ما هي خطوات التعديل الرياضي من A -z

[lordnykon]

حضرتك انا عضو قديم في المنتدي الاخر المقصود .. و اعرف كل من صاحب المنتدي و صاحب الموضوع و الاعضاء الاخري القديمه فيه .. الموضوع اتكتب بالاتفاق بين صاحب الموضوع و صاحب المنتدي علي اساس انه يبقي خاص حصرياً بالمنتدي التاني و يخدم كدرس للي لسه داخل المنتدي جديد .. و حتي تلاحظ ان الدرس محطوط علي السايت الخاص بره و ليس بداخل المنتدي .
اعتذر بشده لاحداث القلق في الموضوع .. لكن المفروض ان نعطي كل ذي حق حقه .
كان فيه موضوه اخر بيتكلم عن التيربو تم نقله علي هذا المنتدي و هذا الموضوع يخص احد الاعضاء علي السايت المذكور و تم نشره في جهه معينه برضه .. و الكلام ده مش كويس لان اذا وجد علي المنتديات المقصوده شخص حب ينقل موضوع معين من منتدي معين بيتم ذكر المصدر . يا جماعه ده مجهود ناس ماينفعش ناخده كده و خلاص
و شكراً :)

اوافق بشده علي هذا الكلام و انا شايفه كلام مضبوط .. انا نفسي عضو علي كلا المنتدين و مارضتش انقل الموضوع ده و المواضيع الاخري لهذا السبب ..

[MMamdouh]

انا شايف ان الراجل كتب ان الموضوع مش من تاليفة لكن هو جابة من على النت... ايه بقى المشكلة؟؟

و مع احترامى الشديد بردة هو منقلش موضوع خطير يعنى او حاجة اخدت سنين بحث... دى أ ب التعديلات و موجودة على الانترنت فى مليون سايت فا القصة مفيهاش "مجهود" زى ما انتم متخيلين يعنى... و حسب كلامكم الموضوع مكنش اصلا عربي يعنى الراجل برضة عمل "مجهود" و ترجم الموضوع

MMamdouh

[Ignition-Kid]

بص يا سيدي خطوات التعديل
نبتدي بالموتور
بص عشان تعدل اداء موتورعربيتك قدامك حلين
1-تسقط موتور اكبر واقوي
ود موفره اكتر بس المشكله في الورق بتاع المرور وحاله الموتور اللي هتسقطه وقطع الغيار ويستحسن الموتور يبقي بفتيسه وياريت بالعفشه بتاعته والفرامل بتاعته

2-تعدل الموتور اللي عندك وده كالاتي

1-stroker kits

ودي بتتم بأنك مثلا لو عندك موتور 1800 سي سي ممكن تخليه 2000 والعكس بتغيير عمود الكرنك مثال (موتور ال 504 ال 1800 والموتور ال2000)

2-out bore
ودي بيتم فيها تكبير الموتور بمعني انك بتركب بساتم اكبر عشان تزود السعه اللتريه

3-go forced induction (اجهزه تزويد القدره )
ودي زي التربوتشارجر والسوبر تشارجر والنايتروس والحاجات دي ليها قواعد معينه في تركيبها مثلا لو انت عايز تاخد اداء صح من موتورك بالتربو هتضطر تغير بعض الاجزاء الداخليه لموتورك وهتركب حاجات احسن وافضل بمعني هتغير الكرنك والبيلات بحاجات اقوي عشان تستحمل التربو وتغير البساتم ببساتم ذات ضغط منخفض

4-exhaust
ودي عباره انك بتعدل نظام العادم عندك بمعني كل ما مجاري العادم تكبر عندك العادم يخرج اسرع والموتور يتنفس احسن وده بيتم بأنك تركب مواسير ابر وهيدرز للشكمان عندك

5-port and polish headودي عباره عن انك تكبر مجاري الهواء والبنزين عندك (الصبابات ) ودي بتسهل عمليه دخول البنزين للموتور وعمليه خروج الهواء(العادم )

6-engine weight reduction
ودي بمعني انك تخفف وزن موتور العربيه وبتبقي بأنك تجيب مكونات من مواد اخف مثلا كرنك او فلام او بيلات اخف علشان تقلل الفقد في قدره المحرك

7-engine fuel management
طبعا بعد ده كله مخلوط البنزين والهواء هيحتاج يتظبط فهتضطر تعدل نظام حقن الوقود (الكربراتير ) وبتركب مكونات تانيه
bigger injectors , reprogramable engine management unit , higher flow fuel pump , fuel regulator ,


الجزء التاني وده مرحله متقدمه هيا انك تعدل في العريبه نفسها

8- Drivetrain upgrad
ودي بيتم فيها تعديل نظام الجر في عربيتك بمعني انك بتغير نسب التخفيض بتاعت الفتيس والكرونه حسب احتياجاتك لو عايز عزم اعلي او سرعه اعلي ودي بيسموها gear ratio وممكن كمان تستعمل short shift kit ودي عباره عن تعديل لعصايه الفتيس علشان يبقي مشوارها قصير (الثانيه بتفرق في السباقات ) وممكن كمان تركب اسطوانه وديسك رياضي

9-difranssel upgrade
ودي بالنسبه للعربيات الدفع الخلفي ودي بتتم عن طريق تركيب كرونه لوك ودي بتبقي كرونه العجلتين فيها بيلفوا مع بعض وبنفس السرعه والقوه وبيبقي لها نسب مختلفه وممكن تعرف الرونه اللي في عربيتك لوك ولا لا عن طريق انك ترفع العجلتين الللي وراء وتمور الفتيس وتلف عجله من الاتنين لو لفوا مع بعض في نفس الاتجاه تبيق كرونه لوك لو لفوا عكس بعض يبقي مش لوك

10-suspension
ودي بقي تعديل نظام التعليق او العفشه وبتتم عن طريق انك تركب مساعدين وسوست رياضي ودي بتدي ثبات اعلي وبتوطي العربيه عشان مركز الجاذبيه عشان الثبات وممكن كمان تركب بارات في الكبوت والشنطه والعربيه من تحت عشان الشاسيه وممكن كمان تركب camber plates ودي لازمتها انها بتظبط زوايا العجل عشان السباقات وكده وممكن تركب علبه دريكسيون تاني

11-Brakes
تعديل الفرامل عشان تعرف توقف العربيه عشان بعد ماتديها القوه دي مش هتعرف توقفها وبيتم عن طريق انك تركب قطع مخصوصه performance parts

12-tires & rims
طبعا بتركب كاوتش عريض وجنوط اكبر ولازم تكون خفيفه عشان الوزن


نيجي للمرحله الاخيره ودي مرحله متقدمه اوي اوي اوي

weight reduction
طبعا بتخفف وزن العربيه عشان كل ما العربيه تخف هتبقي اسرع لان الموتور هيبقي بيجر وزن اقل وبيتعمل فيها الاتي

تشيل كل حاجه مالهاش علاقه بالاداء في عربيتك (تكييف- كاسيت- استبن -الكنبه اللي وراء)
تغير الزجاج بحاجه اخف اسمها plexi or macrolon
تغير الصاج كله من رفارف وشنطه وكبوت وخلافه بحاجات مصنوعه من ماده اسمها كاربون فايبر عشان تبقي خفيفه جدا
بتغير الكراسي اللي قدام بكراسي رياضي (ريكارو مثلا )وبتبقي اخف
تلعب في الضفيره وتشيل كل السلوك والتوصيلات اللي مالهاش لازمه
حتي اللباد الحراري بتاع العزل تشيله

styling
وده بيتم فيه انك تشيل كل حاجه مش انسيابيه عندك وتركب حاجات انسيابيه مكانها عشان مقاومه الهواء للعربيه

كده انت عدلت عربيتك من الالف للياء ومفيش حاجه تاني تتعمل علي فكره الكلام ده مش كله كلامي فيه حاجات فيه من ع النت وانا مترجمها ولو حاولت تعمل كده في مصر مش هتوصل غير لنسبه 20 او 30 في المائه من الحاجات دي
ومعلش لو كان كلامي كتير وشكلي صدعتكم معايا

مع تحياتي /أسلام البنا

Perfect