تنقيط زيت

[youssefmustang]

بسم الله الرحمن الرحيم

انا عملت طقم شنبر من 3 شهور (العربية فيات 127 فيورا ) المهم دلوقتى انا فاكر كنت اخد مطب غبى نقرة كبيرة وبدأ فى تنقيط زيت مش عارف منين رحت لبتاع الزيت قالى زيت الفيتيس ناقص وجلدة الكوبلن مقطوعة و (اويلسيه عصاية الفتيس بايظ او مقطوع مش متذكر بالظبط) بصراحة استغربت من كلامه مال جلدة الكوبلن ومال الزيت رحت للميكانيكى قالى جلدة الكوبلن بس رحت جبتله جلدتين مش واحدة قولت اغيرهم بالمرة الاتنين مع بعض انهارده نزلت ادور لاقيت العربية سخنت بسرعة جدا والمروحة اشتغلت من اول 10 دقايق ولما حركت العربية ونزلت عشان امسحها ببص لاقيت بقعت زيت صغيرة مش من ناحية الموتور ولا الفتيس البقعة نازلة من النص ما بين الفتيس والماتور ومش عارف هل من الماتور ولا من الفتيس
مع العلم ان العربية كانت ساعة ما عملت طقم الشنبر كانت عاملة 91000 كيلو دلوقتى عاملة 93800 كيلو وما غيرتش زيت فهل ده ممكن يكون السبب ولا اعمل ايه ولو فى حالة تغيير زيت الموتور اجيب نوع ايه كويس لعربيتى مش مهم الفلوس
معلش انا اسف انى طولت فى حكى المشكلة لان خبرتى فى الصيانة مش قوية
اخوكم يوسف

[youssefmustang]

لسه جاى من عند ميكانيكى معرفة قالى ان الفتيس والموتور الاتنين بيجيبو زيت لازم ننزل الفتيس وعايزين نغير اويسه اللى ورا وحاجات تانية كتير انا مش فاهمها

[mrastra]

استاذ يوسف واحدة واحدة بس
اول حاجة انت بتقول انك كشفت على زيت الفتيس كان ناقص وعرفنا نقص منين وهو من كاوتشة الكوبلن بس هى اسمها اما كاوتشة الكوبلن الداخلى او كاوتشة الاكس ......المهم غيرتها وركنت العربية ولقيت بقعة زيت بين المحرك والفتيس
كلمة بين المحرك والفتيس دى معناها اويل سيل خلفى للكرنك زى ما الميكانيكى بيقول لحضرتك النهردة
طب الاويل سيل دة خاص بزيت المحرك مش الفتيس
يبقى لازم تقولنا دلوقتى حجين مهمين
اولا بعد تغيير كاوتشة الكوبلن هل زيت الفتيس تمام مش ناقص؟
تانى حاجة هل زيت المحرك دلوقتى ناقص شوية ولا مظبوط ؟

[youssefmustang]

الله عليك رغم انى كنت متوقع ان محدش هيفهمنى لكنك قولت اللى الميكانيكى قالو بالظبط
بالنسبة لزيت الفتيس ما كشفتش عليها من ساعة تغيير الكوتشة لانى غيرتها وغيرت زيت الفتيس من ساعتها
زيت المحرك نقص اه شوية ومش عارف احط انهى نوع لعربيتى شيل ولا موبيل ولا التعاون ولا مصر
خليك متابعنى الله يبارلك عشان انت كده اللى فهمتنى فى الليلة دى
اخوكم يوسف

[mrastra]

تحت امرك يا استاذ يوسف ومعاك فى الليلة ان شاء الله
لو فعلا اتاكدنا ان اويل سيل خلفى الكرنك هو اللى بيجيب زيت
يبقى لازم نفك الفتيس ونجيب واحد ( اويل سيل خلفى كرنك )محترم اوى واهم حاجة الصنايعى وهو بيقفلة يحط علية سيليكون حرارى ويتغابى فى السيلكون عشان يقفل كويس وتخلية قبل ما يقفل يمسح مكان الاويل سيل بالبنزين عشان يطهر الزيت ويجى السيلكون على نضافة ويستنى شوية عشان السيليكون يشد ويتكل على الله يقفل فتيسة
وبخصوص سؤالك على نوع زيت كويس انصحك بشل الجركن الاحمر بـ 55 جنية زيت محترم واداؤه عالى اوى وبينعم المكنة بشكل ملحوظ ونسبة البخر بتعتة قليلة
وبالمرة بقى مصنعية فك وتركيب الفتيس من 70 الى 80 جنية
بس خد بالك ان الفتيس اما يتفك هاينقص يجى نص كيلو زيت فتيس لازم تعوضهم
بالتوفيق ان شاء الله

[youssefmustang]

انت فنااااااااااااااااااااااان انت المفروض تمسك ورشة نايل موتورز
تحياااااااااتى وتقديرى الشديد لك يا سيدى الفاضل