البطارية نامت

[m0stafa]

السلام عليكم

معلش يا جماعه انا هحكى كتير علشان انا اصلا مش فاهم حاجه

انهارده كان يوم شتاء جامد اوى طول النهار
رحت اوصل صاحبى محطه السوبر جت .. بس كنت قلقان من المطر وكده كان كتير
المهم طبعا امطار غزيره و بركه مياه فى كل مكان الحمد لله وصلته وانا راجع فى الطريق للبيت كان المغرب أذن فنورت نور التابلوة والاشارات لقيته ضعيف شويه
ورجعت البيت بس رحت مشوار تانى علطول قبل حتى مبطل العربيه ونزلت اشترى حاجه وبطلت العربيه
مقعدتش 5 دقايق على بعضهم ورجعت ادور وامشى .. العربيه حلفت ماتدور وسكتت خالص قطعت النفس .. ادور مش سامع اى مارش ولا حاجه هواااااا
رحت اتصرفت بتاكسى معاه وصله بطاريه المهم دارت ..علشان انا اتوماتيك مش مانيوال ..
ومشيت بس كانت ضعيفه اوى وفى صوت غريب كده زى زنه كهربا وتعلى وتوطى ولو دست بنزين وانا ممور العربيه تبطل ..
رحت لبتاع البطاريات قالى الشحن ضعيف اوى اطلع على كهربائى يكشف على شحن الدينامو .. رحت ماشى مفيش 100 متر العربيه قامت قاطعه النفس وحلفت ماتدور ..
رجعت للراجل
قالى ايه بقى نشحنها تمشيك شويه .. قلتله البطاريه جافه قالى لا .. يمين شمال يقولى لا .. دى نصها جافه ونصها سايله المهم فتحالى وشحنها وقالى على فكره البطاريه نايمه خالص
شحنتها واول مركبتها العربيه دارت "غريبه اوى"ورحت للكهربائى .. كل لما امشى واهدى على مطب العربيه تفصل .. الحمد لله بعد عناء وصلت للكهربائى قالى الخارج بتاع الدينامو ضعيف هات واحد استيراد ب 250 300 جنيه لانه مش بيتصلح
وسبهالى كده كل شويه الصوت يهبل وتوطى وتفصل .. عديت على الميكانيكى ظبطلى حاجه كده العربيه معدتش بتفصل خالص وقالى عدى على كهربائى شوف الدينامو

بس انا اسف جدا على الاطاله بس انا مش فاهم اى حاجه
فجأه كده البطاريه نامت وفجأه الدينامو خارجه ضعيف؟؟؟وازاى البطاريه جاااااااااااافه وشحنهالى بميه انا بس عايز اعرف الى حصلى ده من ايه و ايه وايه التفسير .. علما بانى مشيت كتير على برك مياه الى اتجمعت من المطر
وهل الدينامو بيتصلح ولا خلاص على كده واعمل ايه بكره لما اروح لكهربائى نضيف

الرجو الافاده وشاكر ليكو جميعا

[fahd_628]

دة اكييييييييد دينامو لأن البطارية مش بتتشحن

و الدينامو بيتصلح معرفش ازاى مش بيتصلح قالك يعنى ؟

[samirayad]

مشكلتك فى الدينامو.......أكشف عليه الأول عند واحد كهربائى كويس.....ممكن يكون عاوز نظافه فقط وشربون

-أنما البطاريه سليمه بدليل الميكانيكى الأخير لغى أمداد الدينامو وخلى البطاريه هى مصدر الأمداد للكهرباء اللازمه لعملية التحكم بالسياره

[m0stafa]

اولا شكرا لسرعه الرد استاذ فهد واستاذ سمير

انا رحت كهربائى كده اى كلام انقاذ موقف يعنى
بس هروح لواحد كويس بكره

معلش بس استفسارين يعنى .. هى ازاى بطاريه جافه تتملى ميه وتتشحن مع انى متأكد انها جافه وهل كده البطاريه باظت علشان شحنتها ميه؟
والاستفسار التانى .. العربيه كانت زى الفل جدا .. وفجأه يوم المطر حصل كده .. ممكن اعرف ليه الدينامو عمل كده فجأه

[samirayad]

هو ممكن يكون حقنلك حامض للبطاريه علشان يزود نسبة الحامض شويه (يخليها حاميه يعنى)........وربنا يستر على الدينامو ليكون حصل عليها شورت من رزاز الميه بتاعة المطر ....وده أحتمال وارد (وحيبان مع الكشف)

[m0stafa]

الف شكر مره تانيه استاذ سمير وان شاء الله بكره هروح لكهربائى كويس ولما ارجع ابقى اقولكو ايه الاخبار

[samirayad]

خللى بالك يا أستاذ/ مصطفى ....

- البطاريه مش جافه (دى بطاريه سايله ولكن مقفله ).....ومركب عليها هيدروميتر مع التصنيع علشان تعرف حالتها (أخضر (جيده)_أبيض (شحن ضعيف)_أسود تقريبا(يعنى أرمى البطاريه).....).....وفيه ناس بتحقن الأنواع دى علشان تخللى البطاريه حاميه لما تنام شويه.....

[m0stafa]

مهو انا قريت لحضرتك مواضيع برضه عن الهيدروميتر ده بس دورت علىيه بصراحه ملقتش حاجه خالص .. هى بطاريه اصلا انا مغيرتهاش من ساعت مجبت العربيه من امريكا .. استعمال بلادها حضرتك فاهم ..
بس كل الى عرفته انها 45 امبير
وعلى فكره نولت ادور العربيه دلوفتى لقيتها بتغيب اوى وبطيئه على مدارت بس من مره واحده دارت بي غابت اوى

[samirayad]

طيب البطاريه مش فيها دايره بلاستيك كده وجنبها ثلاث علامات (دواير تقريبا) أبيض وأخضر وأسود

[m0stafa]

لا خالص قلبتها فوق وتحت وملقيتش اى حاجه
بطاريه عجيبة نوعها exide

[samirayad]

لا خالص قلبتها فوق وتحت وملقيتش اى حاجه
بطاريه عجيبة نوعها exide

لا صراحه معرفش حاجه عن النوع ده........عموما ربنا يوفقك ويصلح لك الأحوال .....آمين يارب

[m0stafa]

الف شكر ليك و ان شاء الله لما ارجع من عند الكهربائى بكره اقول ايه الاخبار

[samirayad]

الف شكر ليك و ان شاء الله لما ارجع من عند الكهربائى بكره اقول ايه الاخبار

ربنا يوفق ...وأحنا فى أنتظارك للأطمئنان عليك

[dr_timo]

الدينامو هوة السبب واكيد بسبب المطرة نقط مية جت عليه فحصل يمكن قفلة او حاجة فيه بس متسمعش كلام اللي يقولك ميتصلحش لا بقي يتصلح وسهل جدا ان شاء الله

[m0stafa]

يا جماعه مش عارف ادور العربية مش بتدور خالص .. مش عارف اروح للكهربائى والعربيه قاطعه النفس

واحد بيقول البطارية نامت تانى وعايزة تتشحن

فى حين انى انا بنور تابلو ونور عالى وواطى و كلاكس ومفيش اى استجابة للمارش
جبت واحد صاحبى بوصله للبطاريه و برضه ادور مفيش اى استجابه ولا صوت
مفيش بس غير تكتكه بس
انا مش عارف اعمل ايه دلوقتى