يا أهل الخبرة أفيدوني أفادكم الله

[inspiron]

أنا مش عارف العربية مالها..أنا هحكيلكم و قولولي رأيكم..
أولا..أنا أخر مرة غيرت فيها بوجيهات وفلاتر و سيور من 24000 كيلو.
العربية كانت بتسحب وتمام.حاليا في السحب أصبحت بطيئة..بتوصل حتي 190.ولكن في زمن طويل.خصوصا تسارعها قبل الـ 100 مبقاش حلو..هل ده بسبب 24000 كيلو من غير تغيير السابق ذكره.
الحاجة التانية..إيه هي العلامات اللي تثبت بدون شك إن الموتور بقي خفيف..علما بإن الشكمان بيعرق مية.وده علي حد علمي بيدل علي جودة حالة الموتور.ولا أنا غلطان..

الحاجة التالتة..إيه اللي أعمله ضروري عشان صوت الموتور يوطي شوية.علما بإن معنديش ظبط تاكيهات وكده..إيه البديل.

الحاجة الرابعة.أنا كنت بحط زيت 10000 كيلو.والمرة الأخيرة حطيت الـ 5000..أمشي علي كده ولا أرجع لـ 10000 تاني.وأستعمل نوع إيه.

الحاجة الخامسة.كارتيرة الزيت تحت العربية بتسرب نتيجة إن فيها شرخ بسيط جدا..هل ممكن ألحمه باللاصق الحديد اللي هو المعجون ده.ولا لازم أغيرها.

الحاجة السادسة..هل لو إستعملت مع غيار الزيت القادم flash oil.اللي هو بيغسل الموتور من جوا..هيفرق معايا؟ يعني صوت الموتور هيهدي و ينعم و الموتور يبقي فايق.ولا ده دحك الدقون زي ما بيقولوا.

دول يا جماعة 6 حاجات محتاج منكم إجابة شافية.عشان نفسيتي ترتاح.وأي نصايح متبخلوش عليا.

الخلاصة أنا عاوز العربية فايقة.هادية في صوتها وناعمة.سحبها وإستجابتها حلوه.أعمل إيه.مستني الردود بفارغ الصبر.العربية أوكتافيا a4 موديل 98 عاملة 123000 كيلو.وشكرا مقدما.

[inspiron]

يعني أسأل مين طيب..أنا داخل و متوقع إني ألاقي مش أقل من 20 رد مثلا.أدخل ملاقيش ولا رد.واللي يزعل إن باقي المواضيع مردود عليها إلا ده

[Ahmed Galal]

انا هاحاول اقولك اللى اعرفه
انت كده محتاج صيانة و تغيير لكل الفلاتر عشان العربية تفوق اما السيور فمش عارف مواعيدها فى السكودا ايه بس اكيد انت قربت
بالنسبة للزيت من 10 ل 5 و الرجوع تانى مش هايبقا فيه مشاكل ان شاء الله و فيه ناس بتعمل كده لما تكون مزنوقة
بالنسبة للكرتيرة غيرها احسن
توطية صوت الموتور هايكون بقا من فلتر الهوا او حد يظبط الموتور بالكمبيوتر و يراجع عليه
السحب التقيل ده عوارضه كتير من اول بلى العجل و ضغط الكوتش و حالته لحد بقا الحساسات و البوجيهات و حالة الانجكشين و مش عايز افتى فيه عشان ما اعكش و طبعا زى ما قلتلك الصيانة الاول
و بالنسبة لعلامات تردى حالة الموتور فتبان من العادم و ديه اول خطوة و انت بتقول العادم كويس فان شاء الله المكنة سليمة
و موضوع السائل اللى بيتحط ده ما جربتوش بس انت شيك على المكنة الاول بالكمبيوتر و التظبيط بتاعها و بعد كده تقدر تحدد المشكلة منين بس انت ما قلتش العربية عاملة كام كيلو

[inspiron]

ربنا يكرمك وجزاك الله كل خير

[AHMADALY1999]

بتهيالى الاستاذ احمد جلال جاوب على كله
انا حاقولك تجربتى مع ال flush
الى اعرفه انه بينضف تكلات الزيت المتشحمة sludge نتيجة لتكسر مكونات الزيت بس الكلام ده بيحصل اكتر مع الزيوت الطبيعية ( زى ال 5000 الى انت حطيته اخر مرة ) و بالتالى ممكن يتقل البلوف شوية فياثر فى السحب
فطبعا مع الغيار القادم اعمل flush و ارجع استخدم زيت مخلق زى شل الترا هيلكس لانه صعب يكون sludge

[inspiron]

تمام.بإذن الله هعملها مع تغييرة الزيت القادمة..طيب هل برده أغير فلتر الزيت ولا لا.لأنه بالشكل ده هيكون عامل 4000 كيلو بس وهو مكتوب عليه 30000 كيلو

[AHMADALY1999]

للاسف احتمال تحتاج تغيره لان ال flush حتشتريه ( طبعا لازم منتج امريكى ) و حتحطه و انت عند مركز او ورشة تغيير الزيت بيتزود عادى على الزيت الاصلى و تدور لمدة 3 دقايق سلانسيه اوعى تزود بنزين اثناء دوران الماتور المادة دى حتنضف ( حتسيح ) التكتلات sludge و طبعا حتمشى فى دورة الزيت و حتتحاش فى الفلتر ( علشان كده حتغيره )
وبعد انتهاء ال 3 دقايق حتبطل و تنزل الزيت و تحط الجديد ( يفضل مخلق ) و ان شاء الله تحس بفرق و طبعا تعمل الحاجات الى قالها الاستاذ احمد جلال
( لو محستش بفرق متزعلش منى )

[inspiron]

ألف شكر يا باشا وأزعل منك ليه بس.ربنا ما يجيب زعل