هاعمل عمره للماتور

[silver88]

انا عندي 128
لقيت في دخان ابيض خفيف من الشكمان
رحت للميكانيكي قال انه لازم عمره
ياريت اي حد بيفهم في العمره يقولي هاتتكلف كام
والمفروض يعمل ايه وبما انا الماتور هايتفتح فالمطلوب انه يبص علي ايه بالظبط
وايه المصطلحات اللي هاتكلم بيها معاه علشان ما يضحكش عليا لان بيني وبينكو اتا خام في الحاجه دي
وشكرا مقدما ليكوا يا جماعه

[tananybasha]

عمرة كاملة من غير ما يفتح الموتور يبقى اكيد ده مخاوى بقى
الأول عشان يعرف عمرة كاملة و لا لأ يشوف البساتم عامله دليل و لا لأ و لا الشنبر بس هو اللى خف و لا كاوتش الصباب لأن كل ده بيعمل دخنه بيضه و مش شرط عمره كامله عمرتها حوالى 1500 بقطع الغيار

[ASKAFRAWY]

عمرة كاملة من غير ما يفتح الموتور يبقى اكيد ده مخاوى بقى
الأول عشان يعرف عمرة كاملة و لا لأ يشوف البساتم عامله دليل و لا لأ و لا الشنبر بس هو اللى خف و لا كاوتش الصباب لأن كل ده بيعمل دخنه بيضه و مش شرط عمره كامله عمرتها حوالى 1500 بقطع الغيار

ياباشا مش مخاوى بس هو محتاج فلوس...موضوع الدخنة ممكن تكون شنابر الزيت هى العاوزة تتغير ودى مش هتتكلف هتكون فى حدود 400-500(شنابر+طقم جوانات+سبايك+تغيير الزيت)
لكن العامرة الكاملة يبقى لازم يحل الموتور الاول ويكشف

[mohamed777]

السلام عليكم ورحمة الله وبركاتة
انا يا شباب لسة طالع ظازة من عمرة كاملة .......الموتور حتى بيلين معملش حتى 100 كيلو واحب انقل اليكم تجربتى
بس العمرة كانت مع مازدا 323 ومش هتفرق كلة مواتير
اولا انا كانت بتطلع دخان ازرق بقالها سنين مش من قريب واخر سرعة ليها ده ان جابتها 100
بفضل الله لما فكيت الموتور وراح المخرطة طلب منى طقم بستم زيرو 20 وسبايك زيرو 10 وطقم صمام وهلال كرنك
ودول بس كان تمنهم 630 جنية
يارتها جات على كده وبس انا غيرت طلمبة زيت وماية واسطوانه دبرياج وبلية وماغيرتش الدسك ودى غلطة هقولكم عملت اية معايا
وكان فية شوية حاجات تانية زى وش التقسيمة وده كان مكسور عندى وبيخر زيت برة الموتور

اهم حاجة فى العمرة انك تكون ضامن الميكانيكى الى بيشتغلهالك.......... دى نقطة مهمة جداً جداً

وباقى طلبات العمرة بخلاف ما ذكرت سابقاً كلفت 1300 جنية
العربية عندى كانت واقعة جداً وكانت مش بنصنها خالص وعلى شان كده لما فتحت فتحت على البحرى
وحتى الان تكلفة العمرة بعد اجرة المخرطة والميكانيكى وقطع الغيار حوالى 3000جنية

الرقم عالى طبعاً على شان انا غيرت حاجات تانية زى الكبالن وغيراه
بس بصراحة انا مارضيتش ابخل وغيرت حاجات كانت ممكن تشتغل بس فى النهاية الموتور طلع محترم جداً

اما حكاية الدسك الى غلط وماغيرتوش فى العمرة .......انه مهم طبعاً فى نقل القدرة من المحرك الى الفتيس وسوء حالتة تؤدى الى فقد فى قدرة المحرك وده يبان لما صوت الموتور يعلى وانت بتحاول تسحب ومش بتجيب سرعة ملموسة على الطريق وده الى انا حسيت بية بعد العمرة

انا حاولت الم بكل الى عملتة وحصل معايا ولو فية اى استفسار انا تحت امركم

[silver88]

متشكر ليكوا يا جماعه بس الميكانيكي قالي انه هتحتاج طقم شنابر
بس في سؤال تاني هو ممكن اجل الحكايه دي للشتاء واستعمل زيت شنبر كحل مؤقت
لاني مفيش دماغ الين الموتور وامشي بسرعه قليله علشان العربيه متسخنش

[mohamed777]

هى طبعاً احسن فى الشتا من الصيف لان العربية بتسخن اوى خصوصاً فى الجو الحار ده
انا قعدت سنين ماشى بالعربية بالدخان الازرق

[ozy2026]

خلاص طالما انت مش فاضى للعمره يبقى هاتلك ماتور استيراد هيكون احسن و تكلفته هتبقى زى العمره او اقل شويه
ومش هتحتاج تلين والموضوع كله مش هياخد 3 ايام بالكتير قوى
بس بلاش تمشى بالماتور وهو بيدخن الجو مش ناقص
ده غير ان هتلاقى نفسك بتتكلف فلوس كتير فى الزيت اللى العربيه هتحرقه واستهلاك البنزين اللى هيعلى

[abdouz]

صديقى المستمع بمسى عليك كان كان ليه تجربة مع العمرة ودية هتفيك جدا
http://www.nilemotors.net/Nile/showthread.php?t=79856

[silver88]

هو الماتور الاستيراد ده هيكون مستعمل

[ozy2026]

هو الماتور الاستيراد ده هيكون مستعمل

بيبقى جاى من بره مستعمل بس بيبقى فى مواتير حالتها كويسه جدا وكفايه انه ماتعملوش عمرات قبل كده
الميزه انه هيبقى بنفس تمن العمره ومش هيأخد وقت ومش هتحتاج تلين يعنى هتركبه فى يوم وتمشى على طول

[agwaa]

هو الماتور الاستيراد ده هيكون مستعمل

طبعاً مستعمل وده عيبه يعني بالبلدي زي البطيخة ورأيي الشخصي أنا أعمل عمرة أفضل من الموتور الإستيراد لأن بالعمرة إنت بتأسس الموتور على إيدك
وعلى العموم الكلام ده سابق لإوانه لأن مشكلتك تنحصر في طقم شنبر فقط ودي أقصاها 500 جنيه والمهم يتعمل صح وتكون متابع الميكانيكي خطوة بخطوة أو حد من طرفك هو اللي يتابعه بشرط يكون الحد ده فاهم كويس وتكون إنت شخصياً واثق فيه وكل ده علشان العملية لا يتم إعادتها مرة أخرى وده عن تجربة مع صديق ...

[agwaa]

السلام عليكم ورحمة الله وبركاتة
انا يا شباب لسة طالع ظازة من عمرة كاملة .......الموتور حتى بيلين معملش حتى 100 كيلو واحب انقل اليكم تجربتى
بس العمرة كانت مع مازدا 323 ومش هتفرق كلة مواتير
اولا انا كانت بتطلع دخان ازرق بقالها سنين مش من قريب واخر سرعة ليها ده ان جابتها 100
بفضل الله لما فكيت الموتور وراح المخرطة طلب منى طقم بستم زيرو 20 وسبايك زيرو 10 وطقم صمام وهلال كرنك
ودول بس كان تمنهم 630 جنية
يارتها جات على كده وبس انا غيرت طلمبة زيت وماية واسطوانه دبرياج وبلية وماغيرتش الدسك ودى غلطة هقولكم عملت اية معايا
وكان فية شوية حاجات تانية زى وش التقسيمة وده كان مكسور عندى وبيخر زيت برة الموتور

اهم حاجة فى العمرة انك تكون ضامن الميكانيكى الى بيشتغلهالك.......... دى نقطة مهمة جداً جداً

وباقى طلبات العمرة بخلاف ما ذكرت سابقاً كلفت 1300 جنية
العربية عندى كانت واقعة جداً وكانت مش بنصنها خالص وعلى شان كده لما فتحت فتحت على البحرى
وحتى الان تكلفة العمرة بعد اجرة المخرطة والميكانيكى وقطع الغيار حوالى 3000جنية

الرقم عالى طبعاً على شان انا غيرت حاجات تانية زى الكبالن وغيراه
بس بصراحة انا مارضيتش ابخل وغيرت حاجات كانت ممكن تشتغل بس فى النهاية الموتور طلع محترم جداً

اما حكاية الدسك الى غلط وماغيرتوش فى العمرة .......انه مهم طبعاً فى نقل القدرة من المحرك الى الفتيس وسوء حالتة تؤدى الى فقد فى قدرة المحرك وده يبان لما صوت الموتور يعلى وانت بتحاول تسحب ومش بتجيب سرعة ملموسة على الطريق وده الى انا حسيت بية بعد العمرة

انا حاولت الم بكل الى عملتة وحصل معايا ولو فية اى استفسار انا تحت امركم

السلام عليكم
إزاياك يا عم محمد
أنا بعد إذن سيادتك محتاج لخبرتك مع العمرة لأني معايا نفس عربيتك 323
مشكلتي مع العربية تدريجياً كالتالي :
-- منذ فترة أخدت خرطوم الفايز ( اللي كان رايح لفلتر الهواء ) بخرطوم تطويلة على تحت ( كما يقال العربية بتنفخ ) وده من سنة فاتت تقريبا .
-- منذ الشهرين الماضيين كنت بزود لها نص كيلو زيت خلال فترة تغيير الزيت ( 1500كم في شهر تقريباً )
__ زاد مؤخراً معدل إضافة الزيت إلى 2 كيلو خلال فترة تغيير الزيت ودة طبعاً فوق الزيت العادى وإكتشفت أن هناك تسريب في الزيت من أسفل الموتور وعرفت أنه أويل سيل ضرب ولما ذهبت وعملت غسيل شامل للموتور في البنزينة وبعد محاولات لإدارة السيارة ومع الضغط على الموتور لتدويره لاحظت هناك تسريب مياه وعرفت أنها طبة مياه ضربت
ميكانيكي أخبرني أن الأفضل نغير الأويل سيل وطبة المياه ونظل نضيف زيت لغاية الصيف ما يعدي ونعمل طقم شنبر في أول الشتاء القادم إن شاء الله --
__ميكانيكي آخر وده متخصص عمرات قال لي الأويل سيل لو غيرته هيضرب تاني أو هيضرب أويل سيل آخر لأن الموتور به كبس داخلي ( هل الكلام ده صح ..؟ )

سؤالي لك وللأخوة الأعضاء :-
هل العربية كدة محتاجة طقم شنبر فقط أم هتحتاج عمرة كاملة ( أنا عارف إن دة موش هيبان إلا لما نفك الموتور ) مع العلم إن الموتور ناعم وليس به رذع أو تخبيط ولمبة الزيت لا تضئ ( كانت مضيئة ولكن بسبب البومبة وقمت بتغييرها وظبطت والحمد لله وده دليل على صلاحية دورة الزيت ) ..!!؟
وهل العمرة أو نصف العمرة ( طقم الشنبر ) لا تستحب في الصيف فعلاً ..!!؟
آسف جداً على الإطالة ..
وشكراً .

[mohamed777]

السلام عليكم ورحمة الله وبركاتة يا استاذ agwaa
متأسف لتأخر الرد لانى من فترة كنت مشغول
بص ياباشا حكاية انك تعرف الموتور هيحتاج اية مش هتعرفها غير لما تفتح الموتور
بس من الناحية النظرية يمكن التعرف على مكان تسريب ضغط المحرك سواء كان من الشنابر او من رأس الاسطوانة عن طريق قياس كبس الموتور ودى عبارة عن جهاز بيركب مكان البوجية وله عداد يعطى قرأة كبس كل اسطوانه على حدى
وبيكون لية اختبار جاف واختبار مبلل
اما الاختبار المبلل بيكون باضافة حوالى ملعقة زيت فى الاسطوانة من خلال فتحة البوجية
فاذا كانت قرأة الاختبار المبلل اعلى من الجاف فهاذا يعنى ان التسريب من الشنابر
اما اذا كانت الاختباران المبلل والجاف قراة واحده فهذا يعنى ان التسريب من راس الاسطوانة

هذا من الناحية النظرية اما من الناحية العملية ما فيش حد بيعمل كده طبعاً
لما بيفتحو الموتور بيشوفوا محتاج خرط ولا لا

ويفضل العمرة فى الشتاء انا عملتها من اسبوعين واتبهدلت فى سخونة الموتور وربنا سترها معايا
ان شاء الله لما تعمل العمرة اهم حاجه لما تيجى تدور الموتور انك تكون عامل مفتاح كهربة للمروحة تشغلها على طول بحيث الحرارة ما توصلش للنص او حتى فوق الربع الاول نهائيا

ولو فية حاجه عاوز تستفسر عنها انا تحت امرك

وان شاء الله لما تيجى لمرحلة التليين هقولك على حاجات انا وقعت فيها تأخد بالك منها
واوعى تنسى تغير اسطوانة الدبرياج والدسك والبلية ضرورى جداً جداً