أقوى موتور بعد التعديل

[m_o_sakr]

كنت بتكلم مع أصحابى فى موضوع تعديل العربيات و المحركات و كنا مختلفين هل التعديلات تؤثر على عمر الموتور بالسلب ولا ملهاش تأثير كبير؟
و هل موضوع التعديل مستاهل ولا مش مستاهل الفلوس الى بتدفع فيه؟
و لو الموتور معمول من سبايك الألومنيوم ينفع يتعدل ولا مينفعش؟
و سؤال كمان محدش عرف يجاوب عليه إجابه قاطعه : إيه الى ممكن تعدله فى موتور عربيتك من غير ميخرج العربيه بره الضمان؟؟؟

و طبعاً الكلام كتير و موصلناش لنتيجه, قلت لازم أحط الموضوع فى أيد الخبراء و هما يقولو المفيد و الخلاصه,,,,

[MMamdouh]

كنت بتكلم مع أصحابى فى موضوع تعديل العربيات و المحركات و كنا مختلفين هل التعديلات تؤثر على عمر الموتور بالسلب ولا ملهاش تأثير كبير؟

التاثير الاكبر بيبقى من طريقة استعمالك للموتور و العربية بشكل عام و كمان مراعاه الصيانة الدورية.. يضاف ليها طبيعة التعديلات و دقة عملية الtuning اللى بتتعمل بعد التعديل

يعنى لو واحد مركب فلتر و شكمان و كابلات سبليت فاير و بيراعى عربيتة حتعيش اكتر من عربية ستوك صاحبها بيهمل صيانتها

انا اعرف عربية نوبيرا فى بولندا راكب عليها تربو و العربية ماشية بيه 20 الف كيلو لحد دلوقتى و بدون اى مشاكل

و هل موضوع التعديل مستاهل ولا مش مستاهل الفلوس الى بتدفع فيه؟

اكيد طبعا يستاهل

و لو الموتور معمول من سبايك الألومنيوم ينفع يتعدل ولا مينفعش؟

ايه التعديلات اللى انت شايف او شاكك انها متنفعش للموتور اللى البلوك بتاعة الومنيوم؟؟

و سؤال كمان محدش عرف يجاوب عليه إجابه قاطعه : إيه الى ممكن تعدله فى موتور عربيتك من غير ميخرج العربيه بره الضمان؟؟؟

اى تعديل على التصميم الاصلى للعربية حيخرجك برة الضمان

MMamdouh

[sameh127]

التيربو و سوبر تشارجر و العفشة الرياضية يخرجك من الضمان

[kasten]

مشكوووووور والله يعطيك الف عافيه

[محمد فريد]

والفلتر الاسبور المخروطى يخرج من الضمان
واى حاجة كده ظاهرة انها متغيره
متهيألى البوجيهات مش هتبان - السلوك هى اللى هتبان
وشوفوا انت ايه كمان وقولولى

[sameh127]

الفلتر لأ مابيتكلمش فيه
الوكيل بيبص علي التقايل اللى يقدر يتكلم و يقولك انا مااضمنلكش العربية بالشكل ده علشان دي مش طالعة من المصنع كده و غيرت كيان العربية و انا بضمن قطعتي فقط
زي ما تركب جيربوكس بدل الأصل او تغير المكنة او تركب تيربو او تركب مساعدين تانية بره او تغير اسلوب توجيه العربية او تركب كرتة تحكم رياضية للمحرك فكل قراياتها حتختلف عن القراءات الموجودة عنده على السكانر لما يوصله بالكرتة.

[محمد فريد]

كل شئ جايز

[hosar]

متابع بأهتمام

[H_A_T_Em]

كل واحد و دماغه طبعا يا باشا يعني في ناس ملهاش في التعديل خالص و ممكن تشوف انه مفيش داعي للتعديل و تحب قوي تركب العربيه ستوك وتقولك انا ملعبش فيها و في ناس تانيه طبعا زي حالتنا التعديل ده بيعني ليهم كتير و و انه بيستاه كل اللي بيدفع فيه بس في المعقول و التعديل دايما بيكون للاحسن طبعا يعني مثال بسيط جدا فلتر الهواء السبور ده احسن من الستوك بكتير و مش بيحتاج يتغير و بيريح الموتور و يخسن السحب ده غير ان هبيديك صوت رياضي جميل

[الغزالى]

التيربو و سوبر تشارجر و العفشة الرياضية يخرجك من الضمان

معلش ياباشا طلب برة الموضوع
هوا حضرتك فعلا معاك
كوردوباوفيها مكنة ال vr6
وهل انت مركبها ولا هيا ستوك كدة من المصنع
وكمان النوبيرا السوبرتشارجر لو صور ليها هيا والكرودوبا
يبئى كدة كتر خير حضرتك اوى

[د.محمود صلاح]

بعدما الضمان يخلص ,, عدل براحتك

[sameh127]

انا ما بحبش افتح الكبود واوري اسرار العربية لحد ده بالإضافة الى ان الصور بتودي الواحد فى داهية فى كل حتة حتى فى وسط البلد.ومع العلم ان حلاوتها لما تيجي تشد مع عربية ما تعرفهاش تفتكرها عادية و تفاجأ بها بتتسارع زى طلقة الرصاص و تختفي من الطريق وتختفي من نظرك مهما حاولت تجرى وراها حتي لو دوست بدال البنزين على الأخر
وعلى فكرة الكوردوبا سوداء موديل 1997 كانت 1400 سي سي والموتور تعب من الحرق عليه فرحت بورسعيد و سألت على مكنة 1800تيربو لجولف مالقيتش و رحت للحرفيين و لقيت مكنة 2000سي سي 2E ومكنة 2800سي سيVR6 وقالوا مكنة 2000,2800cc لازم معاهم عفشاتهم (للجولف فقط)وبعد الحوارات اللى انت فاهمها ركبت المكنة الستة سلندر شاملة عفشة الجولف كاملة و جير الجولف بالكامل حتي الباور و التبريد و الفرامل و كله واستغرق 17 يوم على ما يكمل التعديل بالكامل حتي التابلوه بتاع الجولف GTI ركبته علشان السرعة القصوي للعربية كانت بتصل 280كم/س و التابلوه الأصلي للكوردوبا كان نهايته 220كم/س و كان حيجيلى احباط من التعديل لأن كان في حاجات ناقصة و مش موجودة فى السوق و استنيت على ما لقيتها والصنايعية يومهم بسنة ولازم الواحد يبقى واقف على ايدهم علشان يخلصوا الشغل كله.
وفى صنايعية بيقولوا حط شغل الفابريكة وخليها على اصلها ،ده بالإضافة الى ان قطع غيار الإبيزا و الكوردوبا قليلة جدا و شبه نادرة ومكانش قدامي غير الجولف هو اللى موجود استعمال و جديد،فأصريت على التعديل بالكامل، فكانت فترة توتر عصبى و مالى و مجهود فكري و خوف من فشل التعديل ويبقى فلوس و اترمت على الأرض.
اما بخصوص النوبيرا فهي مميزة نوعا ما لأن كاوتشها مقاس 255/40-17
فمحدش مركبه فلو شفتها حتعرفها وهي واقفة ولو شديت معاها حتعرف ان ده مش موتورها ابدا.