فلتر الزيت

[marcoo1983]

انا بقالي فتره كده مش بركب العربيه
ولما جيت امشي بيها امبارح لقيت صوت الماتور عالي شويه وحاسس ان العربيه خشنه شويه
انا عارف ان الزيت عايز يتغير بس لما وصلت البيت قلت ابص علي الزيت لقيته ناقص مع العلم ان مفيش تسريب زيت من الماتور ولا دخنه ولا اي حاجه
ببص علي فلتر الزيت لقيت عليه اثار زيت وتراب من بره فقلت امسحه
اتفاجئت ان الفلتر بيلف في ايدي فعرفت ان عامل البنزينه الغبي مربطوش كويس فلفليته بايدي علي اد ما اقدر لحد ما اروح اغير الزيت فهل ده الي ممكن يكون خلا الزيت ينقص كده؟؟

[aYaBooY]

طبعا ممكن بس المفروض يكون فيه اثار زيت على المقصات

[zeyad1810]

لازم تربط الفلتر بالمفتاح بتاعة علشان تحكم غلقة ومايسربش زيت

[FIATBloodline]

مهم أوي انك تغير الزيت (او تزوده )لان الله اعلم نقص اد ايه وحتي لو نقص شويه صغيريين...خليك في الامان

[samirayad]

على فكره الموضوع بتاع فك رباط الفلتر ده ....لسه حاصل مع واحد زميل فى سياره تمبرا..........

-علشان الراجل اللى بيغيرله الزيت ركب فلتر بسن أطول من المقنن وكان الفلتر مش مربوط كويس......ويادوب وهو بيجرش العربيه حصل المراد ولقى الزيت كله(وهو لسه راجع من عند بتاع غيار الزيت على الأرض)................

- راح تانى أشترى زيت وفلتر مظبوط وعدت الحكايه على خير والحمد لله..........

- علشان كده لازم نأمن على الحاجات دى بنفسنا برضه لأن أى واحد بيعمل الشغلانه دى ميهموش الا الفلوس اللى بيأخدها وبس وأحنا اللى بنتحمل العواقب........

[Samir Elshahawy]

دايما بعد تغير الزيت أو الفلتر يجب أتباع الاتي للتأكد من عدم وجود تسريب

أولا.. قبل مغادرة الورشة..
1- محاولة الكشف بالنظر علي رباط طبة تصفية الزيت و التأكد من جفافها و عدم وجود زيت عليها أو حولها
2- تجفيف الطبة بقطعة من القماش ثم اعادة تجفيفها مرة اخري بعد 5 أو 10 دقائق للتأكد من عدمم وجود قطرات زيت جديدة بعد التجفيف أول مرة
3- فحص الفلتر و التاكد من عدم تسريب زيت من حوله
4- تشغيل المحرك لمدة 5 دقائق يتم خلالها فحص الفلتر
5- أيقاف المحرك و الانتظار 10 دقائق أخري و الكشف علي مقاس الزيت

ثانيا.. بعد مغادرة الورشة..
1- بعد قطع مسافة معقولة يتم أيقاف السيارة علي جانب الطريق و فحص أسفل الموتور للتأكد من عدم وجود نقط زيت علي الارض أو المقصات أو حول الفلتر
2- في حالة توقف السيارة بعد ذلك أمام المنزل أو العمل أو بالجراج يجب فحص مستوي الزيت قبل تشغيل المحرك و فحص الارض أسفل الموتور للتأكد من عدم وجود اي بقع زيت
3- يجب متابعة مستوي الزيت لمدة يومين او ثلاثة بعد تغيره حتي يطمئن تماما من ثبات مستواه

و بذلك تتفادي حدوث نقص أو تسريب مفاجئ في الزيت نتيجة لعدم أحكام الطبة او الفلتر
كما يجب أتباع نفس الخطوات عند تغيير أي من السوائل الأخري

[marcoo1983]

بصراحه انا متشكر جدا لكل الي ردوا عليا وده بيكون عشمي دايما في كل اعضاء نايل موتورز الي بحس ان كلهم اسره واحده واخوات
وبصراحه انا كان عندي سؤال كمان ومعلش انا عارف ان انا بطول عليكوا شويه
هو الخرطوم الرفيع الي بيوصل بين الادفانس بتاع الاسبراتير و الكاربيراتير بيتوصل فين في الكاربيراتير لان بصراحه هنا الميكانيكيه كل واحد بيفتي فتوا شكل
واحد مره ركبهولي في الدراع بتاع سلك البنزين يعني كده مش واصله هوا
وواحد مره ركبهولي في فتحه كده موجوده في المانوفل علي ما اظن وقالي لو العربيه برجلت معاك شيله واقفل الفتحه دي تاني بس بصراحه حسيت ان العربيه عليت شويه و الار بي ام بقا علي 1200 فشلته العربيه هديت تاني
وواحد تالت بقا تقريبا مكنش عارف ايه وظيفته فقال اما اشتغل الزبون وقالي ده مش بيركب الا في العربيات الجديده علشان ده الي بيحدد العربيه توصل من صفر ل 100 في كام ثانيه وده ملهوش لازمه عندك _اظن فاكرني هندي_ فياريت الي يعرف يقولي هو بيركب فين واسف علي الاطاله

[mrghost]

ياجماعه خلوا بالكوا اوى من الحوار ده وياريت محدش يغير زيت فى البنزينه لان معظمهم معدوم الضمير
عندى فى الشاهين رحت غيرت زيت مره فى بنزينة موبيل على الدائرى قبل المرج الجديدة وبعدها لقيت رشح زيت من عند الطبه رحت لبتاع الزيت اتضح ان العامل منه لله ركب الطبه معووجه مما ادى الى تآكل السن بتاع الكرتيره وبهدلى العربيه الاحسن انك تغير عند بتاع زيت

[samirayad]

بصراحه انا متشكر جدا لكل الي ردوا عليا وده بيكون عشمي دايما في كل اعضاء نايل موتورز الي بحس ان كلهم اسره واحده واخوات
وبصراحه انا كان عندي سؤال كمان ومعلش انا عارف ان انا بطول عليكوا شويه
هو الخرطوم الرفيع الي بيوصل بين الادفانس بتاع الاسبراتير و الكاربيراتير بيتوصل فين في الكاربيراتير لان بصراحه هنا الميكانيكيه كل واحد بيفتي فتوا شكل
واحد مره ركبهولي في الدراع بتاع سلك البنزين يعني كده مش واصله هوا
وواحد مره ركبهولي في فتحه كده موجوده في المانوفل علي ما اظن وقالي لو العربيه برجلت معاك شيله واقفل الفتحه دي تاني بس بصراحه حسيت ان العربيه عليت شويه و الار بي ام بقا علي 1200 فشلته العربيه هديت تاني
وواحد تالت بقا تقريبا مكنش عارف ايه وظيفته فقال اما اشتغل الزبون وقالي ده مش بيركب الا في العربيات الجديده علشان ده الي بيحدد العربيه توصل من صفر ل 100 في كام ثانيه وده ملهوش لازمه عندك _اظن فاكرني هندي_ فياريت الي يعرف يقولي هو بيركب فين واسف علي الاطاله

الخرطوم ده وظيفته بينقل التخلل اللى موجود فى الكربراتير الى جهاز تقديم وتأخير الشراره(الأدفانس)....للتحكم فى تأخير وتقديم زمن أرسال الشراره الى البوجيهات....

- وبيكون راكب على ولد(ماسوره رفيعه)...على جانب الكربراتير والجانب الآخر على الأدفانس بتاع الأسبراتير.............