فيها ... عشان كده مش عارف ايه ممكن ينزل فيها
انا كنت عايز اعرف لو في حاجة 1600 انجكشن تنفع ممكن تكون ايه ... مع العلم ان مفيش كبوت فى الدنيا اضيق من الى معايا ده

[love7amada]

اكيد كابوت الماروتي اضيق

[mizo_1]

اكيد طبعا .. بس الماروتى ديه عربيه اعجاز علمى اصلا