ماسوره شكمان 2 بوصه

[disha_2020]

برجاء المساعده لاهل الخبره.

انا معايا عربيه 127 950 سي سى وعاوز اعدل الاداء لاحسن فى فكرت انى اجيب ماسوره جكمان 2 بوصه واركب عليها علبه جكمان بتاع عربيه فيرنا او اى موديل جديد من غير علبه النص انا مش عاوز اركب ديفل لاسباب كتير اولها الدوشه والمرور مش عاوز مخلفات انا المهم عندى الاداء وان العربيه تكون احسن فى الحرق والتجميع وشكرا

[دعبدالرحيم]

القطر الكبير هيقلل السحب وياكل بنزين ...وبس

[aliyehia]

اخي العزيز
اولا انا من هواه السيارات القديمه
ثانيا خلي تركيزك يكون مش في حرق و تجميع احسن انما في صيانه و عنايه احسن ماتخليش العربيه تعطل بيك و تقل اصلها
خد الخبره دي مني
مهما عملت في عربيتك من افتكسات حتلاقي عربيه فيرنا ولا اسبرانزا بتعديك بسهوله و يجيلك احباط
وربنا يوفقك

[ahmed_eng2001]

القطر الكبير هيقلل السحب وياكل بنزين ...وبس

ممكن حضرتك تشرحلنا اكتر ازاى القطر الكبير لماسورة العادم يقلل السحب و ياكل بنزين ؟؟؟!!

[دعبدالرحيم]

القطر الكبير هيقلل ال الضغط العكسي لكبس الموتور وبالتالي هيضعف السحب وصوت الموتور يعلي وتدوس بنزين من غير فائده في السحب وتهدر بنزين بالفاضي..وشكرا

[ahmed_eng2001]

القطر الكبير هيقلل ال الضغط العكسي لكبس الموتور وبالتالي هيضعف السحب وصوت الموتور يعلي وتدوس بنزين من غير فائده في السحب وتهدر بنزين بالفاضي..وشكرا

اسمحلى استفسر عن بعض حاجات ...
قبل ما اختلف مع حضرتك جملة و تفصيلا .....

الضغط العكسى الى هو back pressure ؟؟ حضرتك تقصد ان ماسورة العادم حتعمل ضغط عكسى على المحرك ؟
المفروض انهم عملو صمامات الطرد ( صبابات ) اكبر حجما من صمامات السحب علشان السلندر يطرد اغلب نواتج الاحتراق بسرعة و بشكل اكبر ... و بالتالى ... ماسورة العادم لازم هى كمان متعملش ضغط عكسى علشان تساعد على سرعة خروج العادم من السلندر
صوت الموتور حيعلى و ده حقيقى .... فيمكن تركيب علبة شكمان ذات حجم كبير نسبيا

حجم الهواءالى داخل للمحرك محدد بحجم السلندرات ( ده مع الفرض ان الموتور مظبوط ) بمعنى ان الموتور مش حياخد اكتر من حجمه من الهواء ( فى حالة عدم وجود تربو ) .... و بالتالى مش حياخد اكتر من نسبة الوقود الى الموتور عاوزها
اهدار البنزين على الفاضى بيتم فى بعض الحالات القليلة ... زى ان جزء من البنزين بيتحرق علشان يحافظ على درجة حرارة الغرف .. نتيجة عدم وجود ترمومتر الكوعة على سبيل المثال
رشاش بيسيل .. و ده عيب فيه
خلل فى حساس TPS و ده يدى امر للكونترول ان البوابة مفتوحة ... فيقوم الكونترول برفع RPM حتى لو العربية واقفة Ideal

زيادة قطر ماسورة العادم حيحسن الاداء فى حدود معينة ... و حيعلى الصوت بدرجة كبيرة
بس مش ده الى حيحسن الاداء بدرجة ملحوظة
تقبل مرورى و احترامى

[دعبدالرحيم]

تسلم يا بشمهندس احمد علي الرد العلمي من حضرتك..ولكن انا عن تجربة دا اللي حصل معايا لما عملت كدا في عربيتي..تقبل تحياتي

[ahmed_eng2001]

تسلم يا بشمهندس احمد علي الرد العلمي من حضرتك..ولكن انا عن تجربة دا اللي حصل معايا لما عملت كدا في عربيتي..تقبل تحياتي

ربنا يباركلك ....

ياريت حضرتك تحكى عن تجربتك علشان نتعلم منها .... التجربة العملية هى المقياس ... مش النظريات ...
انا كنت عاوز اغير ماسورة الشكمان ... و الصنايعى بتاع الشكمانات هو الى لفت نظرى لموضوع الاقطار ده

سعيد دائما بالنقاش مع حضرتك

تقبل تحياتى و احترامى