طقم سبيكه ولا عمره ولا شورت بلوك

[Osama srhan]

من يومين وانا راجع من اسكندريه
كنت ماشى بالعربيه و كل حاجه تمام
و مره واحده سمعت صوت كركره جاى من المكنه
وقفت و نزلت فتحت الكبوت لقيت مفيش صوت على السلانسيه
اول ما ازود يبدا يظهر زى ما يكون فى حاجه سايبه بتشخلل كده
والسحب زى الفل و انا ماشى الصوت بيختفى شويه ة يرجع شوية و بصراحه احترت مش عارف ده ايه واحد يقولى عمره كامله و واحد يقولى شورت بلوك
مع ان مفيش دخنه بتطلع من الموتور او الشكمان لا ابيض ولا اسود
ارجو الافاده

[م/أحمد عبد الفتاح]

الصوت ده لو صوت بييل يعنى السبيكة بتاعته خلوصها زاد بتحصل كذا حاجه :
- صوت خبطة معدنية خصوصا والعربية باردة بمجرد ماتدور .
- لمبة الزيت بتنور لان السبيكة البايظة بتهرب ضغط الزيت .
إزاى تشخص انه بييل :
حاتدور العربية وهى باردة خالص وحد تانى يدورهالك وانت تفتح الكبوت وتشيل اسلاك البوجيهات واحد واحد لو الصوت اختفى عند بوجيه معين يبقى البييل بتاعه هو السبب وكده الضوت من بييل . لو مش عاملة صوت خبطة خلى اللى قاعد جوه يزود بنزين لغاية الصوت مايظهر ويثبت رجله على كده وانت تعمل حركة البوجيهات .
وعلشان تأكد الشك باليقين يبقى تنزل تفك طبة الزيت من الكارتير وتفضى الزيت فى وعاء نظيف وبعد ماتنزل الزيت اكشف عليه لو فيه رايش معدنى او حتت بسمك رفيع زى الموس كده .
احتمال تانى ان الصوت بسبب شنبر مكسور وده بتعرفه بانك حتعمل حركة البوجيهات دى تانى ولو الصوت فضل موجود وماراحش عند بوجية معين يبقى احتمال كبير شنبر مكسور - كمان ممكن تلاقى عادم ودخان طالعين لما تشيل المقاس من مكانه والعربية دايرة او من غطا الزيت . وعلشان تأكد موضوع الشنبر يبقى لازم نقيس كبس الموتور ولو لقينا اسطوانة معينة هى اللى كبسها اقل من الباقيين حاتكون هى اللى فيها الشنبر المكسور .
طبعا قليل قوى لو لقيت حد بيعرف يقيس كبس الموتور بس حتلاقى دور شوية.
الحالة الوحيدة اللى ممكن تحتاج فيها شورت بلوك لو فيه شنبر مكسور وعمل تجريح فى الاسطوانة غير كده يبقى طقم عمرة وقياس عمود الكرنك وخرطه لو فيه بيضاوى كبير

[Osama srhan]

مبدايا الله ينور على حضرتك على الشرح الممتاز ده
انا هعمل الكلام ده و ابلغ حضرتك
بس فى استفسار صغير اوى
الشورت بلوك الى موجود انجكشن بتاع ماكنه 2002 و سعره حوالى 1500-1800 جنيه
لو نزلت شورت بلوك ميكونش افضل على اساس انه بساتم اصليه و كرنك مش مخروط و كمان هيوفر عليا تليين
و بساتم اصليه مش تركى ولا ايه راى حضرتك
ملحوظه هى العربيه بولونيز 88

[م/أحمد عبد الفتاح]

اعتقد ان شكل البستم فى المواتير الانجيكشن بيبقى مختلف شوية عن البستم العادى من فوق ( التاج بتاعه فيه زى حفرة صغيرة ) - فلو شكل البستم هو هو زى الاصلى بتاعك يبقى تمام ولو مختلف حاتقع فى مشاكل مزمنة مش حاتخلص منها .

[Osama srhan]

تمام فهمت قصد حضرتك
طب لو هجيب اجيب من عزبة شلبى ولا من بورسعيد افضل