هوا للموتور من فتحة الأكصدام الأمامى

[running_man]

الى باشمهندس ممدوح :-)
كنت عاوز اسأل حضرتك .....أنا معايا أفيو ؟ هي بتاخد هوا للموتور منين؟
أنا بصيت تحت البوكس اللى فيه الفلتر لقيت بايب ثابته جامد . خفت اخلعها...البايب دى واخدة من حوض ال موتور.....متهيألى الأفيو زي اللانوس......



ثانيا ....هل ينفع تاخد هوا من الأكصدام الأمامى ؟ فيه فتحه شبك جنب الفوج لايت؟
هايزود الأداء علي السرعات العاليه مع سرعة دخول الهوا؟
هايوسخ الفلتر أسرع؟
و ممكن أعمل الحوار ده من غير ما أخرب حاجه؟
أنا باعرف أغير فلاتر و أحل و أربط كويس...الخ؟
وللا أروح لحد أحسن ؟ و مين كويس
هل فيه كيت جاهز زى كده؟تبقى أسهل..



ده اللى أنا عاوز أعمله تقريبا..
شكرا.....

[fahd_628]

حضرتك تقصد فتحة زى الى انا مشاور عليها بالسهم ؟

[MMamdouh]

تحت البوكس فى حاجة اسمها resonator او زى ما بيسموها هنا المكملة او الزير و دى كل وظيفتها كتم صوت سحب الهواء للموتور عشان صوت العربية يبقى هادى... بس دى بتسبب خنقة للموتور

انت ممكن تشيل الresonator دة و تعمل ماسورة PVC من قاعدة العمة الى فتحة فى الاكسدام عشان تسحب هوا اكتر... ال PVC رخيص و سهل التركيب بس الفتح فى الاكسدام لازم يبقى بحرص عشان ميتشوهش و القصة دى حتزود الموتور بتاع 2 الى 3 حصان و حيبانوا معاك على لفات عالية

القصة دى حتخلى صوت الموتور عالى و طبعا الفلتر حيتوسخ بغباء لان اى دبانة حتعدى من قدام فتحة الاكسدام حتتشفط على الفلتر و طبعا انت عارف بلدنا كلها تراب و فى الشتاء حيبقى فيه رزاز ميه كمان يعنى الفلتر حيتغير بدرى بدرى... فى اللانوس عندى مكنتش مشكلة لان الفلتر ب 25 جنية بس اعتقد الافيو حيبقى اغلى بكتير

MMamdouh

[running_man]

thx ya basha

[running_man]

طيب يا باشا أفك الريزونيتور ده ازاى؟
واجيب الماسوره منين؟
و أمشى الخرطوم أو الماسورة ازاي لحد الأكصدام جنب الفوج لايت؟
حضرتك كنت عامل الموضوع ده عندك بنفسك ولا عند مين؟
و الفلتر الاستوك بتاع العربية ممكن يتغسل بميه و صابون و يتنشر ولا يبوظ؟
و الحوار كله بيخنق العزم عند لفات قليله ولا مابيفرقش؟
و ايه رأيك اركب سلك زى بتاع شباك البيت علي طرف الماسوره عشان الدبان و الزلط و التراب الكبير؟
حضرتك بتدى الفلتر بتاعك فرشة زيت باور من انهى ناحية .......اللى داخل فيها الهوا ولا اللي طالع منها عالموتور؟
و ينفع زيت موتور أو سبراى
WD-40
بتاع التزييت مثلا؟


thanx a lot again

[MMamdouh]

طيب يا باشا أفك الريزونيتور ده ازاى؟

مش عارف... اصلى مفكتوش فى افيو قبل كدة بس عموما مش حيبقى معقد... اسهل حل انك تفك العجلة و الكارتيرة الفبر و ساعتها حتشوف الريزوناتر اللى غالبا لو زى اللانوس حيبقى راكب بصامولتين 10 و خطاق... الخرطوم بتاعة حيبقى راكب بكلبس فى البودى

واجيب الماسوره منين؟

لو ماسورة ستانلس يبقى من هاى ديزاين فى شارع دمشق او استعمل مواسير PVC بتاعت السباكة لو الشكل مش فارق معاك

و أمشى الخرطوم أو الماسورة ازاي لحد الأكصدام جنب الفوج لايت؟

من البوابة و تعدى من الفتحة اللى بتوصل العمة بالريزونيتور و بعدين الى فتحة الفوج

حضرتك كنت عامل الموضوع ده عندك بنفسك ولا عند مين؟

كنت عاملة بنفسى

و الفلتر الاستوك بتاع العربية ممكن يتغسل بميه و صابون و يتنشر ولا يبوظ؟

انا عملت كدة فى فلتر اللانوس و نفعت... معرفش الافيو ايه نظامها

و الحوار كله بيخنق العزم عند لفات قليله ولا مابيفرقش؟

المشكلة حتبقى فى اللفات القليلة و لو ركبت SRI حتبقى فيه مشكلة الهوا السخن فى الصيف مع التكييف

و ايه رأيك اركب سلك زى بتاع شباك البيت علي طرف الماسوره عشان الدبان و الزلط و التراب الكبير؟

اكيد فكرة كويسة عشان تقلل احتمال ان الفلتر بتبهدل من الحصى و الرمل

حضرتك بتدى الفلتر بتاعك فرشة زيت باور من انهى ناحية .......اللى داخل فيها الهوا ولا اللي طالع منها عالموتور؟

الناحية اللى بيدخل فيها الهوا بحيث التراب يترسب على الفلتر من برة

و ينفع زيت موتور أو سبراىWD-40 بتاع التزييت مثلا؟

الWD40 خفيف اوى و حيطير بسرعة و اعتقد زيت الموتور تقيل... عموما ممكن تجرب زيت الموتور و تقوللى... انا شخصيا مرتاح للباور

thanx a lot again

اى خدمة

MMamdouh

[DriftKing DK]

طب يا ممدوح باشا الحوار ده كله ما ينفعش عندي هنا في الشاهين ال2006 ويا تري هتزود الحصان اد ايه....معلش هنتعبك معانا

[MMamdouh]

ينفع بس الفرق مش حيبقى كبير عموما جرب مش حتخصر حاجة

MMamdouh