عايز اي مهندس سيارات يفهمني التقرير ده

[Tiger2013]

روحت كشفت علي موتور استيراد لسه شاريه و مشيت بيه 500 كم في بنزينة موبيل في شارع الهرم و كتبلي التقرير الأتي بس يا ريت اي حد يفهمهولي - ملحوظة الشكمان كان فيه زيت من موتور العربية القديم :



الكبس في كل السلندرات 190 رطل/بوصة مربعة
1-- 190
2- 190
3- 190
4 - 190

ارتفاع الكبس المطلق للسلندرات تساوي الكبس النسبي للسلندرات

لا يوجد اصوات غريبة بالمحرك

دخان ابيض + اسود من الشكمان و تزداد مع الدفعة

استهلاك زيت متوسط بالمحرك - ده كلام المهندس مع اني مستوى الزيت كويس

[Tiger2013]

يا جماعة مفيش اي مهندس يفيدني

[Mamoud salah H]

دخان ابيض + اسود من الشكمان و تزداد مع الدفعة

استهلاك زيت متوسط بالمحرك - ده كلام المهندس مع اني مستوى الزيت كويس

الجملتيين دوول لا يبشروا باالخيير لان دخان ابيض من الشكمان يعني طقم شنبر او كاوتش صباب
ودخان اسود يعني في خلل في منظومة البنزين

استهلاك زيت متوسط يعني الموتور مش تمام وممكن يكون بدا يخف


يارب يكوون كلامي غلط ويكون الموتور سلييم

[besso]

هو قاس الكبس بس مقالش النسبه دى كام فى الميه لان النسبه بتدل على حاله المحرك

[محمد بدر]

طيب معلش سؤال
إللى كتب التقرير مش كان المفروض تفهم منه افضل
انا حاسس ان الموضوع ده ذى المريض إللى راح للدكتور والدكتور خاف يصرح له بحالته
وعايز يضمن الكشف بتاعه

[aboomar22]

تحليل نتائج اختبارات الكبس ((منقول ))
تحليل نتائج الاختبار:
هناك العديد من التحاليل المختلفة لنتائج الاختبار, ولكن كقاعدة عامة الضغط 135 رطل على البوصة المربعة أو أكثر تعتبر حالة الاسطوانة ممتازة, وفي حالة أن الضغط 85 رطل على البوصة المربعة أو أقل تعتبر حالة الاسطوانة سيئة.
• الحالة الجيدة للاسطوانات:
القراءة عالية بجميع الاسطوانات ويكون الاختلاف في حدود 10% بين قراءة الاسطوانات.
• الحالة المقبولة للاسطوانات:
هو بأن تكون قراءات ضغط الانضغاط في جميع الاسطوانات تقريبا متساوية وأعلى من 135 رطل على البوصة المربعة. اختلاف القراءات للمحركات المتآكلة غير مستغرب, ولكن في حالة أن الاختلاف بين أعلى قراءة واقل قراءة لا تختلف بأكثر من 21 رطل على البوصة المربعة وأقل قراءة لا تقل عن 100 رطل على البوصة المربعة, فإن حالة المحرك تكون مقبولة.
• الحالة السيئة للاسطوانات:
في حالة وجود اختلاف كبير بين قراءة الاسطوانات فهذا يدل على وجود مشكلة بتلك الاسطوانة, أي تكون قراءة أقل ضغط اسطوانة يقل عن 70% لأعلى ضغط اسطوانة, في حالة ضغط أعلى اسطوانة 150 رطل على البوصة المربعة فإن أقل ضغط للاسطوانة المقبولة لا يجب أن يقل عن 105 رطل على البوصة المربعة.
زيادة الفرق بين الاسطوانات تكون بسبب تأكل أو كسر لحلقات المكبس, أو بسبب صمام محترق أو صمام ملتصق بالدليل أو بالأسباب مجتمعة.


من الكلام المكتوب يبقى كبس موتور حضرتك كويس قوى

[chiko]

افتكر ان التقرير تقريبي .. لان البساتم في ماتور مستعمل ضغطها مختلف مينفعش يبقي الاربعه ضغط واحد .. انا عارف بتوع البنزينات بيعملو ايه .. بيكتبو تقرير تقريبي .. علي احساس كبس البساتم لكن مبيكون مظبوط مايه المايه .. و اي ماتور استراد في اول 500 ك هتلقي فيه دخان و شوية حاجات بسيطه كده لانه كان مركون .. طالما العربيه مظبوطه معاك و مفيش صوت او مشاكل .. يبقي امشي بيها شوية لحد ما الماتور ينظف .. و الصوبابات و البساتم تكربن ... ساعتها هتقدر تعرف حالته ..

انا اشتريت ماتور استرد و كان لسه بيلين .. لاني فكه بايدي من عربيه جديده و باظت من النقل في المركب .. و طلع عيني في اول 500 ك .. لكن الحمد الله بعد 500 ك شغال معايا مشاء الله بقاله 6 سنين ..

[amrelsaqqa]

لو فعلا الكبس 190 و البساتم كلها قريبة من بعضها كدة او متساوية
يبقى الموتور ده ممتاز !

وصعب يبقى الموتور ارقامه كدة وياكل زيت
يا اما الراجل قاس غلط ، يا اما قياس تقديري

استهلاك الزيت ده هو عرفه ازاى اصلا ، عامة ممكن اويلسيلات بتهرب او كاوتش صباب من الركنة انما النسبة دى المفروض ممتازة ولا توحى باي مشكلة في البساتم او الشنابر ...


بالنسبة لدخان ابيض ممكن يبقى جوان وش سلندر في اوله

هو اللى انا حاسه ان الموتور كويس اوى ، بس من الركنة محتاج صيانة للجوانات والسيور وما الى ذلك ..

[Tiger2013]

الف الف شكر يا جماعة على معلوماتكم ديه , طمنتوني , انا لسه شاري العربية ديه و من ساعتها و انا في دوامة , احل مشكلة تطلعلي مشكلة تانية

[starlanos]

الف الف شكر يا جماعة على معلوماتكم ديه , طمنتوني , انا لسه شاري العربية ديه و من ساعتها و انا في دوامة , احل مشكلة تطلعلي مشكلة تانية

الله يكون في عونك نفس الي حصلك حصلي بالظبط اول لما جبت العربية غيرت ماتور
نصيحة
اعمل الصيانة كلها حالا واي حاجة في العربية كهربا عفشة كهربا اعملها عشان مش كل شوية تعمل حاجه وتاثر علي حاجة تانية