حكايتى مع جوان وش السلندر بيجو 405 2000 cc

[ramyabdelgawad]

فى البداية لقيت العربية بتسخن روحت للراجل بتاع الردياتير قولت انظف دورة المياة والردياتير يمكن يكون اتسد بعد كدة
المهم بعد لما نظفتة الراجل جربة ولقيت الحرارة بقت بتنزل عادى بعد كدة اول مامشيت من عندة رجع نفس الموضوع تانى الى هو الحرارة بتعلى ومابتنزلش حتى اثناء تشغيل المراوح بس انا قريت فى المنتدى ان ممكن اخد هوا من العربية عملت كدة وبرضة رجعت تانى المهم ابص فى الردياتير الاقى فوران المياة: عرفت انة جوان وش السلندر المهم بقة
واحد ودانى عند ميكانيكى الله لا يسامح الميكانيكى الاول حل وش السلندر ونظفة و وداة للخراط فالخراط قال مش عايز يتقشط قولت الحمد لله جبت جوان الوش الاصلى كان سعرة 40 جنية و جوان غطاء التاكيهات الاصلى سعرة 80 جنية وعلبة كلة امريكى وقاعدة موتور كمثرى 60 جنية وانبوبة سيلكون كانت عندى و اديتلو الحاجة علشان يشتغل وقلى بكرة تيجى تخودها دايرة المهم روحت تانى يوم وكلى امل لقيتة مدور العريبىة اول حاجة بصيت على الحرارة لقيت العداد فى الارض اي دة ياريس بص شوية كدة وطبعا مش فاهم اى حاجة قام قالى العدااد بايظ
نعم واية الى بوظة
الرد الطبيعى منة هو كان بايظ
انا جاى بية شغال
روح للكهربائى يبص علية
روحت للكهربائى جرب كل حاجة وقالى حساس الحرارة باظ
المهم وانا عندة و فاتح الكبوت لقيت تاخرطوم الى جاى من التانك وداخل على المانفو بينزل بنزين على البوجيهات
بقيت هتجنن بعنى هو شاف كدة وسابنى امشى دة ممكن العربية تولع بية روحتلة قالى انت جاى بية كدة روح للخراط وقولة يعملك لاكور غير دة المهم انا كنت فاكر ان دة الطبيعى بتاع العربية
المهم الخراط عملة ورحت للكهربائى لقيتة بيجيب بنزين اكتر من الاول بكتير
الكهربائى وصفلى واد ميكانيكى بتاع بيجو كان شغال فى التوكيل اسمة ايهاب فى مساكن الحرمين الى فى المندرة فى الاسكندرية غيرت من عندة المانفو استيراد ب 140 جنية بالتركيب وحساس الحرارة استيراد ب 60 جنية و الميكانيكى الحمار الى مافيش عندة ضمير اخد 120 جنية وكانت الساعة بقت واحد بالليل و مروح ميت المهم بجرى بالعربية علشان اجربها لقيت خبطة جامدة فى صدر العربية لما ادوس بنزين مرة واحدة وانا بجرى افتح الكبوت الاقى البية مش مركب قاعدة المتور و مربوطة على الكاوتشة على طول و حسبى الله ونعم الوكيل فى خالد الميكانيكى الى فى امام كلية الشريعة الى فى شارع المندرة هو فى ارض فاضية هى دى الورشة ربنا مايسامحة


___________________________

يرجى مراعاة الدقه فى كتابة لفظ الجلاله بشكل صحيح


مشرف القسم

[ahmed_moeaz]

ربنا يعوض عليك واسمحلى اقولك انك غلطان ده وش سلندر مش تغيير بيجوهات ولا ابلاتين!!
المفروض كنت تسأل وتدور على ميكانيكى محترم يظبتهولك بدل البهدلة اللى انت عملتها فى نفسك دى وعامة الواحد مبيتعلمش ببلاش واحمد ربنا انها جات على اد كده وربنا يعوض عليك

[M.Zaher]

حسبي الله ونعم الوكيل في الصنايعيه دول
بس انت غلطان انك سبت العربيه عنده
المفروض الواحد فعلا مايسيبش عربيته عند اي صنايعي
و الحمد لله انها جت على اد كده

[ramyabdelgawad]

ياجماعة روحت للميكانيكى تانى علشلن يشوف قاعدة الموتور
المهم انة لما فكها قالى انت جايبها مقطوعة
طبعا انا اتجننت ومش عايز اقول لكم حصل اية المهم كلمت ناس زمايلى من عندة وجبتهم واخدت منة ثمن القاعدة 60 جنية و100 جنية من ثمن المانافو ودة كان حكم الناس علية
بس كدة انا ارتاحت
بس ياجماعة الحرارة دلوقتى ما بين 78 و 85 هو دة طبيعى ولا اية
وهو ينفع المروحة تشتغل قبل ال 78 يعنى من ال 70 مثلا وتفصل مثلا عند ال 80 علشان يكون فى امان
ارجوكم طمنونى واسف على الاطالة

[samirayad]

بس ياجماعة الحرارة دلوقتى ما بين 78 و 85 هو دة طبيعى ولا اية

كده كويس ومش وحش

وهو ينفع المروحة تشتغل قبل ال 78 يعنى من ال 70 مثلا وتفصل مثلا عند ال 80 علشان يكون فى امان

لا العكس

المروحه تشتغل عند 85 مثلا وتفصل عند 78 حسب معايرة ساعة المروحه

[ramyabdelgawad]

كده كويس ومش وحش



لا العكس

المروحه تشتغل عند 85 مثلا وتفصل عند 78 حسب معايرة ساعة المروحه

هى ساعة المروحة دى ليها معايرة ولا تقصد حسب ما انا شاريها
وهى ساعة المروحة دى تقصد بيها صوباع الحرارة ولا الترموستات

[samirayad]

هى ساعة المروحة دى ليها معايرة ولا تقصد حسب ما انا شاريها

فعلا أقصد حسب مدى عملها اللى أنت شاريه بيها

يعنى ساعه بتشتغل عند 90 وتفصل عند 80

بتبقى دى معايرتها اللى أنت شاريها بيها

وهى ساعة المروحة دى تقصد بيها صوباع الحرارة ولا الترموستات

لا بلاش حتة الصباع علشان ميحصلش لخفنه

هى فعلا الثرموثتات الحرارى اللى بيركب على الردياتير

[ramyabdelgawad]

لك من جزيل الشكر على ردك

[kasten]

لا حول ولا قوة الا بالله

[dr_ahmed405]

ده ميكانيكى قفص مش اكتر من كده