طلمبة البنزين

[hosska]

صباح الفل عليكم يا اهل المنتدي الكرام
انا عندي مشكلة في عربيتي ان طلمبة البنزين بتهيس وكل شوية تخلي العربية تقطع وخصوصا علي المطالع او لما بعدي سرعة 90 وده حصل لما حد نصحني وقاللي انت عربيتك كربوراتير وموديل 94 يبقي لازم تحط فيها بنزين 80 مع العلم اني دايما كنت بحط 92 واقل حاجة حطتها علي مرات متفرقة كان 90
المهم ان العربية بتقطع والميكانيكي قالي ده حصل من البنزين ال80 مع العلم اني لسه مغير كل السيور والبويجيهات وعامل السرفيس كاملة
قالي لما تخلص ال80اللي فيها وتحط 90 هتبقي كويسة- عملت كده وبرضه زي ماهي
قاللي يبقي لازم نغير موتور طلمبة البنزين
يتري الكلام ده صح مع العلن اني سالت عليها لقيت ان الموتور التايوني ب150 والياباني 250جم

[hosska]

اه علي فكرة العربية سوزوكي سويفت ياباني موديل 94 والطلمبة داخل تنك البنزين

[i_Am_Legend]

مشكلة طرمبة او فلتر _طلع الطرمبة_من التنك_وبص على الفلتر بتاعها_وطلعة برة ونفضة كويس_واختبر الطرمبة بالآتى_سد الطرمبة بصباعك_خلى حد يفتح كونتاك_شوف قوة دفع البنزين عاملة ايه.لو ضعيف يبقى طرمبة.او كاربراتير مسدود.

[exact]

صباح الفل عليكم يا اهل المنتدي الكرام
انا عندي مشكلة في عربيتي ان طلمبة البنزين بتهيس وكل شوية تخلي العربية تقطع وخصوصا علي المطالع او لما بعدي سرعة 90 وده حصل لما حد نصحني وقاللي انت عربيتك كربوراتير وموديل 94 يبقي لازم تحط فيها بنزين 80 مع العلم اني دايما كنت بحط 92 واقل حاجة حطتها علي مرات متفرقة كان 90
المهم ان العربية بتقطع والميكانيكي قالي ده حصل من البنزين ال80 مع العلم اني لسه مغير كل السيور والبويجيهات وعامل السرفيس كاملة
قالي لما تخلص ال80اللي فيها وتحط 90 هتبقي كويسة- عملت كده وبرضه زي ماهي
قاللي يبقي لازم نغير موتور طلمبة البنزين
يتري الكلام ده صح مع العلن اني سالت عليها لقيت ان الموتور التايوني ب150 والياباني 250جم

اسمح لي يا باشا
انت غلطان
انت اولا المثالي لعربيتك بنزين 90 عشان ال 92 بتاكله وملوش لازمة....أنا شخصيا مظبطها من كام سنة على 80
ثانيا المشكله اللي عندك دي وبالذات في كلامك عن المطالع ان العيب ده عيب كربيراتير وبالتحديد ظبط الكربيراتير
ثالثا سؤال بخصوص التشكيل...هل تقطع دي معناها تبطل وللا تقطع بمعنى تقطيع وتنتيش
رابعا معدل استهلاك بنزينك قد ايه؟؟
خامسا اخبار الاسبيراتير ايه عندك واسلاك البوجيهات بالتحديد...وهل هي من النوع النحاسي ام من الفايبر او الحراري بكلام الصنايعية...وصناعته فين؟؟
سادسا عربيتك عامله كام كيلو تقريبا

حط استفسارك في رابطة مالكي السويفت في منتدى السوزوكي ممكن تلاقي ردود زيادة من الزملاء

http://www.nilemotors.net/Nile/97088-a.html

[mr_sameh]

هي الطلمبه ليها علاقة بسحب العربية

[exact]

هي الطلمبه ليها علاقة بسحب العربية

لأ...لأن مثلا ولنفترض العربية بتستهلك وهي في اقصى سحبها لتر فالدقيقة...الطرمبة بتضخ حوالي 5 لتر فالدقيقة وفيه حاجة زي غرفه فالكربيراتير بتتملي زي السيفون وفيها عوامة وساعة اما تتملى العوامة تطلع لفوق وتحول مسار البنزين اللي جاي من الطرمبة ترجعه التانك من تاني...عشان كده هتلاقي خرطومين بنزين واحد من التانك للكربيراتير والتاني بيسموه الراجع وده من الكربيراتير للتانك

وبكده الطرمبة ميبقاش ليها دعوة بالسحب خالص... لأان لو الطرمبة ضعفت او توقفت...ساعة مالغرفة بتاع العوامة تفضى العربية هتبطل...عطل الطرمبة حصل معايا بسبب الفيش قبل كده كانت بتعلق....كانت العربية تدور يمكن بعد 30 ثانيه مارش...وتمشي دقيقة وتقف تماما وتدور مارش تاني نص دقيقة وتمشي دقيقة وتبطل....وكان سحب البنزين بيتم بفعل الفاكيوم المتولد من التدوير بالمارش لكن مع التسارع يبدا استهلاك البنزين يزيد بدرجة لا يستطيع معها سحب الفاكيوم ان يجاريها

أتمنى ان اكون قد وضحت....والله من وراء القصد

[hosska]

شكرا ليك يا دكتور مصطفي بس هو فعلا اللي كان بيحصل زي ما حضرتك بتقول ان العربية تقريبا كل 5 دقايق بتطفي وانا ماشي واشغل حوالي من 30ثانية لدقيقة علي بال ما تشتغل ومهما كانت السرعة
انا روحت للميكانيكي وفك التنك وجبت له موتور جديد للطلمبة وغيره والعربية الان كويسه بس مش بتسحب كويس زي الاول مش بتعدي ال120ك مش عارف ليه هل ده معناه اني افك الكربراتير وانظفه
مع العلم اني ركبت فلتر بنزين جديد بس مانظفت التنك ولا الخراطيم ولا الكربراتير
الموتور حالته جيده عامل عمرة كاملة من سنة ونصف وبغير الزيت والسيور بانتظام والاسلاك بتاعت البوجيهات كاوتش اسود

[zkralla]

بنزين 80 مش هو السبب فى الكلام ده
اكتر حاجه هيعملوا بنزين 80 لو مش متناسب مع ماتور عربيتك ( انا معرفش نسبه انضغاط السويفت كام وبالتالى معرفش البنزين الى مناسب ليها كام ) انه :-
1-يأثر على السحب ( التسارع )
2- هيخلى الماتور يسقف وده فى المدى الطويل هيأثر على الماتور والكرنك والقواعد - بس الكلام ده طبعا بعد فتره طويله يعنى مش تفويله ولا اثينن ولا حتى عشره
لكن بنزين 80 او غيره مش هيأثر على طرمبه البنزين ولا الفلتر عشان نسبه نقاء البنزين من الشوائب مش مرتبطه برقمه الاوكتانى ( 80 ولا 90 ولا 92 ) لكن بتتاثر بشركه التكرير وخزنات البنزينه وتانك العربيات الى بتنقل البنزين .... الخ

[exact]

شكرا ليك يا دكتور مصطفي بس هو فعلا اللي كان بيحصل زي ما حضرتك بتقول ان العربية تقريبا كل 5 دقايق بتطفي وانا ماشي واشغل حوالي من 30ثانية لدقيقة علي بال ما تشتغل ومهما كانت السرعة
انا روحت للميكانيكي وفك التنك وجبت له موتور جديد للطلمبة وغيره والعربية الان كويسه بس مش بتسحب كويس زي الاول مش بتعدي ال120ك مش عارف ليه هل ده معناه اني افك الكربراتير وانظفه
مع العلم اني ركبت فلتر بنزين جديد بس مانظفت التنك ولا الخراطيم ولا الكربراتير
الموتور حالته جيده عامل عمرة كاملة من سنة ونصف وبغير الزيت والسيور بانتظام والاسلاك بتاعت البوجيهات كاوتش اسود

اوك كده تمام...انا ماكدبش عليك انا كان اقصاي 110 ومش باحاول اكتر من كده لأني باحس ان الموتور هينط من العربية وباحس ان العربية مش مستقرة...والنصيحة الاهم متحاولش انك تزود عن كده لمصلحتك ولمصلحة عربيتك...عشان مانتش ضامن حفر الطريق او المكروباص
لو انت من هواة البنزين 80 هاقول لك كده رضا لحد 120 ولو 92 هاقول لك ممنوش لازمة عشان باحس انها بتاكله ورأيي الشخصى ان 90 هو المثالي ليها

الحاجات اللي بتأثر في السحبب على حد علمي...

الاسبيراتير ومجموعة الاشعال لو الكهربا متأخرة بتعطل السحب جامد ولو متقدمه تكركر وتزود استهلاك البنزين فلازم تكون مظبوطة...ودي لو حد في مركز صيانة خلليه يظبط لك زاوية الاشعال على من 5 الى 7 درجات وده المثالي...مهم جدا برضه وش الاسبيراتير ونضافته وميكونش فيه شرخ او تهريب للكهربا

اسلاك البوجيهات ويفضل تغييرها كل 50 او 75 الف كم ويراعى انها لو الموبينة من النوع الصغير...تبقى الاسلاك من النوع الحراري او الكربون او ايا ما يكون اسمه المهم متبقاش نحاس

البوجيهات...انا باركب دينسو ومؤخرا جربتNGK وحاسس انها احسن وافضل واضبط الثغرة دايما على 0.7 او بالكتير على 0.8 مللي وباغيرهم مع الزيت كل 10000 كيلو بيبقوا كويسين وممكن يقعدوا بس العامل النفسي بقى وهم ال4 بيعملوا بالكتير 30 جنيه
فيه ناس بتركب 2 او 3 شمعة ودي انا مجربتهاش بس بيقولوا فالعربيات القديمة ممش بتفرق قوي...ممكن تفرق معاك عالسرعات

الزيت...انا باستعمل موبيل وان او شيل هيلكس الترا

نوع البنزين

الكربيراتير...ظبط نسبة البنزين والهوا...ودي لازم مركز بالكمبيوتر بتاع تحليل العادم عشان مفيش صنايعي مهما كان فكيك هيعرف يعملها ودي كمان هتساعدك في توفير البنزين...ممكن توصل معاك لو مشوار طوالي بسرعة100 الى 360 كيلو للصفيحة
نضافة الكربيراتير ومحدش يلعب لك فالبيكات ويسلك ويتنيل على عينه عشان متوسعش لأن قطر الحاجات دي بجزء من ميه من المللي

تاكيهات العربية ودي من الحاجات المهمة جدا جدا....تظبط عالبارد يعني العربية تبات او عالاقل بقى لها 6 ساعات مبطله تماما وتضبط ثغرة تاكيهات البنزين على 0.15 مم والعادم على 0.2 مم

ضغط الهوا فالكاوتش شكله ايه وحالة الكاوتش وحالة الطريق برضه بتفرق

الحمولة فالسيارة

مجموعة الدبرياج ونظام نقل الحركة...وده يتكتب فيها كتب

طريقة القيادة والشخص اللي سايق واسلوبها وده كمان بيأثر جامد في حتة استهلاك البنزين

تشغيل المكيف

وضيف من عندي اني باحس ان العربية دي كل اما الحرارة تعدي فالتلاتينات بيبقى دمها تقيل وبايخة والعكس فالشتا

كيفية تنظيف الكربيراتير

عاوزك بقى لو قلبك جامد...اعمل اللي هاقول لك عليه
أول هام انت هتجيب الطفايه جنبك وتكون مجهزها...متخافش ده احتياط بس...ولازم يتعمل عند اي شغل فالكربيراتير...وحاول قدر الامكان تكون العربية باردة وايدك انت سريعة...واي بنزين ينزل تنشفه بسرعة

اول حاجة نحدد الماسورة اللي مدخلة البنزين للكربيراتير...ازاي؟؟
هتيجي عالخرطومين بتوع البنزين اللي داخلين للكربيراتير وتفك افيزاتهم من ناحية الكربيراتير و هتدور العربية وتبدأ بالراحة خالص تسلت خرطوم البنزين من المواسير وبص البنزين طالع منين...الخرطوم الليهتفكه وتلاقيه مطلع لك خط بنزين يبقى هو ده المطلوب...بينما الفرده التانيه هتلاقيها الخرطوم مش مطلع حاجة والكربيراتير هو اللي بيبخ بنزين...ودي ماسورة الراجع....
واي خرطوم هتفكه رجعه مكانه قبل ما تفك التاني عشان متبدلهمش
طيب حددنا الخرطوم اللي جايب من التانك للكربيراتير....هنعمل ايه بعد كده....هتبطل العربية وتيجي على علبة الكهربا اللي موجوده قدام ركبة المساعد الشمال وهتلاقي مكتوب عليه Fuel Pump Relay ده الكتاوت اللي بيقدي طرمبة البنزين...او لو انت عارف مكان الفيوز...المهم تشيل اي واحد من الاتنين دول عشان تقطع الكهربا عن الطرمبة...وتدور العربية وتتأكد من ان الطرمبة مفصولة بأنك تشيل الخرطوم اللي جاي من التنك وهتلاقيه مش بيطلع حاجة خالص او بيسرسرب حاجات بسيطة...وهتخللي العربية دايرة سلانسيه قيمة دقيقة عشان البنزين ينقص والعوامة اللي زي السيفون صمامها يتفتح وهتيجي عالماسورة اللي داخلة للكربيراتير وتجيب انت اي نوع اسبراي كربيراتير - أنا عن نفسي باستعمل نوع اسمه أبرو - وتركب الشفاطة البلاستيك فالبخاخة...وترج العلبة وتدخل طرف الشفاطة فالماسورة الحديد بتاع الكربيراتير قيمة 3 سنتي كده والعلبه فايدك واقفة راسيا (ومش مقلوبة) وتبخ كذا بخة متتابعة وانت بتزود بنزين وتبخ كذا بخة متتابعة وتزود بنزين وهكذا...كذا مرة...وانت كده بتملى الغرفة بالاسبراي...بس ما تكترش عشان متعبيش الغرفة جامد والبخ يرجع للتانك تاني-هو مش مضر بس هيبقى اهدار للاسبراي- وبعدين نرجع نرجع كل حاجة زي ما كانت...وتركب افيزاتك والريلاي او الفيوز كده انت تقريبا نضفت الكربيراتير بدرجة كبيرة تدور العربية وتتأكد ان كل حاجة تمام...وسيبها شويتين دايره عشان تفضي البخ اللي خدته ومفيش مانع انك تكبس لها كام مرة كده...
فيه طريقة تانية انك تجيب منظف كربيراتير وتضيفه على تانك البنزين قرب ما ييجي يفضى عشان يبقى مركز وتمشي بالعربية قدرالامكان لحد ما تخلصه و بعدها تمون عادي أو حسب التعليمات اللي عليه

بعد كده فلتر الهوا والعمة من النقط الهامة للغاية....فلتر الهوا سيادتك هتنضفه كويس بالهوا المضغوط كل فترة ويكون اتجاه النفخ من تحته لفوق عكس ما هو بيسحب الهوا عشان متغرسش حبيبات الرمل والتراب بزيادة...والتغيير بيتم على حسب المنطقة اللي انت فيها...لو في اماكن متربة او اماكن نضيفة...وهتشيل الفلتر هتلاقي زور الكربيراتير قدامك...هتروح سيادتك ساحب سلك البنزين كأنك بتكبس للعربية وبايدك التانية تبخ اسبراي في زور الكربيراتيربخة 3 ثواني وتستنى 5 ثواني وتكررها عالفتحتين بتوع الكربيراتير قيمة 10 مرات كده او حسب الحاجة(هتلاقي الكربيراتير بقى نضيف) وانت كابس برضه عشان لو بخيت وهي عالسلانسية هتشرق منك وهتبطل وبكده انت نضفت مجاري الهوا...ومتخافش لو بطلت استنى نص دقيقة كده ودور هتلاقيها دارت عادي...بعد اما تخلص خااالص ركب الفلتر واقفل العمة وظبط نفسك ولم العدة
واي استفسار اسأل وميهمكش
والله من وراء القصد

[exact]

بنزين 80 مش هو السبب فى الكلام ده
اكتر حاجه هيعملوا بنزين 80 لو مش متناسب مع ماتور عربيتك ( انا معرفش نسبه انضغاط السويفت كام وبالتالى معرفش البنزين الى مناسب ليها كام ) انه :-
1-يأثر على السحب ( التسارع )
2- هيخلى الماتور يسقف وده فى المدى الطويل هيأثر على الماتور والكرنك والقواعد - بس الكلام ده طبعا بعد فتره طويله يعنى مش تفويله ولا اثينن ولا حتى عشره
لكن بنزين 80 او غيره مش هيأثر على طرمبه البنزين ولا الفلتر عشان نسبه نقاء البنزين من الشوائب مش مرتبطه برقمه الاوكتانى ( 80 ولا 90 ولا 92 ) لكن بتتاثر بشركه التكرير وخزنات البنزينه وتانك العربيات الى بتنقل البنزين .... الخ

كلام جميل وكلام معقول مقدرش اقول حاجة عنه

الحقيقة الصادمة محركات السويفت نسبة الانضغاط 1 : 9.5 وده معظم المواقع لكن الويكيبيديا كاتبة عنه انه بيتراوح من 8.3 الى 9.8 وأنا حاسس ان ال9.5 هي الاصح

[hosska]

الف شكر علي المعلومات القيمة والله انا استفدت فعلا منها الله يجازيك خير عنها
انا عموما بطلت خالص احط بنزين 80(هما مرتين بس اللي حطيت فيهم ال80)
وبعدين انا تقريبا المعدل الطبيعي بتاع العربية في استهلاك البنزين ال90 (6لتر بنزين لقطع مسافة 100ك يوميا وبمتوسط سرعة 90-110 كم/ساعة)
ثالثا انا دايما بركب بوجيهات NJK اللي مع بعض علي كارت ب 30جنيه
رابعا:الكاوتش الخلفي جديد والامامي يعتبر جديد من سنة
وبظبط ضغط الهواء(عادي مش نيتروجين) كل اسبوع علي 30 لاني بحس بالعربية احسن مع كل ظبط هواء

[exact]

الف شكر علي المعلومات القيمة والله انا استفدت فعلا منها الله يجازيك خير عنها
انا عموما بطلت خالص احط بنزين 80(هما مرتين بس اللي حطيت فيهم ال80)
وبعدين انا تقريبا المعدل الطبيعي بتاع العربية في استهلاك البنزين ال90 (6لتر بنزين لقطع مسافة 100ك يوميا وبمتوسط سرعة 90-110 كم/ساعة)
ثالثا انا دايما بركب بوجيهات ngk اللي مع بعض علي كارت ب 30جنيه
رابعا:الكاوتش الخلفي جديد والامامي يعتبر جديد من سنة
وبظبط ضغط الهواء(عادي مش نيتروجين) كل اسبوع علي 30 لاني بحس بالعربية احسن مع كل ظبط هواء:e_braces[1]:

استهلاك كويس ماشاء الله...وحكاية ضبط الكاوتش نتروجين دي اشتغالة كبيرة جدا جدا جدا...مش بيتحس بالفرق بين النتروجين والهوا الا في السرعات العالية جدا مع الاحتكاكات زي عربيات الفورميولا وان كده....أنا عندي كاوتش 175 بريدجستون وبانفخة على 38...هو بينشف اي نعم بس بيخللي العربية خفيفة جدا وفيها سحب عالي

بس موضوع البنزين ال 80 ده ادمان عندي واستخسار برضه ماكذبش عليك وخصوصا اني باعمل 1000 كيلو فالاسبوع بحوالي 65 لتر...يعني استهلاك قريب ليك...بس فالمقابل باستعمل زيت موبيل وان او هيلكس الترا او كوارتز 9000 عشان النعومة