ثبات الميرا

[عزيز محمد]

السلام عليكم ورحمة الله وبركاته

معلش أنا قلت اكتب هنا بدل ما أفتح موضوع جديد خصوصا إنى بدور على حل لنفس المشكلة

عربيتى الميرا وزنها تقريبا 725 كجم وقاعدة عجلاتها ضيقة نوعا ما، وفى الملفات باكون مقلق منها بصراحة

ثم إنى بامشى بيها كتير على طرق سريعة (الدائرى والأتوستراد)

فهل يا ترى تغيير الإطارات الحالية (مقاسها 145/70/12) بإطارات اعرض ممكن يديها ثبات أكثر؟؟

وهل فى حالة تعريض الإطارات لازم أركب جنوط سبور ولا ممكن جنوط عادية؟؟

أنا فكرت شوية ووجدت إنه باستخدام طريقة الحساب اللى شرحها أستاذ إسلام شاهين قبل كده فالإطارات الحالية تعمل 20.12

اقتراحات:

150/60/13 وتعمل 20.2 أو

155/65/12 وتعمل 20.06 أو

170/60/12 وتعمل 20.16

معلش هى المقاسات دى ممكن تكون غريبة شوية عشان أنا وفقتها بنفسى :mrgreen: لتعطى نتيجة قريبة من نتيجة الإطارات الحالية.

جزاكم الله خيرا

والسلام عليكم ورحمة الله وبركاته

[Adham]

بالنسبة لموضوع الأكسيل انا مؤيد تماما للأستاذ Cars_Lover ان التعديل مش مضمون و ان دي ارواح ناس

و فعلا واحد صاحبي زمان حب يعدل في اكسيل قام قص المساعدين علشان يوطيها و يزيد ثباتها

برغم تحذيرات من واحد صاحبي بس هوة ماسمعش الكلام ومشي ورا العفشجي

بعد اسبوع مقص العجل اتكسر وهوة ماشي و العربية كانت حاتتقلب ستر ربنا انة كان ماشي على سرعه واطية

احنا بس نقول تعدلات بسيطة في المضمون زي كاوتش واطي و عريض مثلا او الاهتمام بالعفشة و الجلب و خلافة

و الأهم ضبط هواء الكاوتش بدقة بمقياس ديجيتال محترم و مراعاة الضغط المحدد من قبل مصنعي السيارة (مكتوب على قايم باب السواق) و صدقوني الموضوع دة بيفرق جدا جدا و بالذات ان مقاييس الكاوتش في بلدنا عند بتوع الكاوتش بايظة و غير دقيقة بالمرة و كلهم بيزودوا الكاوتش هواء زيادة
و الاحسن نفخ الاطارات نتروجين علشان مايتمددش مع السخونة و السرعه و يزود الضغط داخل الكاوتش و يقل ثبات العربية و يعرض الإطار للانفجار كمان

و ممكن تركيب طقم سبويلر عالعربية لانة بيقلل دخول الهواء تحت العربية و بالتالي يزود ثباتها
و ياسلام لو كساحة كاوتش تحت الاكصدام الامامي ( زي بتاعه الابيزا) بتقلل قوي الهواء تحت العربية و مش بتتكسر في المطبات

و السبويلر الوينج الكبير اللي بيركب عالشنة ورا اسمة GFL اللي كان بينزل زمان اخر التسعينات و بيركبوة عالجولف و الابيزا بالذات
دة برضة هايل في زيادة ثبات العربية لانة بخللي الهواء يضغط العربية عالارض عالسرعات العالية (عن تجربة)
بس لازم لما يركب يكون مرفوع لفوق يعني يكون ميلة من الطرف فوق الاكصدام الخلفي اعلى شوية من مستواة عند الزجاج الخلفي
و إلا تكون النتيجة عكسية و يسبب غربلة عالسرعات

حيث انة بيشتغل عكس نظرية جناح الطائرة

و الاعتاب اللي بتركب تحت الابواب بتقلل دخول الهواء تحت العربية و بخاصة في الملفات و بالتالي بتزود ثباتها في الملفات

يعني يا جماعه السبويلر مش منظر و الله و انما هو هام جدا للايروديناميكية بتاعه جسم العربية و بيكون بحساب ولية نظريات و حسابات

[HNaga]

الاخوه الاعزاء : كل شركه تصنع سيارات عند تصميم السياره تحسب حسابات الوزن و قوة الشاسيه والسرعه و الثبات والامان واستجابة الفرامل وقوة الماتور ..الخ
أنا مقتنع بللى بتقولوه ..بس أنا شايف أن كل حاجه فى السياره مرتبطه ببعضها البعض.
فالسؤال هنا ...هل شركة هيونداى عند تصميمها للاكسيل ما كانتش قادره على وضع جنوط أكبر أو كاوتش أعرض أو أى حل من اللى بتقولوه...

الثبات نتيجه لجودة تصميم السياره من الاساس ..و ممكن نحس ذلك فى بعض السيارات التى بدون كاوتش عريض أو جنوط كبيره والسياره ثابته على الطرق السريعه بشكل غريب (بعض موديلات الستروين - الهوندا - الالمانى بصفه عامه - البيتلز كاوتشها رفيع جدا و مش واطيه على الارض لكن شوف ثباتها الغريب)

أكيد تقدر بس برضه لاحظ ان الشركة بتفكر فى السعر النهائى جنوط أكبر معناها عفشة أقوى معناها تكاليف أكثر فى مساعدين ب 100 جنيه و مساعدين ب 5000 جنية

مش معقول إنهم يحطوا مساعين و سوست لعربية 100 حصان زى مساعدين وسوست لعربية 200 والا 300 حصان

[MMamdouh]

بالنسبة للميرا ممكت تركب جنوط 13 مش سبور بس اتاكد انها مش حتحك فى المساعد او الرفرف اما مقاس الكاوتش حيبقى 13/55/165 او 13/55/155

لو مش عايز جنوط ممكن تجيب 12/65/155 او 12/60/165 بس انا معرفش اذا كان المقاسات دى موجودة اصلا ولا لا

MMamdouh