جولييت والجنوط ال18

[ahmedtunning]

بجد الجنط تحفه ربنا يباركلك فيه ولونه تحفه

[Moe86]

تجربتى
جنوط 15 صينى و عجل maxxis 195/50 بضغط 30 , إتشرخ 3 مرات فى مواقف مختلفة و بعته
جنوط 16 تايلندى SSW و عجل accelera 195/45 بضغط 30 برضو (رغم كل النصايح اللى سمعتها): فى أول شهر لبست نقرة على كبرى أكتوبر طلع بلونة فى الفردة اللى قدام و غيرتها, بعد كدة بقيت أسوق بتركيز أكبر و لكن بعد 6 شهور من البلاعات و النقر بتوع بلدنا "عادى جدا" الجنوط بقوا مش متوازنين 100% و بيعملوا رجة على السرعات و الترصيص مش جايب نتيجة
دة غير إن ظبط الزوايا مش بيكمل شهر و يبوظ و التيل بقى بيتاكل أسرع و كمان ال4 مساعدين ضربوا جابوا زيت

[Engineer_M]

:ahmed_nubira

احمد باشا والله انا من رايك فعلا مادام مرتاحيين في اللي مركبينه خلاص بس الفكره ان مش بحب الناس تخوف وترعب اللي عاوز يجرب عشان تجربه فاشله ليها ظروف معينه مش شرط تنطبق علي الكل. مبروك علينا ويارب يباركلنا فيهم ويكفينا شر المطبات والنقر. هحاول افكر في طلبك بس موعدكش :)

ahmedtunning:

الله يبارك فيك دا بس من زوقك

:mmamdouh

استاذ محمد انا اكلت انا والجماعه مطب جديد بالجنط ال١٥ ونفش الكاوتش بتاعك بالظبط في منزل الطريق اللي جاي من الوفاق والامل ونازل علي القطاميه وكنت طاير علي 130 140 والعربيه طارت من علي الازض ونزلت والكاوتش والجنوط محصلهمش اي حاجه نهائي وعامتا انا لو لبست مطب زي ده مش هزعل لا علي كاوتش ولا علي جنوط الحمد لله ان العربيه متقلبتش وحمدالله علي سلامتك

زي ما قلت يا جماعه في حاجات في بلدنا ال 13 فيها زي ال 18 والله انا كان معايا 13 وكان فيه بالونه فا مادام بايظه بايظه مستمتعش ليه وربنا هوا اللي بيسترها في الاخر حتي لو مركبين جنوط وكاوتش توك توك ... طنابيري اكبر منهم بس شكله يبقي تحفه علي الجولييت :)

:Moe

احنا اتكلمنا كتير اوي علي موضوع العفشه دا يا جماعه الوزن مهم جدا مادام الجنط اللي انت رايحله مش اتقل من اللي كان معاك يبقي إن شاء الله العفشه مش هيحصلها حاجه ثانيا كوبري اكتوبر دا من رمسيس للتحرير كارثه انسانيه وانا من زمان وانا بمشي فيه ببطء يشل واللي مش عجبه يطير هوا ويلبس براحته في الفواصل ... لاموءاخذه ياباشا مقصدكش انت :)

نسيت اقولك ان ما اسهل استعدال الجنوط هيدروليك بالكمبيوتر ودا امر عادي جدا ودا الحل المنطقي والطبيعي لما الترصيص ميجش نتيجه ولو بتاع الترصيص بيفهم هيقولك علي حد تعدل عنده الجنط في 5 دقايق وترجع ترصص وكانه جديد.

[Engineer_M]

اشرفكو وممدوح غطاطي وغيرهم في الحرفيين عندهم مكن الاستعدال ده علي فكره

[Moe86]

أنا معاك إن وزن الجنط بيفرق جدا, بس الجنط ال16 اللى كنت مركبه وزنه 8 كيلو و الجنط الرفيع الحديد ال14 اللى جى مع عربيتى وزنه 5.5 كيلو يعنى الفرق مش كبير قوى!
كمان المشكلة فى الإستعدال إنه غالى جدا خصوصا لو هتعمله كل كام شهر, الجنط الواحد ب80 جنيه على ما أعتقد

[Engineer_M]

Moe:
ماحنا بندفع قد كده في الجنوط نرميهم ولا نستعدلهم ودا لا قدر الله لو حصلهم حاجه يعني وبعدين كل كام شهر دي يبقي كتير اوي دا لو حصل ولقيت الترصيص مش بيجيب نتيجه مش علي طول علي طول.

نسيت اقولك ان الثلاثيه لما بتودي جنوط تترش بيستعدلوها - بس مش كمبيوتر - من نفسهم عشان يتاكدو انها سليمه قبل الرش.

[magyver]

ماشاء الله شكلهم حلو وسعرهم حلو

[engahmedsamy]

خطوة حلوة انا عايز انزل 17 في الانوس بس مستني اعدل فرامل

[Engineer_M]

عدل وجنط ومش هتندم انشاء الله

[engahmedsamy]

عدل وجنط ومش هتندم إن شاء الله

تكلفة التعديل ممكن اعرف في حد:ود كامU_thin1[1]:

[Engineer_M]

التكلفه
جبت الفرامل اللي قدام ب 450 نحيتين بالتيل وقعد معايا حوالي 6 شهور قبل ما اغيره
ورا النحيتين ب 500 وبردو التيل قعد معايا 6 شهور
ودفعت بتاع 150 عشان تخريم الطنابير اللي قدام ومصنعيات تركيب وحاجات كده

[Engineer_M]

ياشباب انا ركبت TPMS لان المقاس ده متعرفلوش الكاوتش نايم ولا مظبوط





وكل حاجه الي الان ماشيه زي الفل ودعواتكو ربنا يكملها بالستر دايما

[khaled_yassin]

ربنا يباركلك فى العربيه
والجهاز دة فايدتوا انوا بيعرف ضغط الكاوتش بس؟؟
ويا ريت تفاصيل اكتر عنوا

[Engineer_M]

بيعرف ضغطه وحرارته وبيديك انزار لو عجله نزلت عن ضغط معين او حرارتها زادت عن درجه معينه وبيديك انزار لو فرده ضغطها نزل فجأه (هتفرقع لا قدر الله) وكفايه كتر خيره علي قد كده

[AutoTycoon]

ياشباب انا ركبت tpms لان المقاس ده متعرفلوش الكاوتش نايم ولا مظبوط

نفس المشكلة اللي بتواجهني .. مع اني بروفايل 50 مش زيك
ممكن لو سمحت اعرف جبت الtpms منين؟