معدل إستهلاك البنزين لكل أنواع السيارات

[reamoz]

السلام عليكم ورحمة الله

في أوقات كتير الناس مش متبقى عارفة العربية بتاعتها المفروض إنها تعمل كام كيلو لكل لتر بنزين وخصوصا اللي بيكون شاري العربية مستعملة مش بيكون عارف هو هو الأداء المزبوط بتاعها

علشان كدة فكرت إن الموضوع ده ممكن يكون مفيد لبعض الناس بحيث إن كل واحد يذكر نوع عربيتة وموتورها كام سي سي وغنجكشن ولا كربراتير وبتعمل معاه كام كيلو في اللتر أو الصفيحة في السفر وفي داخل البلد مع ذكر متوسط السرعة في حالة السفر
وبكدة ممكن الناس تعرف التوسط اللي المفروض تعملة العربية عن طريق المقارنة بنفس النوع مع كذا شخص

و طريقة الحساب سهلة عن طريق ملئ التانك على الأخر لحد متشوف البنزين بعينك ثم تصفير عداد الرحلات أو كتابة كيلومتر العربية وبعد كدة لما تيجي تمون تاني قبل ماتمون خد قراءة عدادا الرحلات لو كنت صفرتة أو إطرح القم اللي إنت كنت كاتبة المرة اللي فاتت من الرقم الحالي هتعرف إنت مشيت كام كيلو من ساعت مامونت المرة اللي فاتت وبعدين إملى التانك على الأخر تاني زي المرة اللي فاتت وشوف أنت حطيط كام لتر هتقسم عدد الكيلو متر اللي إنت مشيتة على عدد الليترات اللي إنت حطيتها هيطلع رقم عبارة من عدد الكيلومترات المقطوعة من غستهلاك اللتر الواحد لو عايز تعرف الصفيحة بتعمل كام هتضرب الرقم ده في 20 ليتر

مثال: انا فولت وبعدين مشيت بالعربية 180 كيلو وبعدين روحت فولت تاني حطيت 14.5 ليتر
يبقى نقسم 180/14.5 = 12.41 تقريبا يعني الليتر عمل حوالي 12 كيلو ونص
يبقى الصفيحة 12.41*20 = 248.2 تقريبا يعني كدة العربية عملت حوالي 248 كيلومتر في الصفيحة


انا هبتدي بنفسي

عربيتي فورد فيستا 1100سي سي موديل 1997 كربراتير

بتعمل في السفر من 320 إلى 350 كيلو في الصفيحة على متوسط سرعة من 100 إلى 130

وفي البلد من 200 إلى 250 كيلو في الصفيحة حسب الزحمة

[future_aya]

ملف على الاكسيل لحساب معدل استهلاك الوقود
مسلسل العداد السابق عداد عند التموين المسافة المقطوعه كمية البنزين المعدل
1 0 100 100 9 11.1
2 100 250 150 13 11.5
3 250 350 100 9.5 10.5
4 350 -350 #DIV/0!
5 0 #DIV/0!
6 0 #DIV/0!
7 0 #DIV/0!
8 0 #DIV/0!
9 0 #DIV/0!
10 0 #DIV/0!


شرح الملف

المسلسل تكتبة بيدك 1 ثم 2 ثم 3 وهكذا

العداد السابق عداد الكيلومترات عندما تقرر حساب المعدل وتسجلة عند تفويلك للسيارة وسجل العدادفقط مكان الـرقم Zero

عدلد عند التموين عند التفويل يسجل العداد وليكن مثلا 100 كم كما فى المثال

المسافة المقطوعه عليك ان تعمل معادلة المسافة المقطوعه = عداد التموين - العداد السابق

كمية البنزين يسجل فيها كمية البزين باللتر

المعدل عليك ان تعمل معادلة المعدل = المسافة المقطوعه مقسومة على كمية البنزين

ملحوظة فى الخلية تحت المسافة المقطوعه وكذلك الخلية تحت المعدل اسحب بالموس لكى تجعل المعادلة تعمل فى العمودين

ستحصل على 10 نتائج بعد 10 مرات تفويل مع ظروف قيادة مختلفة بالمدينة وخارجها اجمع النتائج العشرة واقسمها على 10

بهذا تحصل على المعدل الطبيعى لسيارتك على ضوء الحالة التى عليها وطرقت قيادتك وظروف الطريق

[future_aya]

ناسف لم يظهر ملف الاكسيل كما ينبغى تقبلوا اعتزارى

[reamoz]

ناسف لم يظهر ملف الاكسيل كما ينبغى تقبلوا اعتزارى

شكراً على الإهتمام والإضافة

انا عملت حاجة زي اللي تقصدها كدة في المرفقات ممكن تشوفها وتقولي إذا كانت هي دي فكرتك ولا لأ

بس انا كان قصدي على معدل الإستهلاك (مش المتوسط) في ظروف محددة علشان الناس تقدر تقارن لأن مش كل واحد مشاويرة زي التاني يعني في واحد مثلاً طريقه اليومي للشغل يعتبر طريق سفر وواحد تاني طريقة في شارع زحمة بيقف خطوة ويمشي خطوة لو حسبنا متوسط معدل الإستهلاك هنلاقي فرق كبير بين العربيتين حتى لو كانو نفس النوع وبيعملو نفس معدل الإستهلاك

بس دي بردو فكرة كويسة فعلا في حساب متوسط معدل إستهلاك الوقود بالنسبة للفرد على حسب طبيعة مشاوريه بالسيارة بعد مايتأكد إن معدل الإستهلاك عموماً مظبوط

[HRH_Sameh]

شكرا على مجهودك
والملف ممتاز
انا كنت حاسب متوسطات بس من فترة
ابقى احسب واقول الارقام

[reamoz]

العفو يا باشا
مستنين أرقامك

[future_aya]

عزيزى reamoz
لم اتمكن من فتح المرفق بعد فكة ولكن اود ان اقول
1- نقوم بتفويل السيارة اول مرة وناخذ فقط رقم العداد (الاول )
وليكن مثلا 56500 كيلو متر
2-نسير كما يتاح لنا بالسيارة فى ظروف التشغيل الطبيعية التى نمر بها يوميا ونقوم بتفويل السيارة وناخذ رقم العداد (الثانى )
وليكن مثلا 56720 كيلو متر
ونعرف كمية الوقود التى اخذنها هذة المرة الاخيرة
ولتكن 20 لترا

رقم العداد الثانى - رقم العداد الاول
3- المعدل = ــــــــــــــــــــــــــــــــــــــــــــــــــ ــــــــــــــــــــ =.. كم/لتر

كمية الوقود
56720 - 56500 220
المعدل = ــــــــــــــــــــــــــــــــــــــــــــ = ـــــــــــــــــ = 11 كم/لتر
20 20

4 - لو وضعنا هذة البيانات فى ملف اكسل لامكننا فى اى وقت
حساب متوسط معدل استهلاك الوقود للسيارة
وشكرا

[exact]

أنا سوزوكي سويفت 94 1300 سي سي ياباني
300 كم /20 لتر داخل وخارج المدينة

[reamoz]

أنا سوزوكي سويفت 94 1300 سي سي ياباني
300 كم /20 لتر داخل وخارج المدينة

أول إستفتاح اهوه

بس ياباشا اكيد انت قصدك انها بتعمل 300كم /20لتر في مشاوير متنوعة يعني داخل المدينة شوية وخارجها شوية. صح؟
علشان لازم يكون في فرق في حالة ان الشي كلة داخل المدينة عن مايكون كلة خارج المدينة (طريق سفر يعني)

[future_aya]

أذا المعلومة التى ارسلت
بخصوص السوزوكى سويفت الــ 1300 سى سى

هو انه 300 كم / 20 لتر
اى 15 كم/ لتر تقريبا

بخصوص لادا 2107 انجشن 1500 سى سى
215 كم / 20 لتر
اى 10.75 كم / اللتر تقريبا

ملحوظه 1- اجريت تجربة على 10 سيارات من نفس النوع والموديل لنفس الطريق وظروف التشغيل ولم نحصل على نفس المعدل بالضبط
2-لاحقا وفى الوقت المناسب سوف نسرد بعض النقاط تخص قائد السيارة
(( اى طريقة القيادة على الطريق )) لتحسين معدل استهلاك الوقود وشكرا

[exact]

أول إستفتاح اهوه :ta_clap[1]:

بس ياباشا اكيد انت قصدك انها بتعمل 300كم /20لتر في مشاوير متنوعة يعني داخل المدينة شوية وخارجها شوية. صح؟
علشان لازم يكون في فرق في حالة ان المشي كلة داخل المدينة عن مايكون كلة خارج المدينة (طريق سفر يعني)

هو كده بالظبط

أذا المعلومة التى ارسلت
بخصوص السوزوكى سويفت الــ 1300 سى سى

هو انه 300 كم / 20 لتر
اى 15 كم/ لتر تقريبا

بخصوص لادا 2107 انجشن 1500 سى سى
215 كم / 20 لتر
اى 10.75 كم / اللتر تقريبا

ملحوظه 1- اجريت تجربة على 10 سيارات من نفس النوع والموديل لنفس الطريق وظروف التشغيل ولم نحصل على نفس المعدل بالضبط
2-لاحقا وفى الوقت المناسب سوف نسرد بعض النقاط تخص قائد السيارة
(( اى طريقة القيادة على الطريق )) لتحسين معدل استهلاك الوقود وشكرا

مش فاهم قصدك بخصوص رقم 1 بس أنا متأكد من كده لأني مراقب الموضوع ده وعامل ملف اكسيل عندي فيه آخر 6 شهور بس فيه تفاصيل اكتــــر شويتين والرقم المتوسط بالظبط 299 كم للصفيحة لأنه زاد في بعض الاوقات وقل في اوقات تانية عن كده...
وبخصوص رقم 2 انا عارف حكاية الاساليب دي وبامشي بيها ومن ضمنها انك تنقل الفتيس بدري ومتقرصش عالغيار ولا باكبس جامد مرة واحدة يعني انا مثلا مقسمها على عداد السرعة كده في دماغي على العشرينات... بانقل للتالت على 40, والرابع على 60, والخامس من اول 80, ودي صدقني بتفرق كتير جدا في استهلاك البنزين مع اني غالبا باستعمل بنزين 80 منذ حوالي 5 شهور...بالاضافة لكون الكاوتش لاااااااااازم يبقى مظبوط على 30 بالنسبة لي.. لأني مهتم جدا بموضوع البنزين ده بالإضافة لاني باستعمل زيت مخلق كليا (Fully Synthetic)اللي هو 10000 كيلو زي موبيل وان وناوي اجرب هيليكس ألترا المرة الجاية

[reamoz]

من أساليب تحسين معدل الإستهلاك زي ماقلت ياباشا فعلا عدم الحرق على الغيار وظبط ضغط الهواء داخل الكاوتش لتقليل معامل الإحتكاك بالطريق
وفي حاجات تانية كتير منها:

- عدم زيادة السرعة في السفر عن 100-110 لأن بعد السرعة دي بتكون مقاومة الهواء عالية وبالتالي علشان نزود السرعة أكتر من كدة بنحتاج عزم أكبر من الموتور مما يتطلب حرق كمية بنزين أكتر
- إغلاق النوافذ عند السير على سرعات عالية - علشان نخلي جسم السيارة الإنسيابي يعدي الهواء من حولة لكن لو النوافذ مفتوحة بيدخل الهواء داخل السيارة ويعمل تيار يزيد من مقاومة الهواء وممكن نشغل مروحة التهوية الداخلية أو حتى التكييف هيكون حملة على الموتور أقل من مقاومة الهواء
- عند السير في طرق سريعة تموير السيارة قبل تهدئة السرعة أو التوقف بمسافة كبيرة - علشان نستفيد من قوة القصور الذاتي للسيارة يعني قبل الكارتة أو الكمين بحوالي 500 متر كدة ولا حاجة ممكن نمور العربية ونسيبها ماشية من غير منستهلك بنزين في المسافة دي وفي نفس الوقت لما نوصل للمكان اللي هنقف فيه بتكون سرعة السيارة قلت كتير ده كمان بيوفر في إستهلاك الفرامل والأسلوب دة بردة ممكن نستخدمة لو إحنا بنسيب مسافة كويسة بيننا وبين اللي قدامنا لما نلاقي اللي قدامنا بيهدي
- عند التسارع الضغط على دواسة البنزين يكون سنة سنة - علشان الضغط علي الدواسة لأخرها مرة واحدة مش هيزود في التسارع فجأة والنتيجة هتكون إن البنزين الزيادة مش هيتحرق كويس وهيتم إهدارة
- في المطالع لما نلاقي سرعة العربية بتقل منزودش بنزين - لأن في المطلع بيكون التسارع صعب جدا وبيستهلك بنزين كتير ممكن لو عايزين نحافظ على سرعتنا نزود شوية قبل المطلع ونثبت رجلنا على دواسة البنزين وبمجرد إنتهاء المطلع هنلاقي السرعة بتزيد تاني منغير ماندو بنزين اكتر

في حاجات تانية بس مش أي حد ممكن يعملها علشان بتكون ضد مبدأ السلامة بس ممكن نقولها من باب العلم بالشئ

- في المنازل نستفيد من المطريق المنحدر بإننا نزود السرعة عن المعدل بتاعنا في أول المنزل وبعد كدة نمور السيارة هنلاقي إن السرعة بتقل بعدل قليل جداً حسب شدة المنحدر في حين إننا ماشيين منغير إستهلاك للبنزين يذكر - بس زي ماقلت إن الموضوع ده خطر علشان لما تكون السيارة معشقة على غيار في حالة أي طارئ يستدعي التهدئة المفاجئة بمجرد رفع الرجل من على البنزين الموتور بيعمل تهدئة للسيارة فيما يسمى بالـ Engine Break وكمان بيكون الأر بي إم عالي فابيدي قوة ضغط هواء أكبر لسيرفو الفرامل فاياريت اللي يعمل الموضوع ده يكون مركز كويس في الطريق ورجلة جاهزة للفرملة في أي وقت
- في كمان حاجة أخطر من كدة (السير خلف السيارات الكبيرة على مسافة قريبة) ده طبعا بيخلي مقاومة الهواء شبه معدومة لأن السيارة اللي قدام بتشق الهواء - بس طبعا لما أكون لازززق في العربية اللي قدامي وحجمها أكبر من حجم عربيتي يعني أنا مش شايف الطريق نهائياً وأي حاجة تخلي اللي قدامي يفرمل انا مش هاكون شايفها ومش هكون عامل حسابي فطبعا النتيجة هتكون معروفة "نوفر شوية بنزين ونضيع العربية واللي راكبينها" (ربنا يستر علينا جميعاً) دة طبعا غير خطر إن حاجة تقع عليك من العربية اللي أنت لازق فيها دي (ياسيدي لو محملة زلط)

[HRH_Sameh]

أحييك ع المداخلة الاخيرة
وبالنسبة لمتوسط الاستهلاك في الشاهين 1400 2004 حوالي 225 كم / الصفيحة

[exact]

تمااااااااااااااااااااااام جدا وكلام زي الفل
بس أنا مش فاهم الحتة دي لو ممكن توضيح

- بس زي ماقلت إن الموضوع ده خطر علشان لما تكون السيارة معشقة على غيار في حالة أي طارئ يستدعي التهدئة المفاجئة بمجرد رفع الرجل من على البنزين الموتور بيعمل تهدئة للسيارة فيما يسمى بالـ engine break وكمان بيكون الأر بي إم عالي فابيدي قوة ضغط هواء أكبر لسيرفو الفرامل فاياريت اللي يعمل الموضوع ده يكون مركز كويس في الطريق ورجلة جاهزة للفرملة في أي وقت

[reamoz]

ياباشا في خرطوم رفيع كدة بيكون خارج من عند المانيفولد بتاع الدخول مش بتاع العادم بيكون رايح لسيرفو الفرامل بيديله هواء فكل ماتكون سرعة الموتور أعلي بالتالي ضغط الهواء اللي بيروح للسيرفو بيكون اعلي
لو عايز تحس بالموضوع دة جرب وانت ماشي على سرعة عالية نسبياً دوس دبرياج ودوس سنة فرامل بسيطة وثبت رجلك على الدواسة وبعدين سيب الدبرياج طبعا االعربية هتهدي أكتر علشان الإنجين-بريك بس إنت هتحس بدواسة الفرامل زي ماتكون بتعلى وتجمد تحت رجلك