غيرت الشكمان بس الصوت بقى عالى !!

[kid]

السلام عليكم

بعد ما غيرت الشكمان العربية إمبارح بقى صوتها أعلى , مش مطمئن للصوت العالى حاسس أنة مش كويس ؟؟؟

كنت باشتكى من ضعف فى السحب من فترة و لاحظت بردة ان البنزين بقى استهلاكة عالى اللتر الواحد بيعمل 10 كيلو و نص تقريبا (Lancer 1300 cc) و بحس بهزة فى العربية من تحت .

المهم عديت على بتاع الشكمانات سألتة إذا كان الشكمان بينفس قاللى العلبة الخلفية مكتومة و عندى الأصلى ب 300 جنية
بعد ما قاللى أنو ما ينفعش يتنظف ولا يتسلك أبدا ..قولتلوا أتكل على اللة و ركب الجديد

هوة السحب فرق جامد جدا و بقى أحسن كتير , لسة ما شوفتش البنزين و إستهلاكة و شميت منة شياط فى الأول بس الريحة خفت شوية بعد كدة

بس الصوت بقى هوة اللى أنا مش متعود علية خالص و مش قادر أبلعة

يا ترى شوية و ها يروح ولا الشكمان الجديد فية مشكلة ... هوة لونة أسود وعلية علامة ميتسوبيشى مكتوب تحتها Lancer

الف شكر و مستنى الردود يا رجالة

[mrastra]

اعتقد ان العلبة الجديدة ما فهاش مصافى فالعادم بيخرج مباشر الى الديل وبيعمل صوت اعلى من القديم وكمان العلبة بتعتك القديمة كانت اكيد مليانة روايب وكربون وودنك اخدت على الصوت دة

[kid]

الف شكر على ردك يا أستاذى
موضوع المصافى دة يعتبر عيب فى العلبة , أنا بفكر أرجع تانى لبتاع الشكمانات بس مش عايزة يشتغلنى بأى كلام و أصدقة و أمشى علشان كدة بحاول أجمع خبراتكم مع الشكمانات و مشاكلهم
و شكرا على الإهتمام :)

[maka]

و عرف ازاى ان هى مكتومة ؟؟؟

[kid]

أول ما سألتة يشوفلى الشكمان
قالى دوس بنزين , حط أيدة عند الفتحة بتاعة العلبة
دوست مرتين بنزين قاللى دى مكتومة خالص و قالى بتشتكى من سحب ضعيف و أستهلاك بنزين عالى قولتلة بالضبط
قاللى يبقى أفكهالك تمشى من غيرها و تشوف إزاى السحب هايفرق معاك
بس خليتة يغيرها / بس أخدت منة القديمة معايا

[rotanamasoud]

لو العلبه الجديده اصليه وتمام حيبقى الصوت مسئله وقت لان العلبه لسه مكربنتش
الكربون مملهاش من جوه عشان الصوت ينعم

[kid]

فعلا الصوت إبتدى ينعم مع الوقت
شكرا لردك الكريم

[MOHMED2511]

معلش في سوال هل العربيه كانت بتسخن معاك لاني عندي نفس العراض بس لما سئلت الميكانيكي قلي لو العربيه بتسخن يبقي ممكن
و شكرا