ازاى بعد ما تغير موتور العربية تبيع الموتور القديم ؟

[madawbs]

ياشباب فيه منا ناس كتير بتغير موتور العربية او بتسقط موتور اعلى واحيانا كتير بتجيب فتيس جديد بدل فتيس قديم وبترمى الموتور او الفتيس القديم او الميكانيكى ياخده باى سعر وخلاص لانك مابتقدرش تبيعه لحد يرخص عربيته بيه .

وده الى بيحصل معايا دلوقتى انا ان شاء الله هاسقط موتور 1800 فى عربيتى الجولف 2 وطبعا الموتور القديم مش محتاجه والميكانيكى بيستعبط وبيقوللى انه هاياخده ب 400 جنيه وانا شايف انه لو اتباع حديد بالكيلو هايعمل كتير جدا لان الحديد غالى قوى وعدى سعر الكيلو 6 جنيه للخردة يعنى ممكن يعمل 6 جنيه * 300 كيلو حوالى 1800 جنيه.

وغالبا الميكانيكى هاياخده يفك منه قطع الغيار الى ممكن يبيعها لزباينه لان اغلبها سليم والعربية كانت ماشية بيه كويس زى مثلا :

الكاربراتير
الموبينه
المارش
الدينامو
المشط
العمة والفلتر
الخراطيم

فقلت اعمل موضوع فى المنتدى يمكن يكون فيه حد من الاعضاء له تجربه تفيدنا او يعرف تاجر حديد او يكون حد محتاج حاجة من الحاجات دى تنفعه واهو اولى من الميكانيكى فى كل الاحوال وكدة كدة الميكانيكى هايستفيد لانه هاياخد مصنعيته فى الاخر والى غير الموتور هايستفيد لانه هايبيع موتوره القديم بسعر كويس واعضاء المنتدى ممكن كمان يستفيدوا بقعة غيار سليمة ومجانية او بسعر رمزى حسب الى هايديهالهم وزى الجماعة اليابانيين ما بيقولوا Win Win Relation.

واحب ابتدى بنفسى بالنسبة لى انا
1- الكاربراتير مش هاحتاجه
2-عمة الموتور مش هاحتاجها
3- التابلو احتمال اغيره
4- العدادات (العدادات ممكن تكون محتاجة تتظبط عند الراجل بتاع العدادات علشان بتقيس السرعة مش مظبوطة قوى بس سليمة)
5- الكراسى احتمال كبير اغير الكراسى او الصالون كله
6- الشاكمان وغالبا الشاكمان كمان هايتغير وودول بحالة كويسة ومش عاوز فيهم فلوس.

انما الى ليه سعر وممكن يتباع :
1- الفتيس مانيوال 5 سرعات امامى وواحدة خلفى كنت جايبه من 8 شهور وحالته ممتازة يعمل دلوقتى على ما اظن من 700 ل 800 جنيه استيراد ماعرفش ممكن يتباع بكام
2- غالبا هاغير المساعدين لسة جايبهم فى رمضان الى فات مساعدين مونرو زيت على هوا كنت جايب2 امامى ب 650 جنيه برضه مش عارف يباعوا بكام
3- طبعا الموتور القديم نفسى يتباع بالكيلو وكذلك المقصات برضه هاتوزن :)
4- لو احتجت اغير الطنابير الى قدام الطنابير الى راكبة جديدة المانى بقالها 3 شهور تقريبا وحالتها زى الفل انا كنت جايبها ب 250 جنيه.


فى انتظار تجاربكم ومقترحاتكم وارجو الاهتمام لان فعلا الموضوع ممكن يفيد ناس كتير

يرجى من العضو عدم استخدام اللون الاحمر, اللون الاحمر مخصص للادارة

برجاء مراجعة قوانين المنتدى

مشرف القسم

[Funky]

ايه الكلام ده

ياباشا الى هتشترى من عندو المتور الجديد الى هتسقطو فى العربيه هياخد منك المتور الى عندك دلوقتى وهتعملوا تنازول عنو فى الشهر العقارى برقم المتور وهو هيظبطوا وهيتباع تانى

[madawbs]

يافندم - صباح الخير الاول - انا سالت كتير جدا الموتور القديم مش بيرضوا يرخصوا بيه فى المرور والى بيركبلك الموتور الجديد بياخد الموتور القديم منك باى سعر ويقوللك دا مابيتباعش وماحدش بيرضى ياخده والناس كلها مابتركبش خلع والحاجات دى على العموم دى تجربتى وده الى شفته قبل كدة كتير

[mohamed2002]

تعليقا علي كلام سيادتك يا غالي
كيلو الحديد الخردة بيعمل 2.80 وليس 6 جنية
ولكن الماتور بيحوي خامات مختلفة من حديد علي المونيوم وعلي زهر
الالمونيوم الخردة بيعمل 10 جنية
الزهر الخردة بيعمل 3 جنية
الافضل انك تخلية لو الماتور الجديد نفس نوع القديم ممكن تحتاج حاجة تقوم واخدها منه وهكذا

[madawbs]

الموتور الجديد 1800 والقديم 1300 فا مفيش حاجة من ده تنفع لده
وحاجة تانية مهمة حتى لو ينفع هاخليه فين احطه فى الصالون مثلا لو كان عندى مخزن ولا جراج خاص كان ممكن على العموم اوعدك اول ما اجيب الفيللا هاخلى الموتور القديم احتياطى

على العموم واضح ان فكرة توزيع الحاجات الى الواحد محتاجلها مش عاجبة حد على العموم مافيش مشكلة اعتبروا انى ماقلتش حاجة وكفى الله المؤمنين القتال ويتبقى الحاجات دى من نصيب الميكانيكى رزقك يا عبدالله

[iBiZa]

انا سالت كتير جدا الموتور القديم مش بيرضوا يرخصوا بيه فى المرور

لأ يا باشا كل حاجة تنفع بس الموضوع يتعمل صح.
انا عملتة قبل كدة مع واحد صاحبى و هقولك على الخطوات:
1-انت تفك الموتور القديم و تركب الموتور الجديد {علاشان تتاكد ان الجديد شغال و مش هتحتاجة تانى.
2-هو يركب موتورك القديم و يتاكد ان كلة تمام.
3-تروح انت و هو الشهر العقارى بتاع السيارات و تبيعلة الموتور الى مثبوت على رخصتك {مش فاكر هياخدوا كام بس كان فى حدود 50 جنية} و لازم طبعا صورتين من بطاقتكم و رخص السيارات.
4-تروح انت ترخص الموتور الجديد و تثبتة على الرخصة.
5-يروح هو يطلع شهادة بيانات بالموتور من المرور بتاعك.
6-يروح المرور بتاعة يعمل فحص و المهندس هيطلب مطابقة بصمة.
7-هياخد الورق و يروح المرور بتاعك و يطابق البصمة مع الى فى الملف.
8-يرجع لبتاع الفحص فى المرور بتاعة يختملة عليها و يكمل الاجراءات عادى.

[madawbs]

والله خير الى عاوز يشيل ياباشا وانا تحت امره بس انا عارف انها هاترسى على الميكانيكى فى الاخر.

[3mr Farrag]

هو في حد برضوا يشتري موتور قدبم كاربارتير و 1300 سي سي!!!!!!
هيعمل بيه ايه....اللي بسقط موتور بيركب حاجه اجمد من القديم
او علي الاقل بيجيب حاجه عاديه بس انجكشن

[madawbs]

هو في حد برضوا يشتري موتور قدبم كاربارتير و 1300 سي سي!!!!!!
هيعمل بيه ايه....اللي بسقط موتور بيركب حاجه اجمد من القديم
او علي الاقل بيجيب حاجه عاديه بس انجكشن

ماهو ده الى انا قلته من الاول يتباع حديد احسن

[tarekmomo]

ادية للميكانيكى الى عملك العمرة وهوهيتصرف فية ممكن يبعهولك كقطع غيار وكدة افضلك tarek momooooooooooooooooooooooooooo

[modux]

انا لما سقطت الموتور اللي عندي ده
الراجل اخد الموتور القديم ب الف جنيه

و الموتور الجديد باعهولي ب 4500

سعر معقول بالنسبة لموتور معمر قبل كده و غير كده 3 سلندر !!!! و الكل بيرميه

[madawbs]

ده موتور ايه ده ؟؟ قصدى نوع العربية ايه ؟؟؟

[Akram]

طبيب لما انت كنت عايز تسقط موتور , ليه كنت بتشتري حاجات جديدة و بتظبط الموتور القديم , ما كنت توفر أحسن ,
على العموم اللي انت بتعمله صح انك عايز تشوف لو حد محتاج حاجة من اللي عندك و ربنا يجازيك خير على نيتك ,
بس اسأل تاني عند اكتر من محل بيع إستيراد أو في الحرفين أو في عزبة شلبى أو الوكالة ,
و لو رسيت على الميكانيكي يبقى انت حاولت .

[Xpert]

اللي انت بتعمله دلوقتي ده احسن فكره في التصرف في الحاجه القديمه .. لانه فعلاُ اللي هاياخده منك هاياخده رخيص ... بس فيه نقطه ...
التاجر لو خده منك ماتجبش ماتشتريش من عنده حاجه .. لان ده بيبقي نوع التاجر اللي يقولك : انا عندي اللي انت عاوزه بس مش نمره واحد ...(اه ساعات كتير بيبقي المستوردين نفسهم عندهم حاجات مش نمره واحد ... بس المستوردين معروفين مكانهم في بورسعيد .. و اللي قاعد منهم في القاهره و الاقاليم معروفين بالاسم) ...
جميع ما تم حله من العربيه بيتباع بسعر رمزي ......
تخللي الميكانيكي يفك الموتور و تاخده مخرطه بتاعه العمره و يقيسلك : المرنك استاندرد ولا لاء .. و نفس النظام للبساتم و كل حاجه جوه الموتور يتكشف عليها قبل بيعه اجزاء و اللي يختاج حاجه تقوله حالتها و تقوله انها مخلوعه من عربيتك لانك ركبت موتور اكبر
بتبيع كل ما هوه راكب في الموتور و تسيب البلوك عندك .. لو البلوك بتاع العربيه الاصلي و رقم الموتور هوه هوه رقم الشاسيه .. بتركن الموتور علي جنب بحيث انك لو بعت العربيه تدي للمشتري البلوك الاصلي بتاعها (كنوع من ال matching numbers) و بحيث انك تديله حريه اذا كان عاوز العربيه اوريجينال يبقي يبني الموتور من جديد ..
لو مش البلوك الاصلي بيعه لبتاع الخرده بالكيلو ...

[madawbs]

موضوع تغيير الموتور فشل فشلا زريعا بسبب ان البهوات فى الحرفيين مش عاوزين يبيعوا كله على بعضه ولكن عاوزين يبيعوا قطعة قطعة يعنى الموتور بفتيسه لحده والتكييف لوحده (وطبعا كومبريسور بس من غير سربنتينة ولا كويل ولا حاجة ) والعفشة لوحدها والباور لوحده (وطبعا من غير علبة الدريكسيون ) وهكذا يعنى علشان تقفل الموتور عاوز 3 او 4 الاف جنيه كمان فطبعا ده موضوع فاشل فانا نزلت جنطت العربية جنوط فرنساوى استيراد شكلهم جميل وخفاف على العفشة جدا وجبت اربع فرد كاوتش جداد (هانكوك اصلى من اولاد صبرة فى المنيل ) وركبت تكييف Sanden يابانى جديد وفيمت زجاج البيبان نص من فوق علشان ماحدش يبق معايا فى لجان المرور وكدة بقت العربية 10 على 10 مش ناقص غير شوية سمكرة وبوية واغير الفرش الداخلى وان شاء الله يتعملوا قريب