يا جماعه الحقونى ميه العربيه هتجننى

[eyeswizard]

العربيه :هيونداى فيرنا
موديل: 2006
ــــــــــــــــــــــــــــــــــــــــــــــــــ ــــــــــــــــــ
هحكيلكو الحكايه من زمان شويه
من حوالى شهر و نص
الكاتينه كانت اتقطعت
و هنا كانت الطامه الكبرى
الموتور هيتفك لاول مره
وش السلندر اتفك عشان فى صباب اتعوج
و طلع صباب واحد بس الحمد لله
خلصنا و كله تمام
بعد شويه الراديتير اتخرم من فوق كده و روحت صلحته
و قولت الحمد لله انها جت على اد كده
دلوقتى بقى
الميه بتنقص اسرع من البنزين
لو مشيت مشوار 20 كيلو ارجع بالقربه فاضيه و احيانا الراديتير ناقص منه حبه
روحت للميكانيكى قالى الرادياتير بايظ نظرا لانه بيسرب الميه لكن اللى شوفته بعينى نقطه ميه لا تتعدى مساحتها المللى مربع
و قالى العربيه فيها مروحتين و الاتنين بيشتغلو لما العربيه تسخن لكن انت عندك واحده بس اللى بتشتغل (التانيه مش عطلانه لا هى بتشتغل مع التكييف بس) مع العلم العربيه ماشيه كده من يوم ما استلمتها من حوالى 3 سنين
قومت رايح للكهربائى عشان اشوف موضوع المروحه ده و قالى المروحه دى على كمبيوتر العربيه و مينفعش نلعب فيها و هو ده وضع المصنع لكن انت محتاج تغير الراديتير ( و فعلا الراديتير كان حالته وحشه)
جبت واحد جديد كورى و ركبته (بنفسى) عشان ابقى مطمن و ركبته صح جدا (انا بحب ادعبس فى العربيه بس فى حدود المسموح يعنى :D )
دورت على النت على موضوع جوان وش السلندر و الاختيارات اللى لقيتها
اما الزيت يجى ع الميه
او الميه تجى ع الزيت
او يبان فقاقيع فى الميه و العربيه دايره
و للاسف مش لاقى ولا حاجه من دول !!!

كمان جربنا خط التكييف السخن قولنا يمكن التسريب منه بس طلع سليم جدا

حاليا انا بفكر فى احتمال جوان وش السلندر و مش شايف صعوبه فى تغييره لانى سالت عليه و قالولى ب 30 جنيه يعنى ان شاء الله الموضوع لن يتعدى ال 100 جنيه بالمصنعيه بس انا خايف ادخل فى القصه دى و متحلش الموضوع و المشكله كمان انى وقتى ضيق اوى

ــــــــــــــــــــــــــــــــــــــــــــــــــ ــــــــــ

السؤال بقى
هو وضع المروحه كده فعلا بالنسبه للموديل ده و هل اتغير فى الموديلات الاحدث ؟؟
انتو شايفين الحل ايه فى نقصان الميه الكبير ده؟

[a_arazik]

باشا طالما فية تسريب مية اكبس دورة التبريد الاول عند حد بتاع ردياتير هيكبسها بمنفاخ ويشوف التسريب فين وبعدين ان شاء الله المشكلة تتحل

[MITSUKERO]

انت واجع قلبك ليه ؟ ما تكبس دورة التبريد و شوف النتيجة

[mo7eb elrasol]

ايه موضوع كبس دورة التبريد ده؟
بيكون ازاى؟

[eyeswizard]

يا جماعه احنا فى المنصوره مش فى القاهره
كبس دوره تبريد ايه
دا انا حاولت اسال على موضوع اختبار كبس الموتور الناس كانت بتقولى انت بتقول ايه و مش مصدقين ان في كده
و ده فى مركز لصيانه هيونداى و المركز ده كبير


عموما
انا لاحظت النهارده حاجه غريبه
فى كام نقطه ميه كده نزلو من العربيه عند الكاوتش الامامى يمين
انا بفكر فى طلمبه الميه دلوقتى
ايه رايكو
هروح بكره اشوف الميكانيكى تانى و يارب تطلع هيا و اخلص بقى

[engwael]

انزل القاهرة واختبر دورة التبريد وريح دماغك هو يوم بدل ماانت تعبان كل يوم

[تامر.محمد]

كان فيه مشكلة حصلت معايا في اللانوس , مش عارف ليها علاقة باللي عندك ولا لأ بس يمكن تفيدك

مرة فجأة لقيت العربية مافيهاش مياه خالص
فزودتها , و بطلتها و طلعت البيت , نزلت الصبح ابص لقيت المياه موجودة و العربية ما تحتهاش مياه , طب تمام مافيش تسريب
دورت و طلعت , هوب شوية و لقيت المروحة شغالة جامد , وقفت و بصيت , مافيش مياه خالص
المهم ان الخلاصة ان العربية ما بتسربش مياه خالص و هي واقفة و مش شغالة , لكن تدور و تمشي بترمي المياه كلها

طلع العيب من طرمبة المياه , لما بتشتغل بترمي المياه برة و لما غيرتها بقى كله تمام

[eyeswizard]

تقريبا يا تامر مشكلتى قريبه من مشكلتك
العربيه بتنقص منها الميه بس و هى دايره
لكن لما بسيبها مبطله بتفضل الميه زى ماهيا
و الشك حاليا فى طلمبه الميه
ربنا يسهل و تطلع هيا خلينا نخلص

[eyeswizard]

انا ركبت طرمبه الميه الجديده امبارح
و لحد دلوقتى المؤشرات بتقول ان هى اللى كانت السبب
جارى التاكد من مستوى الميه بدون اى تزويد لمده 3 ايام عشان لو فى تسريبات اخرى تتعرف