يعنى اية stroker kits

[mohamed777]

السلام عليكم ورحمة الله وبركاتة
كنت بقراء موضوع (اعرف كل حاجة عن التعديل) ولقيت تعديل اسمة stroker kits
يعنى اية بقى بالظبط واية الفرق بينة وبين تعديل اسمة out bore
لانه اللي فهمتة ان الاتنين بيوسعوا فى البساتم وزياده للسعة اللترية للمحرك
ارجو الافادة وجزاكم الله خيرا

[MMamdouh]

الاول لازم نوضح السعة اللترية للمكنة بتيجى منين... السعة لاللترية عبارة عن مساحة سطح البستم مضروبة فى مشوار ابستم من النقطة الميتة السفلى الى النقطة الميتة العليا فى عدد البساتم... اذا زيادة سعة المحرك بتيجى من زيادة قطر البستم او زيادة مشوارة او زيادة عدد البساتم

stroker kit

دى بتبقى كيت مكونة من كرنك و طقم بيلات معمولة لمحرك معين... البيلات بتبقى اقصر من الاصلى و الركب بتاعت الكرنك بتبقى اوسع

بعد تركيب الكيت دى البستم حيتحرك مسافة اكبر و بالتالى السعة اللترية للمكنة بتزيد لان رقم الstroak زاد عن الطبيعى

فيه بعض العربيات ممكن يتعملها stroaking من غير كيت رياضية زى مثلا ال128 ال 1100 ممكن تبقى 1300 و المازدا ال323 بتاعت التمانينات ممكن تبقى 1500 بدل 1300 و كذلك اللانوس ال 1350 ممكن تبقى 1500

كل الفكرة ان البساتم اللى فى البلوك تبقى نفس القطر فى الموتورين اللى بالسعة اللترية المختلفة و فى الحالة دى حيبقى الفرق فى السعة جاى من مشوار البستم مش قطر البستم

http://en.wikipedia.org/wiki/Stroker_Kit

out bore

التعدديل دة ببساطة هو خرط البلوك لتوسيع فتحات البساتم و تركيب بساتم اكبر و بالتالى مساحة سطح البستم حتبقى اكبر و سعة المكنة حتزيد... طبعا التعديل دة اصعب من التعديل الاول لان بيبقى فيه شغل خراطة و لازم المكنة تتفك بالكامل بالاضافة الى انة ممكن مينفعش فى بعض المكن لو المسافة بين فتحات البساتم اصلا صغيرة

MMamdouh

[mohamed777]

فتح الله لك يا استاذ ممدوح
انا كده وضحت الرؤيا عندى
بس ال stroker kit هيزود مشوار البستم يعنى هيزود العزم بس هيقلل من التسارع
لانى على قدر معلوماتى ان كل ما زاد طول المشوار كل ما زاد عزم المحرك على حساب التسارع
وكل ما قل طول المشوار للبستن بيكون تسارع المحرك افضل بس على حساب العزم

وطقم الstroker kit للمازدا 323-1300cc ثمنة كام؟
ده انا لسة معمرة الموتور من شهر وماكنتش اعرف التعديل ده.....الحمد لله على كل حال

وشكلة كده تعديل مش معقد زى باقى التعديلات

[MMamdouh]

لا مش حيحصل اللى بتقول علية دة لان انت زودت العزم بتاع المكنة و القدرة ما هى الا العزم مضروب فى الRPM ومقسوم على 5250 بالتالى الزيادة فى العزم حتزود القدرة و بالتالى التسارع و السرعة القصوى للعربية حيزيدوا مع بعض

التاثير الجانبى للموضوع دة هو ان معدل تاكل البساتم حيزيد لانهم بقوا يمشوا مشوار اكبر بعد التعديل

بالنسبة للماذدا فا هى ملهاش كيت للتعديل لكن تقريبا فيه مكنة 1500 للعربية دى و لو اخدت منها الكرنك و بيلات و ركبتهم عندك حيبقى عندك مكنة 1500... بس طبعا لازم تركب الكربراتير الاكبر

MMamdouh

[badblood]

الله ينور عليك يا ابو يوسف
تسلم ايدك وجزاك الله خير