فكرة جديده لرش العربيات

[SASA3]

اولا السلام عليكم و رحمة الله و بركاته

هو انا مش عارف ان كانت فكره جديده ولا قديمه و لكن هو منظر انا شوفتخ النهارده ممكن يخلينا نرش العربيات من غير معجون او كلام من ده الى بيخليه يطقطق من اول لمسه

هى الفكره انى شوفت النهارده الكوبرى و هو بيدهن من اول و جديد بس الكوبرى كان عليه دهان قديم و بدل ما يتشال سنفره وا كده هما جابوا كمبروسور و بدل المياه رمل!!!!!

اه رمل و بيرشوا الكوبرى بالرمل علشان يقشر الدهان القديم يعنى ممكن تقول بيعملوا عاصفة ترابيه
علشان كده فى الدول الصحراوية زى السعوديه مثلا الى مسافر برى طويل بيلبس العربيه زى كفر او بيحط عليها شحم علشان متتقشرش الدهان بتاعها

فهل لو جبنا الجهاز الى بيرش الرمل ده و رشينا بيه العربيات قبل ما تتدهن مش كده هنشيل الدهان القديم و الصاج يبقى سليم و الى هيرش هيرش على العظم على طول ؟؟

و كده هتبقى العربيه برضه مرشوشه و برضه فابريكه ؟؟


ولا انتوا رأيكوا ايه؟؟؟؟
و اسف للاطالة!

[MoMohsen]

على حسب معرفتى ان دة مش رمل دة مادة معينه اللى هى بيكنج بودر او baking soda و ليها جهاز مخصوص عشان يطلع المادة بضغط عالى لدرجة انها تشيل الدهان.
انا معرفش اذا كان الجهاز متوفر فى مصر ولا لأ . بس اعتقد انه هيبقى مكلف بالذات لانها حاجة حديثه

[Ruin Scud]

هيا المشكله في المعجون اللي بيتحط ولا في ازاي اشيل الدهان القديم؟
عشان تشيل الدهان القديم في مزيل بيزيل الطلاء وده معروف وبتوع الدهان بيستخدموه انما فكرة الرمل دي للأسف ممكن تاخد معاها حاجات كتير في السكه وانت بتشيل الدهان القديم
بالنسبه للمعجون هما بيحطوه مش عشان الدهان يمسك لأ ده بيتحط عشان يخلي السطح مستوي تمام وده عشان السمكري مش عايعرف يساوي السطح اللي اتخبط بالصوره ان يرجعو تاني زي ظبط المصنع للصاج.
يعني الموضوع مش موضوع دهان بيتشال وخلاص لأنك برده بعد ماتشيل الدهان بالرمل اذا كان ينفع هاترجع تاني للمعجون عشان لو كان السطح مش مظبوط المعجون ده عشان السطح يكون مستوي تماما
+ نصيحه بلاش تقرب من الرمل اللي بيعملو بيه الكباري لأن ضغطه بيبقى شديد جدا وممكن الرمل يأثر عليك وعلى فكره هما بيستخدموه في ازالة الطلاء والصدأ من قاع السفن البحريه

[A.Saad]

وممكن الرمل يجيى على الزجاج ولا الفوانيس ولا البلاستيكات
غير سعة المكان المطلوب للشغل

[rahmanboud]

الرمل ده فكرة مستخدمه عندنا فى تانكات البترول لما نحب نعمل لها صيانه

والجهاز ده بيقولو عليه رماله وهو فعلا رمل مش بودر ويتم ضغطه بدرجه عاليه جدا

لكنه مينفعش فى السيارات لانه مش حيزيل الدهان فقط ده ممكن كمان ياكل فى الصاج نفسه من شدته وترجع تانى تمعجن وبعدين تدهن ونبقى معملناش حاجه علاوه على إنه ممكن يبوظ الزجاج والفوايس وكاوتش الأبواب وخلافه

[sheko_2000eg]

بلاش احسن

[Sherif Khalifa]

صاج العربيات خفيف خير حديد سور الكوبرى