فيات131

[naserhasan]

معايا عربية 131 موديل82 العربية لما اخد الغيار واجى ادوس بنزين مرة واحدة تبطل يعنى لازم كدا ادوس براحة وواحدة واحدة كدا
الميكانيكى نضف الكربرراتير وغير بكات
ولما قولتلو قال بس البكات هتاخد وتدى مع الوقت
غيرت البكات القديمة بردو نفس العيب
كنت غيرت بوجيهات من شهرين كدا وابلاتين
بصراحة انا مضايق قوى كرهت العربية لان كدا بتحرجنى وخصوصا لما اكون طالع مزلقان عالى طبعا لازم اخد الغيار الاولانى ولازم ادوس بنزين جامد كدا بتبطل ولازم ادوس بنزين بشويش
ارجو تلاقو حل الله يكرمكم

[samirayad]

الحقيقه أنت محتاج ميكانيكى تانى يعيد الكشف على الكربوراتير

ويعاود نظافته وتحديد وضع البيكات الحاليه

فقد تكون ذات فتحات وقيم غير مناسبه لسيارتك

وكلام الميكانيكى اللى عملك شغل فى الكربوراتير بيدل على أنه

مش مصدر ثقه فى الأعتماد على شغله


____________________

وياريت برضه تكون مطمن لحالة فلترى الهواء والبنزين لدورهما الحيوى فى التأثير على حمل أى محرك

[naserhasan]

بصراحة مشكو ر جدا على الرد ياباشمهندس سمير
انا فى قمة السعادة والله لسرعة الرد والتواصل
بس هوضح لحضرتك حاجة
قبل الميكانيكى مينضف الكربراتير كان فيه مشكلة ان العربية بتبطل كتير ونا ماشى وفى السلانسة
ولما نضفنا الكرابرايتر بقت تمام بس هيا المشكلة دى الللى بحكى عنها
وحضرتك ممكن توضح يعنى ايه 1-حالة فلتر الهوى فلتر البنزين لو لغيته 2-انا عندى 2فلتر فى حوض العربية

[samirayad]

وحضرتك ممكن توضح يعنى ايه 1-حالة فلتر الهوى فلتر البنزين لو لغيته 2-انا عندى 2فلتر فى حوض العربية

أنا أقصد بحالة الفلاتر أنها تكون كويسه ونظيفه أو تغيرها

ولو أنت لاغى فلتر كان موجود أساسا فى تصميم دايرة البنزين

ياريت ترجعه لوضعه الأساسى وتجرب الأول

لأن الكلام الأزرق ده شككنى فى أنك ممكن تكون لاغى فلتر من الفلترين

وده مش صح طبعا وحيأثر على شغل بيكات الكربوراتير

قبل مانفكر فى الكربوراتير

لأن ألغاءك لفلتر مش صح

وكده بتقلل كفاءة الترشيح فى دورة البنزين

وطالما كفاءة الترشيح قلت يبقى حتلاقى مشاكل شبيهه باللى بيحصل مع حضرتك حاليا

[naserhasan]

ياباش مهندس انت والله احرجتنى بزوقك الكبير وربنا يزيدك
انا ملغيتش اى فلاتر بس انا بسال لان فيه ميكانيكى قال الغى فلتر من الاتنين
فانا بسالك
فلتر الهوى عندى اللى هوا بيكون فى العمة صح كدا؟ هو قديم كدا وشكله مش عجبنى
فلتر البنزين اغيره ولا ايه
اصل انا بصراحة لسه شارى العربية دى من شهرين وبضبط فيها

[samirayad]

غير الفلاتر ياباشا وجرب عربيتك الأول

قبل ماتعمل أى حاجه تانيه

ومتسمعش كلام الميكانيكى فى ألغاء أى حاجه

لأن أن مبنش عيب الحاجه الملغيه دلوقت حيبان بعدين

[naserhasan]

بكام فلتر البنزين لو سمحت
وكام سعر فلتر الهوا

[samirayad]

أسعار الفلاتر بسيطه ومش غاليه فى الفيات

حاجات رمزيه

يعنى .........

فلتر الهواء مش حيجيب عشرون جنيها

وفلاتر البنزين ( حسب اللى راكب عندك )

أنا كنت بأركب لعربيه أوبل (فلتر بنزين شفاف ب5 ج )

[naserhasan]

يعنى يابش مهندس لما اغير الفلاتر هتتحل المشكلة إن شاء الله
وهل فيه علامات تدل على عطل فى الفلاتر حاجة ضاهرة يعنى تعرفها ليا

عشان مش عاوز اصرف كتير انا لسه شارى وعاوز الامور تمشى شويه جزاك الله خيرا

[samirayad]

فلتر الهوى عندى اللى هوا بيكون فى العمة صح كدا؟ هو قديم كدا وشكله مش عجبنى

ياناصر باشا

أنت لسه شارى العربيه وفلتر الهواء شاكله مش عاجبك

وألف باء

أنك تغير فلاتر هواء وبنزين وزيت بعد شرائك لعربيه أستعمال

أوعى تكون لسه مغيرتش زيت وفلتر زيت كمان

وخايف على القريشينات والمصاريف

أصرف ياباشا

وبحبح أيدك شويه

وفك كيسك

ومتخفش

أصرف مافى الجيب يأتيك مافى الغيب

[samirayad]

على فكره اللى حتصرفه على العربيه

حيحافظلك على قيمتها وفلوسك

إللى دفعتها فيها

[naserhasan]

ماشى ياباشا هصرف بس لو عوزت فلوس هقولك هههههههههه
شكرا ليك من القلب

[kaza]

الموتور اللي راكب عندك اية

[naserhasan]

الموتور2 كامة

[kaza]

الموتور2 كامة

تمام الكربراتير بتاع الموتور دة من عائلة الويبر mtdr باتنين بوابة وبينظم عملة عدد 2 ثرموفالف في المنيفلود او الشجرة والمفروض انهم بيتحكموا في ضغط طلمبة التعجيل الصغيرة الملحقة بجسم الكربراتير تاكد من وجود وصلات الفاكيم اليهم اما اذا كان الموتور بتاعك قديم شوية ومافيهوش ال 2 ثرموفالف يبق فك العمة وبص في الفتحة الرئيسية اللي في الكربراتير وشغل حركة اتياش البنزين وبص علي نافورة التعجيل بالداخل هل بترش بنزين ولا لا
لو مابترشش يبقي الرق بتاعها مقطوع وعايز يتغير اوالبلف بتاعها ملتصق بالقاعدة ومحتاج تنضيف
وظيفة الطلمبة الصغيرة دي تعويض الفرق في نسبة الخليط (كمية البنزين للهواء واللي مفروض علي السعة الخاملة 1:12) لما بتدوس علي دواسة البنزين لان بيحصل زيادة مفاجئة في كمية الهواء بالزيادة لنسبة البنزين الثابتة بيتم تعويضها بالمخلوط المنساب من النافورة الرئيسية بعد كدة لما بيتفتح الصمام البوابي وبيبداء انسياب الهواء وخلطة من النافورة الاساسية