يا تلحقونى ...... يا هابيع

[gadon]

عربيتى ريجاتا عادة موديل 1984 و العربية عيانة عندها عدد 2 مرض و محتاجة دكتور ابن ناس يساعدنى

المرض الاول : رجة عنيفة بتصدر من ناحية الكبوت لدرجة انها بترج التابلوه معاها ودى مش بتحصل الا مع الطلعة من الثبات او من السلانسيه و بتختفى اول ما العربية تاخد سرعة 20 كيلو و طالع و عشان اخفف من الرجة العنيفة دى لازم ادوس بنزين جامد مع دبيرياج و اخفف الدبيرياج سنة سنة وبعانى منها جدا لما تكون فى صف عربيات بيتحرك ببطء شديد زى اللى فوق الكبارى ..........الميكانيكى فى الاول قال قواعد الموتور و بعدين قال قاعدة الفتيس و اخيرا قال الاسطوانة و ناس تانيين قالوا الاسطوانة ترج على كل الغيارات مش بس فى الطلعة و انا احترت بصراحة مش عايز اغير اسطوانة وتطلع مش منها

المرض التانى : سخونة شديدة فى الجنوط الاربعة مع بعض و رحت للميكانيكى و بتاع العفشة ..... حتى الزبال بتاع الشارع بص عليها ولفو الاربع عجل كل على حده و كلهم قالوا خفيفة خالص و الفرامل مش مأثر عليها وبرضه احترت معاها

[kaza]

بالنسبة للمرض الاول مالوش غير علاجين الاول القواعد تكون بايظة ودي لازم تتغير لان نقل حالة السيارة من السكون للحركة بيكون اكتر تحميل علي القواعد لامتصاص حركة الموتور وعدم توصيلها لبدن السيارة والقواعد التالفة بتكون مبوشة وخلوصها كبير (سايبة) وبالتالي بترجرج معاك
اما العلاج التاني في حالة سلامة القواعد بيبقي الديسك والاسطوانة لو الاسطوانة متاكلة بتتزحلق بين الديسك والفولام وترج العربية كذلك عدم استواء ارتفاع ريش الديسك ترج العربية في الطلعة والكلام دة بيبان اكتر في التحول من السكون للحركة لكن بمجرد حركة العربية بيقل تاثيرة نظرا لانخفاض العزم المطلوب اثناء الحركة
ممكن سبب تاني وهو الكبالن بس يتبقي خلصانة والخلوص بين البلي وجسم الكوبلن كبير ودة بتكون الكبالن بطقطق معاك سواء بيتلف او ماشي علي طول وبترج العربية
اما موضوع سخونة الطنابير فياريت توضيح هل بعد مابتمشي وتستخدم الفرامل ودة طبيعي لان احتكاك تيل الفرامل بالديسكات بيولد حرارة
لكن لو الفرامل بتقفش معاك وتسخن الطنابير لدرجة تصاعد الدخان وغليان زيت الباكم قصة تانية ..ياريت توضح علشان اعرف ارد ...يحياتي

[gadon]

الاستاذ / kaza

شكرا جزيلا لردك الكريم ولمعلوماتك الهامة فعلا جزاك الله خيرا عنا

اما بالنسبة للمرض الاول فالميكانيكى بص على قواعد الموتور و قال سليمة و هو اساسا كان شاكك فى صلايب الكردان ومن ردك الكريم اعتقد ان المشكلة تتجه الى الاسطوانة والديسك بس معلش ليا سؤالين : الاول الميكانيكى قال خليك لما تهلك الاسطوانة خالص نبقى نغيرها طيب امتى اعرف انها اتهلكت ؟
التانى : ذكرت حضرتك موضوع ريش الديسك ياريت حضرتك تذكر لنا العلاج ايه يتغير الديسك ولا ليه علاج اخر؟
واخيرا فيه ملحوظة معرفش ممكن تفيد ولا ايه وهى ان موضوع الرجة بيظهر اكتر لما امشى مشوار كبير يعنى من بعد 10 كيلو و اكتر وابتدى امشى ببطء لاى سبب و بيظهر بردضه والعربية باردة بس بصورة اخف شوية


بالنسبة للمرض التانى : فعلا الجنوط بتسخن لما بمشى مسافة يعنى مشوار 10 كيلو و اكتر و بستخدم الفرامل بصورة طبيعية خالص و مش بيكون قافش بس واحد سواق تريلا صديقى هو اللى لاحظ ان سخونة الجنوط غير طبيعية و قالى انه بيمشى مسافة 300 كيلو واكتر و الجنوط مش بتكون بالسخونة دى
اما عن ظهور دخان و غليان زيت الباكم فده مابيحصلش
عموما السخونة عبارة عن انك تحط ايدك ماتستحملش 3 ثوانى على بعض ده غير انها ماكنتش كده يعنى من كام شهر كده كنت بشوفها مرة بعد نفس المشوار كانت دافية فقط مش اكتر
اخيرا فى المرض التانى هل سواقتى ليها دور مثلا تكون عنيفة شوية و ايه الطبيعى فى استخدام الفرامل يعنى لما تكون داخل على مطب معروف مكانه مسبقا و انتى ماشى على سرعة الغيار الرابع استخدام الفرامل الصحيح بيكون ايه ؟ انا بسال حضرنك علشان اعرف سواقتى طبيعية ولا غلط

وبكرر شكرى لحضرتك وفى انتظار ردك الكريم افادكم الله

[port_smoker]

المشكلة الاولى مشكلة طقم دبرياج

المشكلة الثانية لو مكنتش بسبب التيل هتكون مشكلة مكلفة وهى ان تكون عندك ريجة فى الطنابير وتحتاج تغيرها

[kaza]

شكرا جزيلا لردك الكريم ولمعلوماتك الهامة فعلا جزاك الله خيرا عنا

اما بالنسبة للمرض الاول فالميكانيكى بص على قواعد الموتور و قال سليمة و هو اساسا كان شاكك فى صلايب الكردان ومن ردك الكريم اعتقد ان المشكلة تتجه الى الاسطوانة والديسك بس معلش ليا سؤالين : الاول الميكانيكى قال خليك لما تهلك الاسطوانة خالص نبقى نغيرها طيب امتى اعرف انها اتهلكت ؟
يا سيدي ربنا يكرمك واساسا معندكش صلايب كردان لانك جر امامي والكبالن هي التي تقوم بنقل الحركة ممكن يكون قصد الميكانيكي المتلوتة بتاعة الاكس واللي بتكون بايتة في علبة الساتوليك في الكرونا وبيقال عليها مجازا الصليبة الداخلية للكوبلن ونادر جدا انها تبوظ في الفيات وسبب تلفها بيكون نقص زيت الفتيس الدائم وفعلا ممكن تعمل رجرجة عند بدء الحركة علشان يتم الكشف عنها افضل شيئ الفك الكلي للاكس واخراجة وقياس خلوص الروللز (شعيرات الرمان بلي )
اما الاسطوانة والديسك فاعراض نهاية الخدمة ليهم ضعف سحب العربية وصعوبة صعود المرتفعات والدوران العالي للمحرك مع بطئ العربية وتزداد المشكلة كلما كانت حمولة ووزن السيارة اكبر وطبعا ريحة الشياط المميزة للاسطوانة واللي بتشبة ريحة الفرامل القافشة

بالنسبة للمرض التانى : فعلا الجنوط بتسخن لما بمشى مسافة يعنى مشوار 10 كيلو و اكتر و بستخدم الفرامل بصورة طبيعية خالص و مش بيكون قافش بس واحد سواق تريلا صديقى هو اللى لاحظ ان سخونة الجنوط غير طبيعية و قالى انه بيمشى مسافة 300 كيلو واكتر و الجنوط مش بتكون بالسخونة دى
اما عن ظهور دخان و غليان زيت الباكم فده مابيحصلش
عموما السخونة عبارة عن انك تحط ايدك ماتستحملش 3 ثوانى على بعض ده غير انها ماكنتش كده يعنى من كام شهر كده كنت بشوفها مرة بعد نفس المشوار كانت دافية فقط مش اكتر
خد بالك ان فرامل النقل بتفرق عن السيارات الصغيرة في نظرية العمل احنا بضغط زيت الفرامل والنقل الثقيل بالهواء
واستخدام الفرامل في النقل الثقيل عمرة مابيكون بنفس الاستخدام المتكرر للفرامل وبالاخص الفجائية كما في الملاكي غير انة عندة بلوف بتخرج الهواء المستخدم في الفراملة بعد انتهاء التاثير الفرملي ويتم الاستعواض بهواء جديد من خزان هواء المركبة لكن عندنا الزيت بيستمر درجة حرارتة بالارتفاع بالاستخدام المتكرر للفرامل دون تبريد عدا انه بيتم تبريدة بالتبادل الحراري مع اجزاء دورة الفرامل من مواسير وديسكات واللي بتسخن بدورها بالاستخدام المتكرر وعلشان كدة بتكون بعض سيارات الرالي مجهزةبدورة تبريد مستقلة لكل عجلة علي حدامن هنا حرارة التشغي لفرامل الزيت لازم تكون اعلي من الهواء للنقل اما موضع دافية من كام شهر حط في اعتبارك ان حرارة الجو زادت وبالتالي لازم هتزيد حرارة اجزاء العربية المختلفة عموما علشان تطمن خد الهواء من مساتر العجلات وغير زيت الفرامل وشوف لو اتحسنت يبقي كان فيه هواء في الدورة والزيت تالف

اخيرا فى المرض التانى هل سواقتى ليها دور مثلا تكون عنيفة شوية و ايه الطبيعى فى استخدام الفرامل يعنى لما تكون داخل على مطب معروف مكانه مسبقا و انتى ماشى على سرعة الغيار الرابع استخدام الفرامل الصحيح بيكون ايه ؟ انا بسال حضرنك علشان اعرف سواقتى طبيعية ولا غلط
موضوع السواقة بيختلف من سائق لاخر طبقا لاسلوبه وسرعة رد فعلة ومش ممكن حد يقدر يقر ان سواقتة نموذجية لكن بالتاكيد كلما قدت السيارة بهدوء والتسارع بتاعك بطئ وفرملتك بالتدريج وبهدوء وبتتعامل مع العربية بلطف كلما طال العمر الافتراضي لها وقلت مصاريف الصيانة لكن علشان اقولك علي طريقة موحدم للمطبات صعب لان كل مطب ولة طريقة وحسب سرعة الدخول عليه وحالة العربية ونوع المطب فدي عايزة مجلد مش مشاركة في المنتدي ...تحياتي

[gadon]

الله عليك يا استاذ / kaza

ردودك غاية فى الروعة و المعلوماتية والله بستفيد من حضرتك

ربنا يكرمك و يجازيك عن ردك خير الجزاء