التدوير على البارد

[ahmedyehia515]

صباح الخير على احسن منتدى،

المشكلة بكل بساطة انى لما أجى ادور العربية و هى باردة و قصدى بباردة انو الدنيا فعلاً تلج زى الكام اليوم اللى فانوه، بلاقى الار بى ام واطى اوى و بحس العربية مش قادرة تدور لازم أزود بنزين سنة يقوم الأر بى ام يعلى و أسمع انفجار فى الشكمان مره واحدة و بعد كده كله التسخين عادى، كمان لما امشى بيها بعد التسخين ( بسخنها 5 دقايق على الواقف و بعدين بمشى هادى بتاع 15 دقائق كده) أثناء ال15 دقيقة دول العربية بحسها مخنوقة و لما أزود الار بى أم لحد 3.5 مثلاً مره واحدة بحسها اتفتحت و المجارى اتسلكت و بقت عادى. العربيى على الإر بى ام القليل (أقل من 2.75) بتبقى مش بتأدى كويس و ساعات كتير بلاقيها بتترج جامد ( مش بتسقف لأ بتترج و بتنتش كده) و بسمع صوت شوشرة فى الكاسيت سواء مشغل راديو او سى دى يا ريت حد يقولى عشان العربية ده غاليه عليا


العربية فابيا 2001 1400 سى سى هاتشباك مانيوال عامله 298000 كم و كل التغييير اللى عامله فيها انى مركب فلتر هوا سبور.

و شكراً

[Bonanza]

متابع معاك

انا بردو عندي نفس المشكلة في عربيتي التمبرا

[ahmedyehia515]

الموضوع شكله كبيييير بس شكلنا حنستنى كتيييير

[A.Saad]

انا مش بفهم ميكانيكا كتير علشان احدد المشكلة اللى عندك
بس اللى قريته من المنتدى ان غلط تمشى على البارد وتعلى الRPM

فيه ناس قالت متمشيش على البارد وفيه ناس قالت
امشى بس ما تزودش عن 2000 لفة

http://www.nilemotors.net/Nile/119831-a.html

http://www.nilemotors.net/Nile/113803-a.html

[ahmedsamir79]

متابع بأهتمام

[ahmedyehia515]

انا مش بفهم ميكانيكا كتير علشان احدد المشكلة اللى عندك
بس اللى قريته من المنتدى ان غلط تمشى على البارد وتعلى الrpm

فيه ناس قالت متمشيش على البارد وفيه ناس قالت
امشى بس ما تزودش عن 2000 لفة

http://www.nilemotors.net/nile/119831-a.html

http://www.nilemotors.net/nile/113803-a.html

يا باشمهندس أنا بتكلم على لحظة تدوير العربية ، العربية بتكون مش رادية تدور زى وا تكون مسدودة، لازم أديها بنزين عشان تقوم و بعد كده بتتظبط، بغض النظر عن حمشى بيها على طوول أو حسخنها على الواقف.

موضوع التسخين ، الطريقة اللى أغلب الناس اتفقوا عليها هى التسخين 3 دقائق على الواقف ثم المشى الهادى على ار بى ام أقل ما يمكن من غير ما تحمل على الموتور لحد ما عداد الحرارة يوصل للنص و بعدين تمام.
المشكلة انو اثناء المشى الهادى ده و حتى بعده العربية بتبقه سحبها مش طبيعى زى ما يكون فى بوجيه فاصل بس لو زودت الار بى ام بتحس ان فى لحظة كده البوجيه لقط و العربية نطت لقدام و اثناء و العربية متلتة بتسمع غلوشة فى السماعات

[caysersosaih]

ده بيبقي في رواسب كربونية في الكاربيراتير وهي اللي بتعمل الخنقة الصبح
لو نضفت الكاربيراتير الموضوع بيختفي اسبوعين ويرجع تاني
انا باشغل السخان واشده بالراحة قبل ماادور واسيبها دقيقتين وامشي
الموضوع ده غير موجود في الانجكشن

[thedeveloper87]

أخبار البوجيهات ايه؟

[ahmedyehia515]

أخبار البوجيهات ايه؟

البوجيهات بقالها حوالى 500 كم، ماركتها بوش 4 شمعة بس اللى لاحظته و انا بغيرهو انهم مهببين شوية بس مش معرقين زيت.

انا سمعت من عضو انو البوجيه بيتنضف تلقائى فى العربيات الانجكشن على الار بى ام العالى زى ما فى العربيات القديمة كانوا بيحرقوه، يعنى اثناء احتراق البنزين بيتحرق البوجيه و بينضف, تعتقد ممكن يكون ده السبب انو بعد فترة السحب بيكون احسن و التنتيش بيروح

[thedeveloper87]

البوجيهات بقالها حوالى 500 كم، ماركتها بوش 4 شمعة بس اللى لاحظته و انا بغيرهو انهم مهببين شوية بس مش معرقين زيت.

انا سمعت من عضو انو البوجيه بيتنضف تلقائى فى العربيات الانجكشن على الار بى ام العالى زى ما فى العربيات القديمة كانوا بيحرقوه، يعنى اثناء احتراق البنزين بيتحرق البوجيه و بينضف, تعتقد ممكن يكون ده السبب انو بعد فترة السحب بيكون احسن و التنتيش بيروح

انت متأكد إنها مش مضروبة؟ أصل المضروب مالي السوق اليومين دول.

أنا اشتريت بوجيهات ngk من شهرين وعامل بيها 3000 كيلو بس البوجيهات بييجي عليها رطوبة بسهولة. يعني لو سبتها يومين في الظل هتدور بالعااااافية معايا.

[mrsailor]

انت متأكد إنها مش مضروبة؟ أصل المضروب مالي السوق اليومين دول.

أنا اشتريت بوجيهات ngk من شهرين وعامل بيها 3000 كيلو بس البوجيهات بييجي عليها رطوبة بسهولة. يعني لو سبتها يومين في الظل هتدور بالعااااافية معايا.

مساء الخير عليكم .. دى بسيطة ان شاء الله .. انت قولت ان فى غلوشة فى السماعات مع العيب اللى بتقول عليه .. و ده معناه ان سلك البوجيهات مش كويس .. غير سلك البوجيهات و ادعى لى .. و لو عاوز تتأكد ممكن تجرب الموضوع ده من اى عربية تانية .. ولو العيب اختفى تبقى اتأكدت .. المهم غير سلك البوجيهات .. و ياريت تقولنا النتيجة

[ahmedyehia515]

مساء الخير عليكم .. دى بسيطة ان شاء الله .. انت قولت ان فى غلوشة فى السماعات مع العيب اللى بتقول عليه .. و ده معناه ان سلك البوجيهات مش كويس .. غير سلك البوجيهات و ادعى لى .. و لو عاوز تتأكد ممكن تجرب الموضوع ده من اى عربية تانية .. ولو العيب اختفى تبقى اتأكدت .. المهم غير سلك البوجيهات .. و ياريت تقولنا النتيجة

هى المشكلة عندى ان مفيش سلك بين البوجيهات و الموبينه، يعنى الموبينه راكبه على البوجيهات على طول. السلك الوحيد فى موضوع البوجيهات هو اللى خارج من الموبينه و بصراحة معرفش رايح فين. يبقى العيب فى السلك ده ولا فى الموبينه ذات نفسها ؟؟

شكراً على مجهودك

[ahmedyehia515]

انت متأكد إنها مش مضروبة؟ أصل المضروب مالي السوق اليومين دول.

أنا اشتريت بوجيهات ngk من شهرين وعامل بيها 3000 كيلو بس البوجيهات بييجي عليها رطوبة بسهولة. يعني لو سبتها يومين في الظل هتدور بالعااااافية معايا.

و الله فى الزمن ده مبقتش متأكد من ولا حاجة خالص. أنا جبتهم من شارع دمشق من نفس المحل اللى بجيب منه حاجة السكودا كلها بس لما بقوله قدينى بوجيهات فابيا بيدينى ngk بس المره ده قلتله عايز بوش 4 شمعة جبته ب90 جنيه. ممكن يكون المشكلة فى البوجيه و المشكله ده بتروح بعد التسخين ؟؟؟

[mrsailor]

هى المشكلة عندى ان مفيش سلك بين البوجيهات و الموبينه، يعنى الموبينه راكبه على البوجيهات على طول. السلك الوحيد فى موضوع البوجيهات هو اللى خارج من الموبينه و بصراحة معرفش رايح فين. يبقى العيب فى السلك ده ولا فى الموبينه ذات نفسها ؟؟

شكراً على مجهودك

هو السلك ده اللى قصدى عليه ,, لو زى ما انا فاهم السلك ده واصل بين البوبينات و بعضها .. بس ممكن اسألك انت عندك 2 بوبينة وللا 4 بوبينة .. مستنى الرد

[ahmedyehia515]

هو السلك ده اللى قصدى عليه ,, لو زى ما انا فاهم السلك ده واصل بين البوبينات و بعضها .. بس ممكن اسألك انت عندك 2 بوبينة وللا 4 بوبينة .. مستنى الرد

انت كده بقيت تسأل أسئلة فوق قدرتى على الأجابة. هوا مش سلوك البوجيهات، زى السلوك السبليت فاير، بتبقى بين الموبينه و البوجيه ؟؟؟

انا عندى الموبينه كتلة واحدة راكبة على الأربه بوجيهات و طالع منها 4 سلوك ملفوفين مع بعض فى خرطوم بلاستيك ، انا هحاول أرفه الصورة عشان انا شكلى فاهم غلط .