عندى مشكله فى وش السلندلر برجاء الافادة للضروووورة

[محمد ابراهيم 9]

لسلام عليكم الاعضاء المحترمين
عندى مشكلة فى سيارتى هى النترا 2008 ... من كام يوم حصل مشكلة فى ترموستات الحرارة والعربية سخنت على اخرها وانا من ذكائى بطلتها وحطتلها ميه فجابت وش سلندر.. قدر الله وماشاء فعل ... المهم انا روحت لميكانيكى فتحلى وش السلندر لقاه مقفع يعنى مش مستوى من عند المكبسين اللى فى النص... قالى غيره قولتلو طيب لو وديتو المخرطة هتبظبطه ولا لا ... رد عليا بان المخرطة هتاكل من جسم وش السلندر فهيقلل مساحة الاحتراق ودا غلط ... اعمل اية امشى وراه واشترى واحد استعمال ولا اروح اودية المخرطة يتخرط ويتساوى كويس واجيبلة الجوان واركب على كدا؟
حاجة تانية معلش .. هو بص على الجزء السفلى بعد ما رفع وش السلندر وقالى ان الفارغة ( الجزء السفلى) فيه تقفيعه بردو .. وبدام مقفع يبقى نغير الموتور كله .... الكلام دا صح ولا غلط ارجو الرد فى اقرب وقت ولكم جميعا جزيل الشكر

[salam100100]

للاسف المواتير مدام اتفتحت عمرها ما هترجع زى الاول

اه ممكن تتخرط ويتحط جوانين (الشغل البلدى بتاع زمان) والعربيه هتمشى وتعيشلها سنتين وترجع تضرب تانى

موتور كامل ايستيراد (ممكن يطلع بطيخ) ممكن يكون احسن من انك تعمل عمره

[محمد ابراهيم 9]

61 مشاهدة بتعليق واحد؟ بصراحة قفلتونى

[dvdaio15]

تغير ماتور هير يحك لان مفيش خراط كويس ولا ميكانيكى هيرجع الوضع زى الفبريكا باختصار حته لو ماتور استيراد مطلعش بكفائه الجديد بس على الاقل ترتاح بدل متفتح الماتور مرتين لان وارد بعد متقفل تحصل مشكله تصرف تانى وتقول اصرف لان صرفت اول مره

[rotanamasoud]

الحل الاوسط تقشط وتعمل جوان او 2 لو لزم الامر ولو الاداء والعربيه كويسه خير لو مش مظبوطه تمشى بيها شويه وتسقط مكنه

[tameem2010]

هات وش سلندر استيراد افضل
بس لازم تعرف ان في كل الاحوال الموتور مش هيرجع زي الاول ابدا
قفلة الخواجة مالهاش مثيل
بس هات وش سلندر وركبه والدنيا هتظبط معاك ومتقارنهاش بما قبل الموضوع ده عشان متتعبش

[bahaa mohamed]

من وجه نظري جرب انك تخرط و تحت جوانين ايوه مش حيرجع زي الاول بس حاجه مضمونه احسن ما تسقط مكنه و يطّلع فيها مشاكل حتكلف تلت او اربع اضعاف فلوس الخرط و الجوانين بس لازم تحل مشكله الفرغه

[اسلام الحلواني]

غير التور انت كده دخلت في عمره يعني عتودي للخراط و ش السلندر و الفارغه و بعدين الميكانيكي
عيقولك هات طقم شنبر نظافه و طقم جوانات و طقم اولسيهات دسك اسطوانه جداد و بالمره صبابات و جلد صبابات
خلص هات مكنه مقفوله و ربنامعاك

[Ahmed Turbo]

مكنة استيراد اعتقد هيكون احسن

[Mahmud Fadaly]

نصيحتي ليك انا لسه حالل الوش مرتين بعد الخرط و وضع جوانين
و في الاخر الزيت بقي طحينه برده
لانك لو جيبت وش سلندر استيراد هتاخدة عن تجربه بردة و ممكن يطلع فيه شرخ داخلي او فيه مشكله و هتغرم المصنيعيه و العطله و تمن الجوان
و كمان هتوديه المخرطه تعمله فريزه و تنضيف و تغيرله كاوتش صباب و كاوتش الصباب بردة غالي و بعد دة كله ممكن يطلع فيه مشكله و كمان ممكن
ميشتغلش بكفاءه مع جزء الموتور الاسفل البساتم يعني
و في الاخر نصيحه الناس ليا و الي انا همشي فيها اني اجيب شورت بلوك اة هو مكلف شويه بس ترييح دماغ و بردة لازم نجيبه من حد ثقه و عن تجربه