هل يوجد حل نهائي للسخونه في سيات 133؟

[emamphoto]

هل يوجد حل نهائي لمشكلة السخونه في السيات 133؟
علما بأني نضفت الرادياتير و لايوجد أي تسريب و مركب الشمبر اللي بيركب فوق المروحه و مع ذلك بمجرد المشي حوالى 15 كيلو لمبة الحراره تنور و الأقى معظم الميه اتبخرت
أرجوكم الإفاده سريعا
و لكم جزيل الشكر

[aYaBooY]

هات غطاء جديد للريدياتير و غطاء جديد للقربة و طبعا ممكن تعدي على اي صنايعي يغسلك دورة التبريد
مرة شوفت واحد بس هوا كان صنايعي في الاسكندرية كان مخرم وش العربية السيات و حاطط الريدياتير و مروحة ليه قدام
بس انا معرفش هو معدل ايه او مركب ايه و عموما الموضوع دة موجود في العربيات الاسكودا القديمة موتور ورا و ريدياتير قدام
ممكن تسال و تجرب
و ممكن تروح لواحد سمكري يفتحلك فتحات تهوية من الجناب علشان تدخل هواء للموتور و انت ماشي
و الله يعينك

[emamphoto]

ألف شكر

هات غطاء جديد للريدياتير و غطاء جديد للقربة و طبعا ممكن تعدي على اي صنايعي يغسلك دورة التبريد
مرة شوفت واحد بس هوا كان صنايعي في الاسكندرية كان مخرم وش العربية السيات و حاطط الريدياتير و مروحة ليه قدام
بس انا معرفش هو معدل ايه او مركب ايه و عموما الموضوع دة موجود في العربيات الاسكودا القديمة موتور ورا و ريدياتير قدام
ممكن تسال و تجرب
و ممكن تروح لواحد سمكري يفتحلك فتحات تهوية من الجناب علشان تدخل هواء للموتور و انت ماشي
و الله يعينك

سمعت الكلام و اشتريت غطا جديد للرادياتير و القربه و لسه حنضف دورة التبريد
بس عندي سؤال كمان هو الحراره تخلي لمبة الزيت و الموتور صوته يعلى و سحبه يضعف و لا دي أعراض حاجه تانيه
و آسف على الإطاله

[aYaBooY]

لمبة الزيت تنور لما الزيت يكون ناقص او ميكونش واصل لما الطرمبة بتاعت الزيت تكون بايزة او بتشاور عقلها
الزيت ينقص لما الموتور يكون خفيف او يكون فيه جوان زيت بيهرب زي جوان غطاء التكيهات او جوان الكرتير او احدي اويلسيهات الكاتينة
السحب يبداء يتهد لما يكون طقم الكهرباء عاوز يتغير او تكون الاسطوانة خفت و عاوزة تغير
و ممكن تكون المشكاة عندك انه فيه مشكلة في جوان وش السلندر و يكون مش بيفصل دورة التبريد عن دورة الزيت و في الحلادي هتحتاج جوان جديد او اتنين و تقشط الوش عند خراط

[KoDaK_Gti]

جرب تركب مروحة دايركت تشتغل مع الموتور اول لما الموتور يدور هتريحك جدا

[aYaBooY]

السيات اصلا كدة المروحة ليها سير من الموتور شبة سير الدينامو كدة و ده بيشغلها مع الموتور

[emamphoto]

كلامك صح 100%

فعلا كشفت عند 2 ميكانيكيه و جوان وش السلندر فعلا عايز يتغير و الكربراتير يتنضف كويس
و بمجرد التصليح حابلغكم ايه الأخبار
معلش سؤال كمان الشغل ده يتكلف كام خامات و مصنعيات؟

[aYaBooY]

فعلا كشفت عند 2 ميكانيكيه و جوان وش السلندر فعلا عايز يتغير و الكربراتير يتنضف كويس
و بمجرد التصليح حابلغكم ايه الأخبار
معلش سؤال كمان الشغل ده يتكلف كام خامات و مصنعيات؟

ممم بص مش هاتعدي ال 200 جنيه انشاء الله
ده رقم مت تقديري مش اكتر يعني اسال البيه الصنايعي الاول

[emamphoto]

بص يا سيدي بعد الكشف التفصيلي على العربيه اتضح الآتي
1-وش السلندر حيتكشط عند الخراط و يركب عدد 2 جوان وش سلندر
2-الكربراتير حيتغير بالكامل لأنه اتصلح قبل كده و بينفس هوا
3-علبة الشكمان يجب تغييرها
4-الردياتير و دورة التبريد تتنضف بالكامل
طبعا أخوكم مش عارف نبتدي منين الحكايه
أرجوكم أفيدوني في ترتيب العمل

[faron525]

اهم حاجة تتأكد من ان طرمبة المياة سليمة لانها روح العربية السيات

[aYaBooY]

الله يعينك
موضوع تنظيف الريدياتير ده اخرة ساعتين وقفة مش اكتر هايفك و يركب و نظف و يلحم و يرش مياه نار و دمتم و ده تعملة الاول
تروح على البيه الميكانيكي و يفضل يكون قريب منه خراط يفك و يبعت على الخراط و ينظف الموتور كويس من جوا و طبعا تكون شاري الخامات الي هاتحتاجها كلها
موضوع الكارباتير طبعا العربية عندك مش هاتظبط غير لما يتغير يبقي تشوف واحد استيراد كويس و على التجربة و يفضل كلة مرة واحدة و تخلص علشان ضربة بالمطرقة ولا عشرة بالشاكوش
و تشيك على طرمبة المياه برده و لو مش كويسة تشوف واحدة استيراد كويسة

[emamphoto]

ألف شكر و أنا حاليا مستني الأسبوع الجاى إن شاء الله عشان الكربراتير مش موجود حاليا عند بتوع الاستيراد
و ربنا يسهل الأحوال

[islambana]

بص ياباشا انا هجيبلك الخلاصه في العربيه دي وماتنساش تدعيلي
ده كان موضوع عامله الباشمهندس سبعاوي عن السيات 133

السيارة سيات 133 من اكثر السيارات التى ظهرت لها اختراعات فى مصر نظرا لأنها سيارة ذات هيكل قوى جدا ومقاوم للزمن ولكنها ذات نظام ميكانيكى كثير العيوب يجعل عمره اقصر من الهيكل، ووجود الهيكل بحالة سليمة اغرى الكثيرين بالقيام بتعديلات فى المحرك ونظام الجر لتناسب الهيكل

1- تعديلات خاصة بالمحرك:
يمكن تركيب محرك السيارة فيات 127 مباشرة على نظام الجر الخاص بال133 ولكن يتم إستبدال عمود الكامة ال127 بعمود كامة 133سيات ، لان إتجاه دوران المحركين مختلف وما يضبط إتجه الدوران هو عمود الكامة، كام يتم قلب قطبية توصيلتا المارش ليدور فى نفس أتجاه محرك السيات 133
يفيد هذا التعديل فى إعطاء قدرة حصانية إضافية للسيارة ولكنه لا يفيد فى حل مشكلة السخونة
يمكن تنفيذ هذا التعديل بشكل محدود عند عمل عمرة لمحرك السيات عن طريق توسيع الشمايز لتناسب بساتم ال127، وتركيب بساتم 127 وشراء وش سلندر 127 كامل وتركيبه على بلوك محرك السيات

2-تعديل الكاربراتير: يمكن تركيب الكابراتير الخاص بال127 على السيارات سيات 133 ولكن يحتاج الى قاعدة تعلية صغيرة تصنع عند الخراط، نظرا لعدم إمكانيه تركيبه بدونها لتعارض مكان تركيبه مع خوصة شداد سلك الإكسراتير، وكاربراتير ال127 يحسن كثيرا من إستهلاك ال133 للبنزين( سيات 133 بكربراتير 127 وكل شئ سليم تصل الى 270 كيلو فى الصفيحة داخل البلد)

3-تعديلات خاصة بالسخونة:
أول تعديل خاص بالسخونة وهو تقريبا تم تنفيذة فى كل السيارات ال133 الموجودة فى مصر، هو إستبدال طنبورة طلمبة المياه بطنبورة اقل فى القطر مما يجعل الطلمبة والمروحة تلف بشكل اسرع، وقد ساهم ذلك فى التقليل من مشاكل التبريد الى حد كبير
التعديل الثانى وهو مطبق فى بعض السيارات كبديل للتعديل الأول، إستبدال طلمبة ال133 بطلمبة 127 مع تركيب مروحة كهربائية على ردياتير السيارة وهذا ايضا يحسن من خواص التبريد جدا بدون ان يكون صوت السيارة مرتفع
التعديل الثالث او بالأصح إضافة، البعض يقومون بتركيب مروحة كهربائية فى الجهة الامامية من الردياتير لتساهم فى تحسين التبريد، ولكنها ليست فعالة للغاية
أفضل تعديل رأيته حتى الآن وهو يحسن التبريد بشدة، إزالةالقميص المحيط بالردياتير وتطويل محور مروحة الردياتير لتقريبها من الردياتير مع تركيب مروحة تبرديد لادا، وهى ذات ريشات اكبر من تلك الخاصة بال133 وتعطى دفع هواء عالى جدا، هذا التعديل تنتهى معه مشاكل السخونة نهائيا

4- تعديلات خاصة بنظام الجر: مشكلة آلات الجر المعتمدة على الفلانشات المطاطية من اكثر مشاكل السيارة 133 إزعاجا، حيث ان الفلانشات المطاطية قصيرة العمر، ولا تعطى إنذارا قبل دمارها، وعندما تفسد إحداها(اليمنى او السيرى) تتوقف السياره عن الحركة بدون إنذار ولابد من تغييرهها باخرى جديدة،لذلك لجأ المخترعون المصريون الى حل عبقرى، يتم بمقتضاه تغيير صرر العجلات الخلفية بأخرى خاصة بالعجلات الامامية لسيارات128 ومن ثم تكريب كبالن 128 عليها، ثم يتم لحام النصف الخارجى لأكسات(محاور جر) 128 بالنصف الداخلى لأكسات سيات 133 لتكوين محاور جديدة هجينة تصلح للتبييت داخليا فى مخرج جير بوكس السيات وخارجيا فى مدخل كوبلن ال128، وهذا ينهى الى الابد مشكلة الفلانشات، حيث ان الكبالن تعمل على عجلات السيات الخلفية ولا تعانى من احمال الملفات(التحويد) التى تتحملها فى ال128 وبالتالى فإن الكبالن تبقى وتعمل بدون حاجة للتغيير حتى نهاية عمر السيارة

5- إضافات أخرى: يمكن إضافة عداد حرارة للسيارة (عداد دائرى خارج التابلوه) مع أستبدال حساس الحرارة الخاص بال133 بأخر خاص بال127 حتى يناسب العداد
كما يمكن تركيب ولاعة للسيارة مكان زر ضخ ماء الزجاج اليدوى الذى كانت تزود به السيارة ويتوقف عن العمل بعد سنة، ويمكن بالطبع تركيب مجموعة كهربائية لمياه الزجاج،ويمكن إستبدال كراسى السيارة بكراسى 128 او تركيب مساند رأس لها

يبقى فقط ان اضيف ان كل هذة التعديلات تقلل بل تنهى مشاكل السيارة لكن لا توجد تعديلات إستطاعت ان تحل إحدى المشاكل الأساسية للسيارة وهى انها سيارة بطيئة بسبب إرتفاع نسب تخفيض الجيربوكس الخاص بها والذى لا يوجد بديل له من أيه سيارة اخرى نظرا لتصميمه الخاص الذى يتاسب المحرك الخلفى والجر الخلفى

اما بالنسبة لتكاليف تعديلات السيات

عمرة السيات 133 مع تعديل المحرك ليكون مثل ال127 :تتكلف حوالى 3 آلاف جنية ولا تجرى إلا إذا كان الموتور مفوت

تركيب كابراتير 127: 250 جنية تمن الكاربراتير إستعمال الخارج،30 جنية تمن الوصلة، و30 جنية مصنعيات، كاربراتير ال127 الجديد طراز سوليكس تمنه 550 جنية

تعديل السيارة لتعمل على كبالن: حوالى 600 جنية تقريبا

تعديل نظام التبريد عن طريق قطع قميص الردياتير وتركيب محور طويل ومروحة لادا: حوالى 100 جنيه، لو لم يتضمن الأمر تغيير رادياتير، لو محتاج رادياتير ثمنه فى حدود 250 جنيه

من أشهر من يقومون بتعديلات السيارة السيات 133 خراط إسمه ابو النيل فى منطقة جامع الظاهر، يمكن السؤال عن مكانه عند اى ورشة ميكانيكى او كهربائى حول منطقة ميدان الجيش

أما افضل مكان للحصول على قطع غيارها فهو "على شاهين" بالنسبة لقطع الغيار الجديدة ومكانه امام مدخل جريدة اخبار اليوم تماما فى احد الشوارع المتفرعة من شارع الجلاء، اما بالنسبة لقطع الغيار المستعملة يمكن الحصول عليها من" أبناء على شاهين "ولهم محلين ب 155 و175 شارع بوسعيد(طريق ابو الريش ) من ميدان السيدة زينب

بالنسبة لشراء سيارة سيات

النصيحة الأولى
دور على سيارة محركها وصندوق تروسها بحالة جيدة
النصيحة الثانية
دور على سيارة محركها وصندوق تروسها بحالة جيدة
النصيحة الثالثة
دور على سيارة محركها وصندوق تروسها بحالة جيدة
النصيحة الرابعة
دور على سيارة محركها وصندوق تروسها بحالة جيدة

إوعى تشترى سيات مفوتة او صندوق تروسها بايظ (فيه عضة او يكون بيعاكس فى نقلة من النقلات او صوت ونه مرتفع-لن تجد سيات مافيهاش ونة ولكن يشترط ان تكون مقبولة ولست من النوع الذى يسبب الصمم)
حتى لو اتعرضت عليك بخمسة آلاف جنيه لأن تكلفة تعمير المحرك+ ثمن جير بوكس ستكون حوالى خمسة آلاف اخرى

سيبك من موال راشة برة وراشه جوة والهلس دا لأن السيات 133تكلفتها الحقيقية فى أجزائها الميكانيكية، بس طبعا متاخدش عربية معووجة بسبب حادثة، لكن انا اقصد ان محدش يضحك عليك ويبيعلك عربية مفوتة علشان مش راششة جوة، هاتصرف عليها دم قلبك

لو لقيت عربية محركها وآلات جرها بحالة جيدة حتى لو بتسخن خدها،
سعر السيارة الغير معدلة(بحالة جيدة-محرك+آلات جر) فى حدود 7500 الى 8000 جنية، المعدلة من 8000 الى 9000 بشرط حالة المحرك وأجزاء الجر الجيدة

لو خدت عربية سليمة محرك وآلات جر ممكن تعدلها كبالن وتعدل نظام التبريد وتظبط كل حاجة فيها فى حدود 1000 جنيه، دا طبعا غير المصاريف الاخرى من كاوتش او بطاريه او خلافه التى تحتاجها كل سيارة مستعملة فى اول فترة إستعمال

[emamphoto]

بص ياباشا انا هجيبلك الخلاصه في العربيه دي وماتنساش تدعيلي
ده كان موضوع عامله الباشمهندس سبعاوي عن السيات 133

و الله دعيت لك يا أستاذ إسلام
فعلا الموضوع شامل و جاب من الآخر
و ألف شكر لكل من اهتم بالموضوع

[abdouz]

فعلا شرح استاذ سبعاوى وافى وجايب معظم المعلومات اللى الواحد محتاجها