حاسس ان العربية مش ناعمة زى باقى فئتها

[bam8572]

السلام عليكم

شباب

معايا لانسر كريستالة 98

مش عارف ليه حاسس ان العربية مش ناعمة زى بقيت الكريستالة الى ركبتهم

عملت صيانة كاملة ( فلتر زيت , غيار زيت , فلتر هواء , فلتر بنزين , ظبط كاربراتير ) كل حاجة فى الصيانة متأخرتش

قواعد الموتور تممت عليها ممتازة

الديسك ممتاز , الاسطوانة فيها سنة تكتكة لكن حالتها جيدة جداً والميكانيكى قالى حرام عليك تغيرها

مش عارف ليه بردو العربية خشنة

العربية كسحب بتجرى وكله تمام
لكن مشكلتى انى حاسس بالموتور بردو وحاسس بصوت العربية
انا ركبت كريستالات تانية بدورها ببقى مش عارف اذا كانت العربية دايره ولا لأ , على عكس بتاعى لو بصيت فى المرايات الجانبية مثلاً هتحس ان المرايات بتترج وانت واقف

كذلك فى المشى ,’, لما باجى امشى بكريستالة تانية بحس انى راكب عربية زيرو ,, نعومة العربيات الزيرو مش حاسس بحاجة خالص بمعنى اصح طاير من على الارض طير

طيب يبقى فى عربيتى من ايه .؟؟؟؟؟؟؟؟

[HAITHAM1985]

إنت كنت راكب عربية أوروبى قبل كده ......... ممكن يكون ده اللى مديك الإحساس ده ........... لأن أغلب العربيات الأوروبى وخصوصا الألمانى aggressive عن اليابانى

من ناحية تانية ......... راجع على العزل

من ناحية تالتة .......... لو فى رعشة هى اللى بتسبب إهتزاز المريات ...... وبقول لو فى ......... يبقى ممكن تراجع على الكهربا ....... بالمرة

من ناحية رابعة .......... راجع على المساعدين الأماميين

من ناحية خامسة ......... ممكن المرايات تكون مفككة وهى اللى بتستهبل ......... بهزر طبعا

ربنا يوفقك وتتظبط

[bam8572]

شكرا لسرعة حضرتك فى الرد بس لو اخدت بالك بقولك عربيات تانية من نفس النوع يعنى بردو لانسر زى بتاعى بالظبط

تفتكر الكهرباء ممكن تدمر نعومة العربية وجمال مشيها ؟؟

المساعدين تمام دا انا مغير لها مساعدين وجايب لها مساعدين بومة وظابطها ظابطة تانية

وحضرتك تقصد ايه بـ راجع على العزل ؟؟

[motazgamal]

طيب ما هو فية كريستالة كربرتير و كريستالة انجكشن ممكن بتاعتك تكون كربراتير

[exact]

العربية بتاعك مقدمة كهربا وحط لها بنزين 92 طبعا

[bam8572]

اه بتاعى كاربراتير ,, بس الى بركبهم بردو كاربراتير

حضراتكم ممكن تفتكروا فعلاً ان تقديم الكهرباء يبوظ نعومة العربية بالطريقة دى ؟؟

عموماً هشوف موضوع الكهرباء دا وارد على حضراتكم

ملحوظة : العربيات التانية الى ركبتها كلها كانت بتفول 80 او 90 , وانا فى الغالب بفول 90 ,, يعنى فى عيب فعلاً عندى

[exact]

من باب العلم بالشئ... فرق الدنيا بين بنزين 90 و 92
خليك في 92 احسن كتير والفرق المادي بسيط

[bam8572]

يافندم حاول تفهمنى
المشكلة مش فى البنزين اطلاقا والله

انا فولت الاتنين , وايام ماكانت الازمة شادة عن كدا بكتير كان عندى سفرية مستعجلة وكان لازم العربية وفولت 95 وحياتك

لكن المشكلة بردو مش عارف من ايه

يعنى المشكلة ملهاش علاقة بالبنزين اطلاقاً

[back2back]

بص يا باشا جرب خللى الميكانيكى يبص على التاكيهات انا افتكر صوت الموتور فى عربيتى الكرستالة السابقة كان نعم بعد ما ظبط التاكيهات

[bam8572]

والله لسا ظابطها هى كمان

ومش عارف اشكر حضراتكم ازاى على التجاوب وسرعة الرد

بس فعلاً حتى التكيهات ظبطتها والله

[amrelsaqqa]

موتورك حالته ايه
والعفشة عندك عاملة ايه
هل عربيتك كانت عملت حوادث قبل كدة لا سمح الله

[motazgamal]

طيب روح نضف كربراتير و قولنا اية الاخبار

[amrelsaqqa]

حاجة كمان

شوف حالة الشكمان عشان بيفرق جامد في نعومة العربية وممكن يعمل رجة ويحسسك ان العربية متلتة
ده غير الكهربا وخصوصا البوجيهات بتفرق برضه في نعومة العربية

ظبط الزوايا وبلي العجل بيفرق في نعومة العربية ..

حاجات كتير بس خلينا معاك واحدة واحدة

[bam8572]

شكراً لمروركم السريع ياشباب

انا عامل عفشة كاملة جديدة ادام وورا , مساعدين استيراد , مغير الطنابير اللى كانت متاكلة شوية وحجات من دى

الحمد لله العربية مش حوادث ولا حاجة دى يادوب رشة بيرا نضافة اما دواخلها زيرو

بالنسبة للبوجيهات انا لسا من 4 ايام بس عامل الآتى

جايب كاربراتير جديد لإنى كان عندى مشكلة فى القديم
وكذلك سبراتير جديد
ومغير فلتر الزيت وطبعاً مغيرالزيت نفسه
كذلك زيت الباور
فلتر هواء جديد
فلتر بنزين جديد
طقم بوجيهات جديد
ظبط تيكيهات


يبقى فاضل ايه بس عشان لما ادور العربية حتى محسش انها زى بقية اخواتها ؟؟؟

[amrelsaqqa]

الموتور بتاعك اتفك واتلعب فيه كتير ولا لا ولازم تعرف حالته عاملة ايه