مياة القربة بتنقص في الدوجان

[Sherifmt]

اولا كل عيد ربيع وانتم جميعاُ بالف خير(:
لو سمحتم عندي مشكلة وهي اني كل ما ازود مياة القربة للردياتير لغاية العلامة لكن تاني يوم تنقص للتلت فقط ومفيش اي تسريب في الوصلات ومفيش مشكلة في الحرارة علشان غيرت المروحة الكهرباء بمروحة علي طرمبة المياة !!! مع العلم كان في السابق بتنقص بسيط وعلي فترات طويلة السيارة دوجان 1600 مع الشكر لمجهوداتكم

[samirayad]

اولا كل عيد ربيع وانتم جميعاُ بالف خير(:

وأنت بخير وسعاده.......وياريت تجرب تغيير غطاء القربه فى البدايه .....ولو فيه أمكانيه لأعادة الرباط على رأس السلندر ....توكل على الله

[Sherifmt]

متشكر علي سرعة الرد يا أستاذ سمير لكن انا متابع الموضوع من اكتر من أسبوع ولو مزودتش القربة بتفضل ثابتة عند التلت وبردة الردياتير مش بينقص ولو زودت بردة بترجع تاني يوم لمستوي التلت ..... غريبة مش كدة !!!!

[samirayad]

غريبة مش كدة !!!!

_ المفروض برضه بيكون فيه نسبة فراغ فى القربه للسماح بتمدد المياه نظرا لزيادة الضغط والحراره مع عمل المحرك......ولو الميه بتقف لمستوى التلت الفقانى فاضى ....فأعتقد كده الوضع عادى......

_ على أساس ممكن تكون بتملاها على الآخر والزياده اللى بتخرج من بلف تنفيس القربه بسبب الضغط والتمدد اللى بيكون موجود بالدوره.........ومش عارف أنا وصفى كده صح ولا لا .....لأن وضع التلت مش باين قوى فى الكلام .....فهل تقصد التلت الفقانى هو اللى بيكون فاضى بعد ماتملأ القربه ولاتقصد حاجه تانيه .....لو زى مبقول دلوقتى والوضع ثابت على كده.....يبقى الوضع عادى

[Sherifmt]

كلامك مظبوط بس اللمقصود هو التلت الاخير بتنقص لغاية علامة Min انا دلوقتي أحتياطي بامشي معايا أزازة مية للطواريء لغاية ما السبب يظهر (:

[SAMEH_FOUAD]

انت افتح الردياتير واتاكد انة مليان واملا القربة لحد المستوى بتاعها بس دة كلة والعربية باردة نهائى عشان تكون كل حاجة فى وضعها الطبيعى عشان كدة ممكن يكون عندك تسريب فى الردياتير ومش بيبان الا والعربية بتمشى وبتسخن وعشان القربة بتعوض النقص اللى موجود فى الردياتير فلازم تفضى بنسبة المقدار اللى نقص فى الردياتير,اتاكدت بردة من غطاء الردياتير
تانى حاجة:ممكن يكون عندك غطاء القربة بيسرب فلما بتكون مالى القربة على الوضع max وتيجى تمشى بالعربية فبيحصل تمدد للمياة وبتعلى فلو مش محكومة قوى وبتسرب هتلاقيها قلت لحد مالمية ماتقدرش تجيب فتحة القربة ودة تقريبا هيبقى نفس المقاس اللى انت بتتكلم علية

[ahmedfawzy14]

بدال بتوصل لحد معين ومش تنزل عنه
يبقى الغطاء هوا السبب

غيره بواحد تركى وشوف

[فادى]

السؤال هل المياه بتنقص و لا لأ؟
لو بتنقص بمعدل اسرع من معدل التبخير الطبيعى (غالبا ما يعادل فنجان مياه كل ثلاثة شهور), يبقى فيه تسريب فى الأغلب.
غطاء القربة صعب انو يسرب لأن المياه فى القربة لا تسخن الى حد الغليان, الغطاء المعد لتسريب البخار هو غطاء الرادياتير, الذى ينضغط و يفتح منفسا للهواء فى حالة تزايد ضغط البخار داخله.
اكشف على غطا الرادياتير, و اكشف على مواضع التسريب فى الخراطيم و المحرك ساخن و داير, لأن بعض الخراطيم قد لا تسرب الا لو المياه ساخنة و مندفعة,
اكشف ايضا على موضع التسريب فى الرادياتير من تحت, لأن ديه صعب تبان, لكن هتلاقى انو فيه اثار للمياه على القنطرة اللى تحت الرادياتير, و يمكن الكشف عن المياه باليد بعد ترك السيارة لتبرد تحت الخراطيم و تحت الرادياتير, لأن بعض التسريبات تكون بسيطة و لا تظهر للعين.
و كاجراء وقائى بسيط, قرط على ال"أساور" أو ال"كوليهات" التى تحاوط خراطيم المياه.
لو التسريب من احدى الخراطيم يبقى العلاج بسيط و يتمثل فى تغيير الخرطوم, لو التسريب من الرادياتير فيمكن لحامه عند اى واحد بتاع رادياتيرات, ممكن كذلك يكون التسريب من كوعة المياه و فى الحالة دى هنضطر لتغيير كوعة المياه, و لو التسريب من غطاء الرادياتير يبقى هنغير غطاء الرادياتير, و كلها حاجات غير مكلفة.

[Sherifmt]

انا متشكر لكل الأخوة اللي ردو عليا وساعدوني بعد ما تابعت المياة في اليومين اللي فاتو رجعت القربة طبيعي برغم المشاوير والحر كلة تمام والمية تقريبا ثابتة وغالباً المشكلة كانت ان غطا الردياتير ممكن مكنش مقفول كويس ....مرة تانية شكراً للجميع علي الأهتمام والمتابعة وهو دة العشم يا رجالة.... (: