العربية ما بتسحبش ومخنوقة ... أعمل ايه

[ArafatEHegazy]

السلام عليكم ورحمة الله

عربيتي سكودا فليشيا كومبي موديل 96. كنت بشتكي من نتشه خفيفه بتروح وتيجي بشكل عشوائي مع دخان بسيط واستهلاك بنزين عالي. كمان العربية مكانتش بدور بسهولة الصبح. الناس نصحتني اروح لحد بتاع كرباتيرات وأخليه ينضفه تنضيفة تمام. روحت فعلا لواحد اسمه الحاج جمال في المطبعه في الهرم... فكه ونضفة ... بس شغله معجنيش قوي. النتشه راحت والعربية بقت بدور الصبح تمام والبنزين اتزبط. بعدها باسبوعين العربية ابتدت تقطع وموش عايزه تسحب علي السرعات اللي فوق ال 80 أو في المطالع. يعني لما تقرص تبتدي تقطع وتحس انها مخنوقه ..... العربيه مابقتش تجيب ال 100 كيلو الا بالعافية. قبل كده كنت بجيب بيها ال 130 و ال 140 مستريح.

المهم روحت للميكانيكي جنبي غيرنا البوجيهات والفلتر وعملنا تشك على العربية. التقطيعة راحت تماما بس موضوع السحب زي ما هو .... يعني بعد ال 70 تحس ان العربية مخنوقة وموش قادرة تسحب . وبرضوا بتجيب ال 100 بالعافية.
آخر حاجه قالهالي الميكانيكي ان ده عيب اسطوانه دبيراج. أنا حاسس ان العيب في الكربراتير والله أعلم.
هل فعلا الاسطوانه تسبب مشكله في السحب في المطالع وعلى السرعات العالية؟ أفيدنوي الله يكرمكم علشان الواحد مبقاش واثق في الصنايعية اليومين دول. هل في طريقة أتأكد بيها ان الاسطوانه هي السبب؟

[saadelden]

اسطوانه الدبرياج يعني صوت الماتور يعلي و السرعه ما تعلاش
لكن انت بتقول العربيه مخنوقه يبقى كربراتير او كهربا

[ArafatEHegazy]

اسطوانه الدبرياج يعني صوت الماتور يعلي و السرعه ما تعلاش
لكن انت بتقول العربيه مخنوقه يبقى كربراتير او كهربا

فعلا صوت الماتور وال ار بي ام موش عالين. أنا فعلا موش حاسس ان السبب الدبرياج. هشوف موضوع الكربراتير تاني.

[volk]

مش شرط الكربراتير ممكن يكون فلتر البنزين فيه عايز يتغير و سؤال اخر انت بتحط بنزين ايه

جرب كده تحط بنزين 90 لو انت بتحط بنزين 80 و شوف الفرق

[Amr_Azab]

بص يا باشا انا الموضوع ده كان عندي في عربيتي القديمة بيجو 305 كنت مسافر وفوجأت ان كل مزود عن ال90 الاقي العربية مكتومة ومش بتسحب
لما رجعت كشفت علي الموضوع ده وطلع في الاخر انه فلتر البنزين
غيرته وجبت واحد اكبر الموضوع اتظبط وبقي تمام

[exact]

مش ممكن يكون تقسيمة الكاتينة او ظبطة التاكيهات؟؟؟