دروس مستفادة اثناء عمليه الدوكو والسمكرة

[medo20000]

الله ينور .........

[darkangel007]

v.nice Topic :)

[hema_hn]

دروس مستفادة عند عمل دوكو وسمكرة للسيارة من واقع خبرتى الشخصيه:

معلش هكتب بالعامية عشان سهوله توصيل الافكار

1- متوديش العربيه لسمكرى يكون ليه علاقة ببتاع الدوكو لانهم هيشتغلوك هيشتغلوك بس يفضل يكونوا فى نفس المنطقه

2- روح لحد يكون قريب عشان تقدر تتابع العربيه كل يوم

3- فضى العربيه من كل حاجة و الاستبن و كل حاجة فى الشنطة قبل ما توديها للسمكرى...وطبعا رخصتك معاك مهما يكن متسبهاش لحد
4- خد قراية عداد ال كم اول ما تسيبها للسمكرى عشان ناس كتيرة بتستهبل و تعمل بيها مشاوير خاصة و بيبقى مستهتر لانه سمكرى و هيعرف يعمل فيها اى حاجة...كل يوم وانت عنده راجع على القراية و عدى الفروق اللى اقل من 5 كم لانه ساعات بيروح يشتريلها حاجة من محل قريب مثلا...لكن تلاقى 20-30 كم يبقى فى ان
5- خلى تنك البنزين واصل لربعه عشان ميستهبلش و يسحبهم (حصل معايا انى كنت مفول التانك وراجع بيه فاضى بعد ما خلصوا شغل و بيقولى عايز حساب 10 لتر بنزين حطهم من نفسه عشان ميعطلش الشغل !!!! استهبااااااااااااااال
6- ميغركش ان الصنايعى يحلف بالدنيا و الدين و وووو لان 90 % منهم معندهمش لا زمة ولا ضمير

الدوكو:

7- روح بالعربيه لبتاع الدوكو الاول و شوف هو طالب اية يعمله السمكرى فى العربيه بالظبظ و خليك دقيق و اتكلم فى كل حتة فى العربيه واعرف نوع البوية اللى هيرش بيها و نوع الورنيش و هتاخد كام كيلو وهيستخدم معجون اية

8- ركز معاه فى كل تفاصيل الحساب و خلى حد تالت واقف معاكم عشان يبقى شاهد
9- اعرف السعر اللى طالبه شامل اية من مواد الدهان و شوف شامله ايجار الفرن و لا لا...شامل وش بوليش بعد اسبوعين او شهر من الدهان
10- يستحسن تقسم الحساب لمصنعيه ومواد دهان و انت اللى تشتري مواد الدهان
11- شوف السعر دة شامل البيتومين و رشه ولا لا عشان يبقى باين فى الاتفاق
12- اتفق معاه لو فى سوكة عايز تعملها زى الاصليه اللى جاية مع العربيه لانهم كتير بيستبلوا و يعملوا مش واخدين بالهم
13- اوعى اوعى اوعى تدى اى صنايعى مصنعيته كامله ومش معنى انها دخلت الفرن انه خلص و ياخد بقية فلوسه...لما تستلم العربيه و تمشى بيها ياخد بقيه حسابه
14- خليه يعملك النيكل بتاع الجنوط فضى و لو الاكصدام مفهوش حاجة يديله رشة صغيرة عشان اللون
15- خليه يعمل حسابة فى شويه دهان يفضلولك من نفس اللون اللى دهن بيه عشان تفضل معاك لا قدر الله للخدوش اللى بعد كدة

السمكرى:

16- وريله كل الشغل اللى فى العربيه و كل الباروما اللى فيها و اتفق معاه ان الحاجات اللى هتبان لما هيفك تتعمل بردة لانه هياخدها منك مقاوله

17- قوله بالظبط على طلبات بتاع الدوكو وخليك دقيق فى كل حتة فى العربيه اتكلم عليها وشوف هيعمل فيها اية
18- اتفق معاه على السعر واعرف شامل اية بالظبط...شوف السيليكون لو هتحتاج على مين
19- خد منه ميعاد تسليم و دايما تتابعه كل يوم خصوصا لما يفك هتلاقى حاجات ظهرت جديدة
20- خليك مع السمكرى يوم الفك لان ما اسهل انه يعك الدنيا و يحط مسمامير ده على ده و يبوظ حاجات و يقولك هى جاية كدة
21- رتب الحاجات اللى بيفكها فى اكياس و اكتب عليها (مثلا مسامير الباب الامامى – حديدة اوكرة الباب اللى ورا) او اعمل كيس لكل باب عشان بتفرق بعدين لما تيجى تركب تانى و هتلاقى حاجات ناقصة وممكن تدوخ عليها بعد كدة
22- اتفق معاه مين اللى هيفك حاجة الابواب والاوكر و الكهربا والكراسى ومين اللى هيركبهم عشان تبقى على بينه
23- لو بتاع الدوكو قالك ان العربيه عايزة تتحرق عشان طبقة المعجون كبيرة يبقى اتاكد ان السمكرى يعمل الكلام دة مظبوط و تتاكد بنفسك
24- لازم تاخد بالك انك لما تاخد العربيه من السمكرى و تروح لبتاع الدوكو هتلاقى بتاع الدوكو عنده ملاحظات على السمكرة...تقوم راجع تانى للسمكرى يعيد على اللى قالك عليه بتاع الدوكو
25- اتاكد ان العربيه هتاخد وقتها فى الفرن مش ساعه واقلب
26- اوعى اوعى اوعى تدى اى صنايعى مصنعيته كامله ومش انه سلمهالك توديها لبتاع الدوكو يبقى خلص...لان المفروض يركب حاجات تانية بعد ما الدهان يخلص زى الدلايات مثلا الباكتات
27- متنساش تدور العربيه كل يومين كدة عشان البطارية متنمش منك

28- لو اتزنقت فى اى حاجة ادخل على نايل موتورز ودور على مشكلتك بال search اختصارا للوقت هتلاقى حاجات قديمة هتفيدك جدا...ولو ملقتش اعمل موضوع جديد وهتلاقى الناس فى خدمتك
29- اختار وقت تكون فيه فاضى نسبيا عشان تقدر تتابع العربيه كويس...مش تكون فى زنقه شغل و فى حاجة بتعملها بعد الشغل و بالتالى تنسى عربيتك
30- اللى هنا تنتهى تجربتى (المريرة) مع هذة القصة الرائعه
اتمنى اكون افدتكم
ولكى تعم الفائدة للجميع و يكتمل الموضوع ننتظر اضافات جديدة من الاعضاء ذوى الخبرات

ماشاء الله عليك انت مسبتش حاجه احنا نكملها الله ينور

[Pharaoh]

شاكر لذوقكم يا جماعه و ل كلامكم التشجيعى

[Pharaoh]

بجد موضوع رائع رائع بس كان لي استفسار هي السمكرة علي السخن هي الفرن اللي بتتكلم عليه ونسيت تقولنا الاسعار كانت اد ايه انا عربيتي اونو وروحت بيها لواحد بتاع دوكو قال لي هتكلفني سمكرة ودوكو 800 ج مش عارفه اسيبها ليه ولا اعمل بنصايحك وشكرا ليك جدا واتمني تشوف رسالتي وترد عليا

معلش رديت متأخر لظروف شغلى
الفرن اللى هو المكان اللى بتترش فيه العربيه عشان متترشش فى الشارع و ييجى عليها تراب و تتبهدل

800 ج متهيالى كويس اوى

بالنسبة للاسعار
سمكرة 800 ج
دوكو وفرن 1600ج
بيتومين 150 ج
وشوية حاجات صغيرة بقى اثناء التجميع
كهربائى 60 ج
تظبيط ابواب 70 ج

وانا تحت امركم على اد معرفتى

[kasten]

موضوع اكتر من رائع

[mlav_cbr]

بعد كدة الصنايعيه مش هيلاقو حد يشتغلو بسبب نايل موتورز ههههههههه

[eng_ahmedryad]

موضوع رائع

جزاك الله كل خير

[adfarouk]

ألف شكر يا باشا ... موضوع مفيد جداً

[Viper911]

الله ينور عليك موضوع أكتر من رائع و تسلم ايدك جه في وقته

[bshndi]

السلام عليكم ورحمه الله وبركاته
ربنا يكرمك والله علي النصيحة الخالصة
والمجهود الرائع
إحتراماتي

[أشرف فتحى]

مشكور على الإفاده..جزاك الله خير....

[weda]

بارك الله فيك ... وكثر من أمثالك

[ahmedezzat78]

الله ينور ...... موضوع جميل جدا

واضح انك عانيت الأمرين مع الصنايعيه

[lameey]

ياراجل خليها على الله ........... هو فية حد يغلب صنايعى يعنى انا ممكن ادقق معاه زى ماحضرتك موضح وفى الاخر يعملى شغل سوقى ....... واكون انا الخسران فى النهاية .. مش كده ولا ايييييييييييييه