تنصحونى بإيه لعلاج الخبطة دى

[mabdelaziz]

أنا كنت عملت الموضوع فى باب اللوجان قبل العيد, لكن واضح إن القسم ده الأنسب عشان كده أنا حابب أعرف نصيحكتم لعلاج الخبطة دى وأعملها فين فى اسكندرية, وممكن تتكلف فى حدود كام؟

الصور اللى جاية توضح الخبطة:

[al_manara]

ربنا يعوض عليك
غيرة برفرة استيراد احسن وبنفس اللون

[snoop]

بص يا باشا دع الرفرف الشمال تسال على رفرف استيراد نفس اللون يكون افضل ولو ملاقتش يبقا هاتة لون فاتح ورشه وركبة لان خبطات الرفرف دى لما تترد الرفرف بيتنفخ ومبيطلعش مظبوط وده وش العربية يعنى حتاثر فى لما تيجى تبيع

[nice_bird]

الخبطة دي تترد وتتظبط وبيتعملها حتة صاج بدل المطقوعة انا شفت القصة دي في عربية ألنترا وكانت اشد من دي والحل دا علشان تغيير الرفرف هياثر في تمن العربية عند البيع بس لازم يكون سمكري نضيف وهتكلف شوية لكن لو مش فارق معاك البيع هات رفرف جديد يريحك من وقفة السمكري وانضف للعربية

[mody1221]

الحمد لله انها بتيجى ف صاج ياباشا بص احسن حل ليك لو العربية كلها فابريكة اتوكل على الله وغير رفرف لو عندك رش فى بعض الاماكن يبقى تتعمل عند السمكرى بس انا انصحك بتغييرة

[MOK3336]

لو الرفرف بيركب بمسامير يبقي هات واحد تانى و رشة و ركبة مكان القديم
لو الرفرف لحام زى اللادا و الشاهين كده يبقي عايز سمكري شاطر عشان ميبنش
و ربنا يعوض عليك

[MohssenRashed]

باشا انا رديت عليك في الموضوع القديم انا رأي تجيب رفرف جديد او استيراد احسن طبعا.

[strongxx]

انا رأيي تروح للأسطي الدكتور رمضان.........إيده إيد جراح..........الخبطه بتطلع من تحت أيده فابريكه...وده علي اكتر من تجربه وأكتر حاله

الأسطي رمضان موجود في أبو سليمان في أخر شارع العشرين عند المدرسه...حتدخل يمين من سور المدرسه علي أول شارع شمال حتلاقيه علي الناصيه......ومش لازم تقوله انا جاي من طرف حد.....هو راجل محترم وحيقوم معاك بالواجب وزياده

انا روحت له بلانسر وأكسيل وأكسنت وإلنترا وكنت كل مره بدور علي مكان الخبطه مش بلاقيها أساسا وبيعرف يظبط التنيات إلي بتببقي في الفبريكه بتاعت الصاج

[mabdelaziz]

شاكر لك كلكم والله إنتم ناس زى العسل.
أنا آسف على التأخير فى الرد, بس والدى مريض ومشغولين معاه, دعواتكم له.

لغاية دلوقتى مش لاقى وقت أعمل حاجة, بإذن الله فى أقرب وقت حاخد قرار وأبلغكم بآخر الأخبار.
متشكر جداً بجد لكل واحد أخد من وقته عشان يشارك برأيه.

تحياتى لكم جميعاً

[nadp370]

غير رفرف يامعلم لأنه إتخرم أساسا

[mabdelaziz]

يارب تكونوا بخير جميعاً
آخر التطورات فى الموضوع ده إنى رحت لسمكرى وبتاع دوكو, وقدروا التكلفة فى حدود 450 جنيه. المشكلة إن بتاع الدوكو قال لازم الرفرف كله يترش عشان يطلع لون واحد, وأنا بصراحة مستخسر أقشر البوية الفبريكة عشان حتة صغيرة.
وبالنسبة للتوكيل سألت فى صفحتهم على فيس بوك, وكانت التكلفة 550 جنيه تمن رفرف جديد, و500 جنيه مصنعية الرش.
مش عارف مصنعية الرش دى لا تشمل تمن البوية ولا إيه, سألتهم تانى بس مفيش رد.

دعواتكم ربنا يقوينى كده وألاقى وقت عشان أخلص من الموال ده.

[mostafablidy]

تغير الرفرف هو الحل الانسب

[mabdelaziz]

أخيراً وبعد طول تفكير وحيرة
وكمان الأيام دى الإيد القصيرة
قررت ألم الموضوع وأقفل ع السيرة

بصراحة مش طالبة تغيير رفرف ورش ومصاريف ودوشة اليومين دول, وزى ما زميل فاضل قال قبل كده, يام العربية حتتخبط, ربنا يحفظ عربياتنا جميعاً.
المهم رحت للسمكرى وقلت له أنا عاوز ألم الموضوع على قد ماتقدر, وكانت هى دى النتيجة:


الشكل ده مش هو النهائى, الراجل كمان كتر خيره جاب شوية بوية وغطى الصاج المكشوف بقطنة, بس البوية كانت سودا وباين فرق اللون, ماعرفتش أصورها عشان الدنيا ضلمت.

ها إيه رأيكم كده؟

كمان أنا رايح بإذن الله صيانة ال 10000 قريب, تفتكروا ممكن يرشوها فى التوكيل وتطلع مظبوطة؟