مشكلة ترزيع 31

[عربياتى]

عندى مشكلة بقالها كتير وشافها اكتر من واحد مرة كهربا زيادة مرة نوطى الماتور من عند الكربيراتير
دة جزء من المشكلة الجزء الاكبر والاهم ان العربية بعد كل مشوار حتى لو مشوار صغير ابطل من هنا تقعد ترزع ولازم تاخد غيار عشان تسكت وانا فاصل كل حاجة بردو اتقالى كهربا زيادة الموتور عالى مش عارف اية وتتكرر تانى لدرجة مرة صنايعى قالى سيبها كدة ومتقلقش رد غير طبيعى حد قابله مشكلة ترزيع العربية بعد ما يطفيها ؟

[chiko]

يعني الترزيع ده موجود علي طول و الا بيروح و بجي مع دوس الدبرياج او الغيار .. لانه لو دايم ..يبقي من الماتور من تحت سبايك و كرنك و حوارات العمره ..لكن لو مع الغيار يبقي من طقم الدبرياج او الفتيس

[عربياتى]

الترزيع دة بيحصل بعد ما ابطل العربية عشان اسكت الترزيع دة اديها غيار وهى مبطلة الترزيع فى الموتور بس مقدرش احدد فين بالظبط لانى بكون لسة جو العربية والفتيس عصاية بتترج فعلا والميكانيكى مقالش موضوع عمره خالص زى ما قولت لك بيقول مرة كهربا زيادة الموتور على شوية مش ميكانيكى واحد لان المشكلة خلتنى اغير اكتر من واحد وشكرا لحضرتك

[Zing0]

ممكن فعلاً تكون الكهربا مقدمه و عامله كده
بعد متفصل العربيه تلاقيها بتتنفض عامله زى "الدبيحه إللى بترفص"
و دى ليها 3 أسباب عانيت منهم:
1- تقسيمة الكاتينه مش مضبوطه على العلامات بالضبط
2- الإسبراير نفسه مقدم توقيت الإشعال من الصينيه
3- الإسبراتير نازل على ترس الزيت مقدم سنه أو سنتين

الليله كلها ميكانيكى بيفهم و يضبط تقسيمة الكاتينة و الإشعال (الإسبراتير) مع ترتيب الحريق فى السلندرات.

[essamenen]

السلام عليكم
كانت عندى نفس المشكله والحمد لله اتحلت ( انا معاي 131 )
المشكل عندى و دخول كميه بنزين اكثر من الازم لغرفه الاحتراف وبالتالى تشتعل نتيجه سخونه المحرك
وتم حلها عن طريق ظبط الكاربراتير وذلك بفتح مسمار الهواء قليلا وقفل مسمار الذى يقفل باب الكربراتير ( المتصل بى سلك دواسه البنزين والمتحكم فى باب الكربراتير من الداخل ) بحيث اصيح rpm على 800 تقريبا ( لو عندك rpm يصبح الظبط اسهل )
جرب ظبط الكربراتير اولا
واليك اخى العزيز اسباب الدربك او استمرار دوران المحرك بعد غلق من الكونتاك
1- عدم ظبط الكرباء وهذا اول سبب يخطر فى البال
2- استمال وقود اقل من الاوكتان الموصوف للمحرك
3- ارتفاع درجه حراره المحرك بشكل غير طبيعى ( فتعمل السخونه الذائد على احتراق البنزين بسسب السخون ليس عن طريق البوجيهات
4- دخول كميه من الوقود الكثر من الازمه لغرفه المحرك وانا ارجح هذا السبب )
وانا معاك ان شاء الله واى استشاره لان الموضوع ده جننى و احرجنى كثيرا

[ayam7]

دة غلط جدا طبعا ولاقدر الله ممكن يكسر شىء فى الماكينة لانه حريق غير منتظم
جرب اللى قال عليه الاخوه الزملاء من إقتراحات
الفكرة انك لما بتقفل كونتاك وبتمنع الكهربا عن البوجيهات بيستمر الحريق نتيجة ارتفاع درجة حرارة الغرفة مع وجود تسريب او زيادة فى كمية البنزين داخل الغرفة ممكن تكون محتاج تغير بيكات الكربراتير
او تظبط تاكيهات وياريت تفتح غطاء الزيت وتشوف لو فيه نفخ ممكن تكون محتاج تعمل رودية صباب

[عربياتى]

- تقسيمة الكاتينه مش مضبوطه على العلامات بالضبط

واحد قالى الموضوع دة وقالى فعلا محتاج صنايعى تمام المشكلة بقى سواء السبب دة او باقى اسباب اللى قالها الاخوة الاعضاء فى الميكانيكى اللى بيفهم وحل مشكلة زى دة
وياريت الاخ essamenen يقولى افضل مقاس كاوتش ل131 ناس قالت بلاش تعرض وخليك مقاس 13 وهات اعرض حاجة فى ال13 مش فاكر تقريبا 185\60 حاجة زى كدة معلش خبرتى قليلة والمفروض هشترى النهاردة ومش عايز اقول يارتنى
وبسمع عن ممكن لو عرضت 14 العربية تعوم ويحصل مشاكل والكلام دة ياريت تدلنى ومعلش سؤال كمان جنوط الحديد لل31 افضل ولا الاسبور
وشكر لكل الاعضاء اللى ردو وساعدونى وياريت لو عنوان ميكانيكى فاهم فى المشكلة دة وعنده ضمير يكون من القاهرة

[essamenen]

اخى العزيز
مقاس الجنط الحديد 13* j5
والمقاس ده يركب عليه 175 \ 70 ( 175 هو عرض الكاوتش )
وانا شايف ان المقاس ده مناسب جدا لعزم وقوه العربيه وثبات العربيه ومع العلم انه ممكن تركب كاوتش اصغرفى العرض و هو 165 \ 70 و المقاس ده هو الى بي نزل فى العربيه اصلا والى مكتوب فى الكتالوج ولو عرضت الكاوتش الى 185 \60 هتحتاج الى جنط مقاس 13 *j5.5 علشن يركب عليعه 185
امابالنسبه للجنط الحديد فهو اجمد و اقوى من الجنط الاسبور فلك الاختيار من بين القوه والشكل وذاك يرجع لك.
اما مقاس الكاوتش خليك فى 175\ 70 ومن الممكن يركب على الجنط الحديد الى عندك او الجنط الاسبور و يبقا برضو شكل حلو وخارج لبره

والخلاص علشان ما تتلخبطشى او صاحب معرض الكاوتش يلخبطك
هات مقاس كاوتش 175 \ 70 يركب على الجنط الحديد الى عندك او اشترى له جنط اسبور يركب على ذلك المقاس

[عربياتى]

شكر

شكرا لكل اللى رد عليا وانا الحمد لله استقريت على المقاس 175\70
وبالنسبة لمشكلة الترزيع قريب هشوف حلها ولو فى حاجة هتابع معاكم شكرا مرة تانية

[عربياتى]

انا روحت لواحد وقولت له على المشكلة بتاعة الترزيع بعد غلق الكونتكت وقالى ان المشكلة دة اسمها باك فاير وغلط وقالى هنغير طقم شمبر وقال يا اما عندك طقم شمبر او سلندر مكسور والموضوع هيتكلف 800 جنية كله على بعضه طب هو حدد كل دة على اساس اية وهو لسة هيفتح ويشوف ياترى المشكلة اية اية رايكم ف الكلام دة بالاضافة مفيش اى دخان مش طبيعى بيطلع من العربية هى بس الصوت عالى وقالى لما نشوف شمبر ولا سلندر ونغير الحاجات دة الصوت هيكتم خالص ونصحنى لو هعملها يكون الايام دة قبل الصيف محتاج رايكم حاجة تانية نسيت اقولها وبتاع الكربيراتير قال الاكس عايز يتغير عشان الباب بيعلق اصدق اية

[ayam7]

ليه طقم شنبر ؟؟؟؟؟؟
عندك دخان من خرطوم الفايظ ؟؟
عندك دخان من الشكمان ؟؟
الزيت عندك بينقص ؟؟
البوجيهات بتقطع نتيجة زيت ؟؟
طيب عملت إختبار للكبس والنتيجة سيئة ؟؟
لو معندكش اى اعراض من دى يبقى دة مكانيكى مش تمام
طب مشكلة الترزيع او الباك فاير على رأى الميكانيكى سببها شنبر ؟؟ طيب سببها سلندر مكسور ؟؟ لاء دى كدة إشتغالات
احنا اتكلما فى حكاية الترزيع وابدأ واحدة واحدة لحد ماتوصل وياريت يكون الميكانيكى ( أمين )
قول أمين

[Zing0]

إكشف على تقسيمة الكاتينه الأول زى مقولنالك
موضوع الشنبر ده نصب علنى
لأن الشنابر لو متآكله أو مكسورة متعملش الأعراض دى خالص

دى أعراض كهربا مش مضبوطه
زى مقولنا لك عاوزة ميكانيكى بيفهم علشان ميشتغلش عليك

[hassanmm]

المشكلة دى كانت عندى فى سياره لادا سمارا وكنت بعد غلق الكونتاكت تستمر فى الدوران بدون توقف مع شوية ترزيع لدرجة كنت أفصل اسلاك البوجيهات وهى مستمرة فى الدوران طبعا ظاهرة غريبة لم أمر بها من قبل . طبعا ذهبت للميكانيكى وحاول يحل المشكلة لكنه لم يستطع . سألت صديق لى مدرس فيزياء اعرف انه بيفهم كويس في السيارات قال لى عندك نسبة الكربون عالية جدا وتتجمع عند رؤؤس البوجيهات وتتوهج كلها وتعمل اشعال غير منتظم بغرف الاحتراق مما يحدث عنه الترزيع والدربكة وعند اغلاق الكونتاكت يستمر هذا التوهج فى ادارة المحرك لفترة محدودة حتى ولو تم فصل اسلاك البوجيهات . ولحل هذه المشكلة كان لابد ان اعالج موضوع الكربون الزائد والدخان الأسود عند متخصص كربراتيير حيث فكه بالكامل وقام بتنظيفه وصيانته وبعد ذلك تم حل المشكلة بالكامل والحمد لله...................

[عربياتى]

متشكر لرد حضراتكم ومساعدتكم وانا هروح لواحد بتاع كاربيراتير كويس واروح اعمل الكاتينة بردو عشان تقريبا فعلا معنديش كل الاعراض اللى فوق دة ولا دخان ولا حاجة وناس قالت لك لو بستم مكسور هتسمع اصوات ملهاش حل ودة كلام غير صحيح المشكلة يا جماعة فين الميكانيكى او بتاع كاربيراتير امين على فكرة فوق ال 5 صنايعية شافو المشكلة دة ومقدروش يحلوها اللى يظبط الاسبراتير واللى يظبط علو صوت الماكينة من الكرابيراتير وتفضل المشكلة هى هى بعد ما امشى من عندهم المشكلة فى الصنايعى اللى بحق
هروح لواحد بتاع كربيراتير الاول يمكن الاكس فعلا محتاج يغير خصوصا ان بحس الواير بيعلق مع الكرابيرتير وبيعلى الصوت ازوقه بايدى يتعدل شوية
جزاكم الله خير ان شاء الله